فلول النظام

هما مش ناويين بقى يحلوا لغز فلول النظام دة ؟؟؟ مفيش ولا بلطجى ..ولا واحد اعترف على اى حد من الفلول دى ؟؟؟ هما مسكوا قد ايه منهم ؟؟؟ كام واحد مسجل ولا ليه سوابق بلطجة و تهديد امن ....محدش قال دا فلان اللى دفع لى ؟؟ ولا المقاولة شاملة الحبس و السجن ؟؟ ما حد من المفتحين يفهمنا اية النظام ....
 وبعدين ايه الفلول الجبارة دى ....كل اللى بيحصل دا ومحدش عارف مين بيعمل ايه ...ولا التصريحات اللى بتطلع  من عينة ...


" دى الفلول هى اللى عملت كدة .. اخص عليها قليلة الادب .....معلش احنا حنشوف الموضوع ده و نعاقبها الوحشة ... خلاص بقى بطلوا زن وخلونا نشوف اللى بعده ...ما احنا شغالين اهو ولا حنقطع نفسنا بقى ؟؟؟ ..محدش يرضية اللى بيحصل دا ابدا و الله ...احنا طبعا عارفين و مقدرين ان الزعلة كبيرة ...معلش ... المرة الجاية خدوا بالكم من الفلول و المندسين ....
 هو مفيش كلمة حلوة خالص كلة شكوى شكوى  كدة ؟؟؟ "

 اقترح لحل ازمة فلول النظام ان السيد وزير الثقافة يجمع كل الكتاب و المبدعين فى مجالات الابداع الادبى و كتابة الافلام و السيناريو  للخروج بافلام جديدة للموسم الصيفى غير :  فلول النظام,  البلطجية , وذيول النظام, المندسين , و غيرها من افلام  موسم شتوى  قديمة ....و نفسنا مرة واحدة نشوف اسماء الفنانين على الافيش ...وجنبها المخرج و المنتج ...مهم قوى نعرف الفن ده جاى منين !!


كما اقترح فرض ضرائب دخل عالية القيمة على الفلول علشان دول واكلينها والعة !!!!