انهاء خدمة 505 لواء و82 عميد في اكبر حركة تنقلات بالداخلية
http://www.masrawy.com/news/Egypt/Politics/2011/July/13/Police_men.aspx
أصدر اللواء منصور عيسوي حركة تنقلات وترقيات تعد الاكبر في تاريخ الوزارة حيث شملت 4 الاف ضابط برتب مختلفة.
وتضمنت الحركة انهاء خدمة 505 ضابط برتبة لواء و82 برتبة عميد ونقل 54 ضابط برتب اقل الى اماكن لا تتعامل مع الجماهير.
وتعد هذه هي المرة الأولى فى تاريخ وزارة الداخلية التي يتم فيها إقصاء مئات اللواءات فى حركة واحدة.
وأعلن وزير الداخلية فى مؤتمر صحفى الاربعاء كذلك إنهاء خدمة 82 ضابطا برتبة عقيد من بينهم الضباط المحالين للمحاكمات الجنائية، بالإضافة الى ترقية الضباط من رتبة الملازم حتى المقدم وفقا للمدة المقررة لكل رتبة.
وأوضح عيسوى أنه سيتم تنفيذ حركة الترقيات اعتبارا من أول أغسطس المقبل، وكذلك تنفيذ الحركة الإدارية اعتبارا من نفس التاريخ، أو تاريخ خلو الوظيفة أيهما أقرب، والتى شملت 10 مساعدين للوزير، ونائب رئيس قطاع واحد، و8 مديرى أمن، و55 مدير إدارة أو مصلحة، و93 نائب مدير أمن أو وكيل إدارة أو مصلحة، و92 مساعد مدير أمن ومساعد فرقة.
وأضاف أنه سيتم تنفيذ حركة التنقلات العامة اعتبارا من 6 أغسطس المقبل، والتى كان من أبرز ملامحها الاستجابة لرغبات الضباط الذين استكملوا مدة الخدمة بالمنطقة الثالثة، وكذلك بالنسبة لراغبى النقل فى نطاق المنطقة الواحدة فقد روعى فيها تحقيق الاستقرار الاجتماعى للضباط.
وأكد وزير الداخلية أن مساعديه الحاليين سيتم انهاء خدمتهم بمجرد حلول تواريخ انتهاء خدمتهم اعتبارا من الشهر الجارى.
السيد منصور العادلى اثبت الدليل القاطع انه الاب الروحى للفلول ...
تنقلات ايه ؟؟؟ هى دى الحركة اللى بيتخانقوا عليها ؟؟؟ و شرف يقولة زحلقهم يرد يقولة مالكش دعوى ؟؟ مش مزحلقهم ....هو دا التطهير ؟؟؟
انهى خدمة الديناصورات اللى اصلا المفروض انها ماتكنش موجودة .....اللى هما يعنى 600 واحد كانوا من المرضى عنهم اصحاب العتبات الطاهرة ايام المجحوم العادلى
و بيقولك 4 الاف ظابط ...ههههه ماهو مرقيهم ...من رتبة ملازم حتى المقدم .... مرقييييييهم ....
هو فاكرنا اغبياء ولا متخلفين و لا ايه ؟؟؟
و يعنى ايه وظائف لا تتعامل مع الجماهير ..احنا بقى بنهزر اكيد ...يعنى ايه ؟؟ يعنى ايه لا يتعامل مع الجماهير ؟؟
ماهو لسة فى الخدمة ...و كلة بيجامل بعضة ...يعنى هو اى ظابط لما بيرفع سماعة التليفون لاى واحد فى القسم بيتعامل مع الجماهير و يقول فلان فسحووووووة ..حد حيقولة انت مالكش تعامل مع الجماهير ؟؟
ازاى يعنى بعيد عن الجماهير مش فاهمة ...يعنى مش حيمشى فى الشارع ...مالوش جيران ؟؟؟ ..لو اى واحد بقى منهم ضايقة فى ايتوها حاجة ..تفتكر سيادتك حيعمل ايه ؟؟؟ علشان هو اتغير مع الداخلية اللى بتتغير حيقولة ربنا يسامحك ؟؟ مالوش واحد صاحبه عايز يوريه انه لسة فى الصورة وان اللى حصل دا بس تغيير جو ...و يثبت له انه بتليفون صغنون قد كدة ...يقدر يفسح اى حد مش عاجبه ..مثلا يعنى ....
يعنى واحد عاش طووول عمرة بيعذب و يقتل و شايف نفسة احسن و اعلى من الناس ...واحد جنون العظمة بيتوارى خجلا منه ..السادية هى اسلوبة الوحيد و الابدى فى التعامل ...واحد القذافى بهلوستة بيقولة يا اونكل ...متوقع انه يتغير ازاى ..ها ...ازاى ؟؟؟
ازاى امين شرطة من اللى كانوا يعذبوا ...ويكهربوا ..فى الاقسام ولا امن الدولة سنين و سنين و تبلد احساسة و بقى خلاص لا بيسح و لا بيشوف ... ..يتغير و يبقى شريييف و صاحب كرامات و يتعامل مع الناس كويس ؟؟
هو فاكر ان كدة استجاب للمطالب ؟؟ يبقى سكران و بيهلوس ....الا الدم ..مافيهوش انصاف حلول ..الا الدم يا عيسوى ...
اااه لو اقدر ..لو بس اقدر ....
هما مش السفلة دول هما اللى عيشونا ايام سودا ...ضرب نار و هجوم مسلح ... وسهر للفجر ولحد ما الصبح يطلع ...مش هما دول كلاب الداخلية ؟؟؟ بترقيهم ؟؟ وتنقلهم لوظائف بعيدة عن التعامل الجماهيرى ؟؟؟ اللى هو احنا يعنى ...
الداخلية ماتت يوم 28 ...بايه بقى ؟؟ مخنوق باللفافة برضة ...اصل الادمان دة مالوش علاج ...مش هى دى برضة الداخلية اللى منها طلع الظباط اللى شتموا متاظهرى التحرير يوم 29-6 بالام و الاب ؟؟ ومش هى دى برضة اللى طلع منها الراقص مع السيف ؟؟؟ واللى كانت بتضرب قنابل مسيلة للدموع علشان تحرر الضفة و قطاع وزراة الداخلية من اولاد العم ؟؟؟
ثوب الداخلية الجديد مليان شك .. وتطريز !!!!!
و الباقى .... فين ؟؟؟ يقال ان الكومى اللى قتل 24 من شهداء الاسكندرية ..اتنقل شرطة الكهرباء ودى من اعلى المرتبات ......
و مدير الامن غراب من اللى ايديهم مدممة بدم الشهداء ؟؟؟ ايييييه ده ؟؟؟
فين الامن المركزى اللى البلاوى كلها اتعملت على ايديه ؟؟ فين القناصة ؟؟؟ فين امن الدولة و زنازينها و امناء الشرطة اللى كانوا شغالين فيها ؟؟ و ظباطها اللى محدش يعرف عنهم حاجة ؟؟؟ مين اللى كان مسئول عن شراء ادوات التعذيب ؟؟
وراحت فين ؟؟ ايه اللى حصل لملفات امن الدولة اللى لقاها الشعب لما اقتحم مقرات امن الدولة ؟؟؟ ايه اللى حصل للدكاترة الشرعيين اللى ثبت انهم زوروا فى تقارير وفاه الشهداء ؟؟؟ السباعى ما سمعناش انه اتحقق معاه ليه ؟؟؟ فين سيارات الاسعاف اللى نقلت السلاح و القناصة اللى مصمم انهم مش موجودين ؟؟؟ فين سيارات الامن المركزى و السواقين اللى دهسوا المتظاهرين ..ولا دول كمان مفيش منهم و اللى يلاقى منهم يبلغ عنه ؟؟ واخبار المفقودين ايه معاك ....الصنف دا ايه ظروفه ...شاحح ولا بطلوة ولا ايه ؟؟؟
بيقولك مش حاعمل حاجة غير بالقانون ...
بيفكرنى بواحد راح شغلانه جديدة خالص عليه ...خايف يعك ولا يغلط ..قوم يعمل اييه يا اولاد ؟؟؟يدور على الكتالوج و ينفذة بالحرف ...لا يزعل حد و لا يعك ..كله حسب ما الكتاب بيقول ...الدمغات و الطوابع كلها لازم تبقى موجودة ...لا استثنائات ...
اى قانون ؟؟؟ اللى القتلة عاملينة لانفسهم علشان يقتلوا من غير ما حد يحاسبهم ؟؟؟ اى تحقيقات اللى بيطبق على اساها القانون ...تحقيقات النيابة ..اللى هى اصلا من الداخلية ...وكانت بتساعدهم فى تلفيق القضايا و التهم و سجن الابرياء و المظلومين ...تحقيقات النيابه حتقف ضد ظباطها ؟؟؟ ياترى فى اى فيلم شفتها دى ؟؟؟
الجهاز دا لازم يتحرق بيهم ...هما مش حيسكتوا غير لما يولعوا فيهم احياء ...
محدش حيقبل دا ابدا ..ابدا ..
اكبر حركة تنقلات فى وزارة الداخلية ؟؟؟
الف مبروك يا سيدى ..تستاهل بجدارة لقب ملك الحركات ...و سيذكر لك التاريخ هذا ...الف مبروك يا سيادة اللواء ...ما تنساش حضرتك الصور التذكارية مع اهالى الشهداء ... والمصابين و المفقودين ...علشان تحطها جنب صور حضرتك مع ابنائك من الظباط الشطار الحلوين اللى اتغيروا فورا مع ملابس الداخلية الجديدة ...وسيذكر لك تاريخ دولة يوتوبيا ..انك كنت اول وزير داخلية قام بهذا العمل الجليل ...
حسبى الله ونعم الوكيل ...حسبى الله ونعم الوكيل ....
ليست هناك تعليقات:
إرسال تعليق