وجهة نظر: عودة الروح

  يوم الجمعة 8-7-2011 ..

مليونية الثورة اولا ...

كل الكلام اللى ممكن يتقال عنها انها "" عودة الروح "" .......

- بعد كل الاختلافات و الخناقات اللى موجودة على الساحة ... الصوت العالى و المشاحنات بين كل التيارات و اللا تيارات ...
ثبت بالدليل القاطع الذى لا يقبل اى شك ولا حتى التساؤل بعد كدة ...ان الروح لم ترحل ولن تنتهى ... الروح موجودة بس هى لانها غالية بتظهر فى اوقات اللزوم بس ... علشان اللى فاكر حاجة غلط ...يصحى لنفسة و يعدل تفكيرة او يهدة خالص و يبنى واحد جديد ..
احنا لسة واحد ...كل مصر فى كل الميادين واحد ....
صحيح اختلفنا .. و بان علينا اننا اتفرقنا بين اتجاهات و اختلافات كتير ... بس وقت الجد رجعنا لاصلنا ..واحد ..وبس ..

اختلفنا على كل حاجة ...الا دم شهيد ...الا اهات مصاب ...او حزن اهل المفقودين ...
الا الدم ...تسيل قدامة بحور دم ...ولا يتساب ابدا حق شهيد ....
السويس اعلنت العصيان المدنى ....و الناس هناك شايلين اكفانهم و ماشيين بيها ...
خلاص ... الصبر نفد خلاص....
و كل المحافظات فيها اعتصامات من امبارح ...لان كل المحافظات فيها شهداء ومصابين و مفقودين ...
كل مصر نزفت دم ...و الدم لا تسامح فيه اطلاقا ...
الا الدم ....

***********

- مازالت الناس معتصمة بكل قوة و اصرار فى الميدان و عندنا فى الاسكندرية و السويس و محافظات كتير ...
احنا دلوقتى الساعة 9 مساء يوم السبت 9-7-2011 و لا حس و لا خبر !!
محدش طلع يقولنا العواف عليكم ولا حتى سا الخير ...
الميدان امبارح كان كامل العدد ... و الاسكندرية من كتر الناس قرروا يقسموا المظاهرات الى مسيرتين و الاعتصام فى مكانين ...القائد ابراهيم و ميدان سعد زغلول ....
ومحدش قال ايه اللى بيحصل ....
يمكن رئاسة الوزراء و المجلس الاعلى  عايزين تفسير للخطاب ؟؟

على العموم احنا فى انتظار كلمه مهمة من السيد رئيس الوزراء ..و ربنا يستر ..انا مش متفائلة خاااالص ...
وبعدين بعد 48 ساعة اخيرا قرر حد انه يعبرنا ؟؟ ومش المجلس ؟؟ عصام شرف ؟؟
دا ميعادة يوم الاثنين ...ايه اللى حيطلعة النهاردة ؟؟؟
ضميرى المثقوب بيقولى ان الخبر دا وراه حاجة غامقة ....خاصة اننا مستنيين من الساعة 6 تقريبا !!!
بيفكركم بحاجة يا اولاد ؟؟؟ المخلوع و خطاباته مثلا ؟؟؟
اعوذ بالله ايه بس اللى جاب السيرة النحس دى ....اعوذ بالله منه و من سيرتة السودا ...
ربنا يسترها معانا ...يارب ...يارب ...استرها يارب ..
وعدى الخطاب على خير ...

***********

- النهاردة فى جريدة المصرى اليوم :
الاعلام الغربى : مليونية " الثورة اولا " اعلنت وفاة الشرطة و قوة الاخوان

بالنسبة للشرطة :

احنا عارفين انها ماتت من زمان لاننا احنا اللى قتلناها و دفناها سوا !!!
و مقولناش لاننا ناس بنعرف ربنا ...و المفروض اننا نذكر محاسن موتانا ... بس ..
الداخلية بشرطتها   كان مشيها بطال ... ومحاسن من بعدها اخدت السكة ....
فقلنا بلاش نجيب سيرتها خالص ... ولا حتى سيرة محاسن  اللى غيرت اسمها لزوم الشغل الى مساوىء ....ولانها ماتت بعارها ... ما كانش فيه صوان ولا عزا ....كفاية سيرتها اللى كانت ولازالت على كل لسان .. ونهايتها اللى بيتضرب بيها المثل ....

و لان الجرايد دى اجنبية .. محدش منهم كان عارف انها ماتت ...
فاكرينة خبر ..ههههههههههههه..مساكين !!!

و بعدين هى لما كل جمعة تطلع مليونية بالشكل و التنظيم دة و مفيش اى بدلة ميرى ولا حتى خيالها فى اى منطقة محيطة ...دا مش دليل على موتها من زمان ؟؟؟؟ لما امبارح التنظيم و الترتيب دا كلة من شباب الورد ... و مفيش اى فل ولا ملثم قدر يهوب هناك ..دا مش دليل على انها بقت ذكرى ؟؟؟ و خرجت بلا عودة الى الابد ....
لما اللجان الشعبية حمت البيوت المناطق فى مصر كلها ..دا مش دليل على ان الشرطة بالداخلية ماتت و اتحللت من زمان ؟؟
ما احنا كنا من غير داخلية ولا وزير ولا حكومة ولا يحزنون ...ايه اللى حصل ؟؟؟
زى الفل ...اخر حلاوة ....
شعب زى الفل ما يحبش اللوع ولا الكلام ابو وشين ...هى الامور تقدر تخرج عن طوعه ابدا ؟؟..
و كمان حمش الشعب دا قوى ...الداخلية اتمايصت علية.. تاواها و قطع خبرها ....

و ثبت بالدليل القاطع ان الشرطة بمشيها البطال كل ما تظهر فى مكان بتجيب معاها الخراب و الدمار و الاصابات ....وبتقلب ضلمة زى لبسها ....
يعنى فى يوم 29-6 لما ظهرت الدنيا ولعت .... وامبارح لما كانت مش موجودة الدنيا كانت ورد و ياسمين ...و الناس ملايين ..و الدنيا عيد ...

دا الميدان مجتمع قائم بذاته ...ولا محتاجين وزارة صحة ..ولا داخلية ... ولا تضامن ...كله هناك ....
لما الشباب قادرين يعملوا كل ده لوحدهم مش حيقدروا يمسكوا وزارات ؟؟و يمشوا دولة اكبر شوية ؟؟؟
و عجبى ...

على فكرة هما مسكوا حرامى ... ..وفية واحد كمان ربطوة فى العامود مع سنجته ...هههههههههه....يصيف شوية ...
اللينك تحت ...والله شعب عسل قوى ....وزى التحرير ....

قوة الاخوان :

اما بقى قوة الاخوان فهى ساحت من اول طلعة شمس بعد التحرير ...

بعد ما قعدوا يلعبوا بالبلى ...
نازلين ..لا مش نازلين ...نازلين ...لا مش نازلين ...
عين فى الجنة و عين فى النار ...
و بدل ما منظرهم يبقى زى يوم   الجمعة  27-5 اللى قاطعوه لانه كان معاه الست وقيعة اللى سمعتها استغفر الله العظيم ...
على اخر دقيقة ..
قرروا انهم ينزلوا نزول مسرحى .....

الظاهر انهم عرفوا بان الست وقيعة و الميدان وقعوا فى بعض !!!!!!!!!

****************

اسيبكم بقى مع اللينكات دى ....

************************

الثورة بعثت من جديد - جمعة الثورة أولاً 8 يوليو
http://www.youtube.com/watch?v=9QtO8xGT7Yo&feature=related

ما اجمل شكل الميدان ...

الليلة الاولي للاعتصام في ميدان التحرير
http://www.youtube.com/watch?v=18OgAsjxCpk&feature=youtu.

القبض علي بلطجي وتقييده بجوار "سنجته" علي أحد أعمدة ميدان التحرير

http://www.dostor.org/society-and-people/variety/11/july/9/47708

القبض على حرامي بميدان التحرير - جمعة 8 يوليو
http://www.youtube.com/watch?v=8Vm6R_jVJ74&feature=relmfu

من مطروح
http://www.youtube.com/watch?v=0GkYXnp7FFo&feature=youtu.be

اجواء من اعتصام الاسكندرية

http://www.youtube.com/watch?v=axmeqgjgyPQ&feature=youtu.be

مظاهرات الاسكندرية

http://www.youtube.com/watch?v=d9Rf5N9ERVE&feature=related

مظاهرات الإسماعيلية في جمعة الثورة أولاً - 8 يوليو

صور تويتر

@shokir
صورة لشاب يمسك بالعلم فى اعلى نقطة من الميدان ...

http://twitpic.com/5my80s

صور للميدان ...

by arabawy at 7-10 pm

وائل غنيم

http://www.youtube.com/watch?v=X5NPAmaDwjM&feature=youtu.be

مليونية في شوارع الإسكندرية - جمعة الثورة أولاً 8 يوليو

اعتصام ميدان سعد زغلول الأن بالأسكندرية
http://twitpic.com/5nrlcm