19-10-2008 ...تاريخ نشر الرسمة
http://www.alkhabeer.net/vb/showthread.php?t=31443
تويتة صغننة ....و قامت عواصف الصحارى على المهندس نجيب ساويرس ...
ورفع المحامين عليه دعاوى من كل شكل و نوع لازدراء الاديان ....
و شتايم فيه ... و تحس و انت بتقرا اى تعليق من دول بالكراهية بتشع منه زى شمس اغسطس الساعة 3 الظهر كدة !!
و لا بقى حملات المقاطعة ...دى لو كانت متوجهة لاسرائيل بكل الكراهية دى و الاصرار دة كان زمانها فلست فى 24 ساعة !!!!
واحد كتب على اكاونت التويتر الشخصى بتاعه حاجة مش عاجبة ... ولا حتى غير لائقة .....ايه دخل شركاته ؟؟؟
و قاطعوا موبينيل ...وهاتك يا شتايم و تكفير .....ايه الحرب دى ؟؟؟
اييييييه كل التعصب الاعمى و التخلف دة ؟؟؟ دول غلبوا ابو لهب ....
ايه ده ....كل دول اسلام اصلى و احنا مسلمين صناعة صينى ؟؟ ولا احنا فلول مندسين ...
كل مشاكلنا و مشاكل الاسلام وقفت عند السيد ميكى و الست ميمى ؟؟
هما الناس اللى فى التحرير بيضربوا بالقنابل المسيلة و الرصاص و لا اهالى الشهداء اللى اتبهدلوا دول مش مهم ؟؟؟
لما يحصل تفجير هنا ولا هناك ... ولا عمل ارهابى ... يطلع حد يقول المسلمين دول متعصبين و ارهابيين ... فى المقابل الف واحد يقول ... يا جماعة المسلمين مش كلهم كدة ....و بعدين كل واحد بيعمل حاجة ما يتقالش المسلمين عملوا لان المسلمين مش فرد و لا اتجاه معين ...بلاش التعميم ..
و بعد كدة المسلمين الاصلى بيدافعوا عن الاسلام و بيطبقوا العدالة بيعملوا نفس الشىء مع الاخرين !! قاطعوا شركاته ... كافر و عدوا للاسلام و كل اللى يعرفة زيه ...اى واحد موبينيل يبقى زنديق ...!!
من يومين كان فيه خناقة بينى و بين واحد من اياهم اللى ربنا ينور لهم السكة ...على صفحتى فى الفيس بوك هوصديق لصديق ...
و لقيته كاتب تعليق ... كفار قريش لو كانوا قروة كانوا عملوا لة معلقة لوحدة !!!
قصيدة طوييييييله بيهديها لنجيب ساويرس ...خلاصتها انه زنديق و كافر ومش فاكرة باقى اللسته ...ههههههههههههه ...
زنديق ...هههههههههههههه...فى 2011 ...
ولما قلت له ان ساويرس مش غلطان و انها رسمة قديمة جدا ....و ان الناس تناقلتها من زمان فى كل مكان و منهم مسلمين واذا شايفها مسيئة دور على اللى عملها ...
و بعدين كل الطاقة دى وجهوها لحاجة مفيدة احسن...دوروا على حق الشهداء ولا هاجموا القتله مثلا ... هاجمنى و قالى ان ساويرس بيدعى على الاسلام بالباطل !!!
و طبعا كلام تانى كتير ...بس يعنى هل هو فاهم معنى جملة زى دى ؟؟؟ بيدعى على الاسلام بالباطل ؟؟
ليه قال ايه ساويرس غلط ؟؟ ...
مثلا هاجم زواج الاخوانى من غير الاخوانية من منطلق استبدال الذى هو ادنى بالذى هو خير ؟؟؟ و بعدين قالك اصلى باهزر ...
ثم حول النقد الموجه اليه باعتبارة نقد موجة للاسلام و هجوم على الدين ....
مثلا يعنى ؟؟؟
ساويرس برضة اللى اتكلم عن غزوة الصناديق ؟؟ ساويرس اللى داير يوزع منشورات عن العلمانيين اللى كانوا عايزين ينزلوا يوم الجمعة 27-5 ؟؟؟ ولا يكونش هو اللى مورد اكياس السكر و زجاجات الزيت اللى اتوزعت على الناس علشان يقولوا " نعم " فى الاستفتاء ؟؟؟
هو صاحب نظرية ان الليبرالية معناها ان والدتك ما تلبسش حجاب وان الليبرالية الاقتصادية ان اى مصدر للرزق مسموح بيه بدون حلال وحرام ؟؟
انا ممكن طبعا افهم كل الحمية و الغيرة دى على الدين فى حالة الرسوم المسيئة الدانيماركية مثلا ....بس اذا شايفين ان رسمة ميكى و مينى دى مسيئة للاسلام قوى كدة ....خلاص دوروا على اللى عملها فى الاصل .... و حاسبوة .. ولا حاسبو كل الناس اللى تناقلتها على تويتر و فيس بوك مسلمين و مسيحيين و كل جنسيات الدنيا و دياناتها ..لكن تاخدوا واحد بس بذنب ما ارتكبهوش ...
ولا لانه مش اى واحد ؟؟؟ ......ولا ايه ؟؟؟!!!
و بالرغم من كدة الراجل لما لاقى ان الناس ما تقبلتش اعتذر فى التويتة اللى بعدها على طول ...لانه شخص مهذب اعتذر ...مع انه مش مذنب و لا غلطان ...
لانه مش هو اللى راسمها ولا عاملها اصلا ...بس تقول ايه بقى لما الكهربا تقطع عن امخاخ ضيقة ...
على فكرة ...انا ما اعرفش المهندس نجيب ... ولا اعرف اى حد يعرفة ...ولا انا موبينيل اصلا ....
لكن الموضوع مستفز لانى عارفة انه مش غلطان ... ايوة مش غلطان ....
و بعدين كل الهيصة دى على ايه ؟؟ يعنى تفتكروا لو اننا شيلنا اسم ساويرس من الموضوع و التويتة دى كانت من اى حد عادى مش معروف زى ما انا شفتها على تويتر اكتر من مرة ...كان فرق مع اى حد اى حاجة ولا سمعنا لاى حد اى صوت ؟؟ لا اعتقد لان الرسمة دى متداولة من 2008 !! و متداولة من قبل ما توصل للشخص دا تحديدا ..
احب اوضح انى بعنيا دول شفت الصور دى على التليفزيون .. مش فاكرة برنامج ايه بش شفتهم على التلفزيون من كام اسبوع ...وبعدين كانت الصور على تويتر عاااادى جدا ...ملايين الملايين تناقلوها ....
بس اللى بيحصل دا شىء مخزى لانها ببساطة باينة زى الشمس .. تصفية حسابات من ناس هايفة و ما عندهاش الشجاعة الكافية علشان تواجه باتهامات صريحة و فى النور ... و بالتالى استخدمت عقول مظلمة سكنها الظلام و الوطاويط علشان تتدارى وراها باسم الدين اللى هو منهم برىء ....
هو شخص مشهور ... مسيحى ... و كل اللى عنده كلمة مش قادر يقولها اهو بيرمى اى طوبة و يجرى ....
زى اللى بيهاجموا عمرو حمزاوى لانه لابس حظاظة حمراء !!!!
ههههههههه كل مساوئه فى الحياه الحظاظة .....طلع علمانى يهودى بيتبع مذهب الكابالا .....و كل دة من حظاظة ...غالبا لو كانت خضراء كان حيبقى مهلوس من عند القذافى !!!!!!
كنت حضرت محاضرة رائعة عن حوار الاديان للدكتور - محمود عزب و الاب يوحنا قلتة ...
الدكتور محمود سئل سؤال عبقرى ....هما المسلمين لما فتحوا مصر ...لما دخلوها ليه ما هدوش المعابد و الاهرامات الفرعونية ؟؟
ليه ما اذوش المسيحين فى دينهم و كنائسهم ؟؟؟ ...
انا بقى باسال .... مش دول برضة يعتبرو مسلمين ولا فلول ؟؟
مدعين الاسلام الصينى بتوع اليومين دول بقى اسلامهم احسن و اشد من اسلام اللى فتحوا مصر ؟؟؟ الاسلام مستنى جهودهم الجبارة علشان يطبقوا الشريعة ؟؟ ولا دول اللى يدافعوا عنه ؟؟
و احب اسال كمان بقى .. هو مين اللى نصب الناس دى حكام باسم الدين ؟؟؟ يقرروا مين اللى معاه و مين اللى بيدعى عليه ؟؟؟
مين ادالهم حق تكفير الغير وحق اتهامة بمعاداه الدين ؟؟ مين ادالهم حق مناقشة صحة اسلام الاخر من عدمه ؟؟؟
هو احنا لية لا نقبل اننا نوصم باننا معادين للسامية من قبل الاخرين و فى نفس الوقت احنا بنوصف غيرنا بانهم معادين للديانة و كفرة ؟؟
و الناس المسلمين الاصلى دول ... محدش منهم يعنى هاجم الهجوم الشنيع دة ليه على ابو جهل اللى طلع ايام فتنة امبابة ....
صاحب الفيديو المشهور و اللى بيحرض فيه على حرق كنائس مصر و بعدين طلع فى فيديو تانى بيقول محصلش !!!
http://www.youtube.com/watch?v=CBRCgtz0Ofk&feature=player_embedded
هو ده مش ادعاء بالباطل و تشويه للاسلام ؟؟؟ الاخ دة ...اى مصحف قرى فيه عن حرق الكنائس و ايذاء الاخرين ؟؟؟
مين اللى علمة التفسير ؟؟ و بعدين هدم الاضرحة و القتل و قطع الاذان ....كل دة دفاع عن الدين ؟؟؟ دا مش ادعاء بالباطل ؟؟
هو الرسول عليه الصلاة و السلام ما وقفش عند مرور جنازة جارة اليهودى بالرغم من ان الجار دة كان بيؤذيه ؟؟..
هما بقى شايفين نفسهم ايه ؟؟....ماشفتهمش يعنى بكل الحمية و العصبية دى خرجوا فى مظاهرات حاشدة ضد القس اللى حرق القران فى امريكا ....دى الدنيا برة قامت و هما هنا مشغولين بالاخوات و الاعتصام اعتراضا على محاكمة ابو لهب بتهمة التحريض !!!
لكن ما اعتصموش على حرق المصحف ...لما قس يعمل محاكمة للاسلام و المصحف و يحرقة دا مش مسىء للاسلام ...انما نجيب ساويرس زنديق ..!! و بيزدرى الدين الاسلامى ...
...هو حرق القران دا مش زى الرسوم المسيئة للاسلام ....مش واجب برضة لما هما يعنى اسلامهم شديد قوى كدة يعملوا مظاهرة و لا احتجاج
مثلا يعنى ...و لا يعتصموا ضد حاخام اسرائيلى بيهاجم المسلمين ...هما دول مش برضة يستحقوا منهم نظرة ؟؟؟
ولا هما متخصصين بس فى حرق دور العبادة و تكفير الاخرين و عايز اختى ؟؟؟
و لا بقى عايز اختى دى ...دى بقى نكتة ....كل اللى اتعمل عليهم الهيصة دى طلعوا مش اخواتهم خاااالص .....
الست كاميليا اللى حلفت بكل الايمانات انها مش مسلمة و حتموت مسيحية و اخرة ما زهقت قالت حاسيب البلد و اطفش ...و هما برضة مصممين و عاملين لها صور لابسة نقاب !!!! وممكن تكون طلعت الحج كمان ...
و الست عبير ...اللى اتحرقت علشانها منطقة بحالها ... وناس ماتت .... مش معروف لها هى تبع انهى ناحية ....
و اللستة طوييييلة بعد كدة ...
و الى الان ..محدش من الاخوة اللى قوموا الدنيا حريقة و اللى كانوا فاكرين انهم بيحرروا عبيد قريش طلع علشان صورة المسلمين اللى بقت ضلمة يقول اى كلمة ينور بيها الصورة ....اعتذار مثلا و لا احنا اتلعب بينا ولا اى حاجة ...لا .. اللى ربنا فتح بيه عليهم اننا نحرق كل كنائس مصر ....
دا مش تشويه للاسلام و المسلمين ؟؟؟ ما اللى يسلم و لا يتنصر هو حر ....ايه يعنى ...الاسلام و لا المسيحية حتنتهى و لا حتنقص واحدة ؟؟؟
و بعدين هما تخصص اخوات .. مفيش اخوة خالص ؟؟؟ هما الرجالة ممنوع عليه انهم يسلموا و يهربوا ولا ايه ؟؟ ولا اى واحد بيتنصر بيقتلوة من سكات و بلاش دوشة ؟؟
و بعيدن كل الاخوات من الصعيد و قرى الجنوب ؟؟؟ مفيش من المدن الكبيرة اى اخت خالص ؟؟
ولا ناس المدن كفرة و علمانيين و الحاجات دى ما بتهمهمش .... ليبراليين بقى حنقول ايه ...
الدكتور - خالد منتصر كان كتب مقال عن ان تغيير العقول اصعب من تغيير النظام ...
الى جانب دا احنا كمان محتاجين تحرير للعقول دى من سيطرة الجهل و الظلام ...
تصدقوا بقى ان تويته ساويرس ما اهتمتش بيها ....
لكن فيدو الراجل دة ضايقنى جدا ؟؟
ما حستش ان ساويرس شوة الاسلام .. لكن حسيت ان اللى لابس جلباب و بلحية هو اللى شوة الاسلام ...وادعى علية بالباطل ...
انا بقى مسلمة شمولية ....يعنى علمانية ليبرالية اشترا كية يمين شمال الوسطية ...
و عندى اجندة و نوتة و مجموعة كراسات كمان ....
بانزل ايام الجمع ...
من الفلول ... و عضو مؤسس لحركة البلطجية الاحرار ...
وناشطة فى حركة الملثمين و المندسين ايد واحدة ...
و حاعمل حملة اسفين يا ساويرس ....
حد عايز حاجة ؟؟؟
ليست هناك تعليقات:
إرسال تعليق