الاثنين 11-7-2011 ...
البيان الثانى لرئيس الوزراء الى الشعب .....
http://www.youtube.com/watch?v=QlpKunX2rhE&feature=youtu.be
مش ملاحظين انه الاول كان بيتكلم معانا باسلوب مباشر و عفوى تلقائى و بيحكى معانا اللى حصل و اللى حيحصل ...و كان بيبقى بشوش و مرتاح فى جلسته على الكرسى فى مواجهة الكاميرا و بيتكلم من دماغة بدون ورقة ولا شاشة ثابتة ....
ودلوقتى بقى بيقرا علينا بيانات مسمومة ....لها نفس ريحة المخلوع و طريقته ...و باين عليه جدا الضيق و الامتعاض...... و الجلسة الرسمية على المكتب ووراه العلم ...هو ناقصة جملتين ...فى الاول يقول ..ايها الاخوة المواطنون ...و فى الاخر يقول ... انا فاهمكم !!!!
* الخطاب اللى فات كنت خايفة جدا جدا ليطلع يعلن استقالته ..لان ساعتها كنا حنرجع ورا خمسين خطوة ...بس دلوقتى ...باقول ياريته اعلنها ...كان يبقى ارحم ...
* واضح ان البيان الاول لم يصيب جميع المتفرجين بالشلل و بالتالى كان لابد من اتمام العملية و الحاقها ببيان اخر يصيب الباقى بالنقطة و فقع المرارة !!!!
* الخطاب دة نفس اللى قبلة بس باختلاف ترتيب السطور ...ايه الجديد ؟؟؟ انه مفيش جديد ...
* تغيير وزارى خلال اسبوع ...
ليه خلال اسبوع ؟؟؟ احنا بقالنا اسبوعين بنقول يوم 8 يوليو مليونية غضب ...اسبوعين ....و المطالب معروفة ...وخلال الاسبوعين حصلت حاجات معروف انها سكبت البنزين على النار ...احداث مسرح البالون و قبلها 29-6 و غيرها ...طيب ..
معملتوش المطلوب ليه ؟؟؟ فاكرين اننا كشعب حنطلع يوم الجمعة و نروح ...وخلصت الحكاية ؟؟ ولا مثلا فاكرين اننا حنغير راينا علشان الحر والمصيف ؟؟؟
احنا من امتى سامعين انه عايز يغير وزراء و المجلس العسكرى هو اللى رافض ؟؟؟ يعنى رئيس الوزراء بلا سلطات...لانه لما يقول دول مش نافعين و المجلس يخليهم ..يبقى هو لا يحكم ... و بالتالى اضمن منين انا ان اللى جايين جديد دول من اختيار رئيس الوزراء مش فرض المجلس ؟؟؟..اساميهم الناس موافقه عليها مثلا ؟؟؟
و بعدين رئيس الوزراء قال دول مش نافعين ...يعنى مفيش نتيجة ..دلوقتى لما تغيرهم يبقى بتغيرهم ليه ...تحت الظغط الشعبى ..ماكان من الاول ..انت عارف المطلوب و السكة ...ليه لازم نتخانق بقى و نزعل من بعض علشان المعروف انه مطلوب يتنفذ ؟؟؟ انا ازاى اثق بقى انك ماشى فى سكة المطالب الثورية ؟؟؟... انت كدة ماشى فى سكة الغلط !!!!!
ليه مصرين يبقوا جزء من النظام ؟؟ لييييييييييييه ...حد يفهمنى ....
* هما المحافظين اتغيروا كام مرة من بدء الثورة ؟؟؟ و اخرهم جابين محافظالاسكندرية عنده 80 سنة و خرج معاش من 22 سنة !!!! ( ربنا يديله الصحة و طولة العمر ...بس قصدى لا يوجد تغيير ثورى ..نفس النظام ) ...و بالتالى المحافظين محدش فيهم بياخد قرارات ولا بيمضى ورقة لانه عارف انه ماشى .... وكلهم كلهم اختيارات عجيبة غريبة تدل على انه لم يتغير النظام ...خالص ...
* تانى تكليف وزير الداخلية ...تانى ...منصور العادلى على راى اللى قال ...تانى ...هو مش قالك ما تقدرش ؟؟؟ ومش حانفذ ؟؟؟
ومالكش دعوى و مش شغلك ...ايه يعنى ...المفروض نفهم ايه مش فاهمة ؟؟
دا واحد اثبت بالدليل القاطع انه الاب الروحى للفلول ...انه فعلا فعلا منصور العادلى ...ماهو امن الدولة فى ثوبة الجديد مش حييجى غير من العادلى فى ثوبة الجديد ....
و نقول من تانى للمرة الخمسين المليون و اربعمائة الف...ازاى يثبت على الظباط تهمة قتل الثوار و انت سايبهم 6 شهور فى اماكن عملهم... ازاى سايبهم يخفوا الادلة و يتلاعبوا و يدمروا الحقائق ..و ياثروا على الشهود و يهددوا الناس ....
خاصة و ان الداخلية كلها فااااااسدة ...من اول وزيرها لكل الناس اللى لسة عايشين ايام النظام ...
وبلاش الاسطوانه المشروخه بتاعة الشرفاء ... زهقنا بقى كفاية ....
بعد 6 شهور ... ايه اللى حصل فى قضايا قتل الثوار ؟؟؟ ولا حاجة .... حكم كرتونى بالاعدام على امين شرطة هارب ...الداخلية كلها بكل سفاحينها ....امين شرطة واحد هو اللى اثبتوا عليه قتل 23 متظاهر و بالتالى اسرع حكم فى تاريخنا ..اعدام ....
وياللعجب...هذا الهارب كلم نص القنوات الفضائية ..و محدش من الداخلية عارف يقبض عليه !!!!!!
* هههههههههههههه ( استعادة الامن ) دى مفكرانى باغنية فيروز "" ضاع شادى "" !!!
امن تايه يا اولاد الحلال ....
احب اوجه نظر حضرته الى ان الامن دا بيظهر للحبايب فقط ...انظر المحاكمات و عد كام فرد امن و شرطة موجودين لتامين السفاحين و القتلة ...انظر داخل قاعة المحكمة ...حتلاقى الامن هناك ...ابقى قولة يرجع تانى !!
* ( اناشد الشعب تمكين القضاء من ممارسة عملة فى ظروف طبيعية ؟؟؟!!!!!) .....
على اساس ايه ؟؟؟ ان الشعب البلطجى بيهدد القضاة و بيضغط على مشاعرهم ؟؟؟ ...
من الاول قايلين عايزين العدل ...والا كنا اعدمناهم زى ما القذافى عمل مع الطلبه و المعارضين ...اعدمهم على شاشات التلفزيون و فى ميدان عام .. ومن حقنا كمان نولع فيهم احياء ...من حقنا بعد ما سرقونا و باعوا البلد وكمان قتلونا ...من حقنا ...بس مع ذلك قلنا القصاص العادل ...لكن بقى بلاش تستفز الناس و تستغباهم ...بلاش تدوس انت كمان عليهم ...دول ماتوا علشان كرامتهم وحقهم الانسانى فى الحياة ...يبقى مش حيسيبوا الدم دا ابدا ...ابدا ...
ماهم القضاة بقالهم 5 او 6 شهور شغالين و الناس صابرة وساكتة ....
النتيجة ايه ؟؟ استفزاز مالوش وصف ..و القتلة خارجين بضمان عملهم .. وكمان بيستفزا الاهالى و يعملوا لهم اشارات بذيئة و شتائم قبيحة !!! دا غير التهديدات و الظغوط عليهم ...اى بشر يستحمل كدة ؟؟
المحاكمات كلها كوميديا سوداء ... كسب غير مشروع على حاجات تاااافهة .....
العادلى بيتحاكم على لوحات معدنية ...تخيلوا بقى ...لوحات معدنية .. وقضايا قتل الثوار لسة !!..بالله عليك يا سيد عصام ازاى ام ولا اب لشهيد ولا مفقود ولا مصاب ...ازاى واحد اتعذب ولا شاف الويل فى امن الدولة ...عايزة يصبر اكتر من كدة ..وهو شايف القتلة بيخرجوا بضمان عملهم ؟؟ لا وكمان فيه منه اللى اترقوا !!!
ازاى مطلوب من اب دفن ابنه بايدة ...يشوف المهازل دى ...وتقولة خلى القضاء ياخد راحته ...ازاى
وهو حتى مش من حقة يشوف السفاح دة بالبدلة الزرقاء ؟؟ ازاى مش مسموح له حضور المحاكمة ؟؟؟ اهالى الشهداء و المصابين
قالوا بيهددونا ... ومحدش سأل فيهم ..بيضغطوا علينا علشان نتنازل ولا حد عبرهم ... محدش سائل ولا سامع ...الناس اللى مهتم بيهم اهل الخير و الجمعيات الاهلية و الحكومة فى الغيبوبة ....
خليتوا اهالى شهداء يخرجوا و يعتصموا فى الشارع لمدة اسبوع علشان يطالبوا بحقهم ...ومحدش عبرهم ....ايه بقى ..المفروض ايه يعنى ....يستنى 5 سنين كمان علشان حضرة القضاء السلحفائى ياخد راحتة كمان ؟؟؟؟ و السفاحين يطلعوا براءة ويحاكموا اهالى الشهداء اللى طبعا قطعا حيتسجنوا مؤبد مشدد....لانهم بالقطع حيطلعوا بلطجية و محترفى قطع طرق ...
امال ليه يا سيادة رئيس الوزراء الشباب اللى بيتقبض عليهم فى المظاهرات بيتحاكموا عسكريا ... وتصدر عليهم احكام سريعة و بيترحلوا الى السجن الحربى ...و الناس اللى سرقت عمرنا و حياتنا ..بيستمتعوا بسجنهم و احنا محدد اقامتنا برة ؟؟
لانهم بلطجية ؟؟؟ كلهم ؟؟ ... مطلوب تفسير يا سيادة رئيس الوزراء ...
خلوا القضاء يعمل بالشكل الطبيعى ؟؟؟
بأمارة ما اهالى الشهداء بيتبهدلوا و بيتمنعوا من دخول قاعات المحاكمة ؟؟؟ بيطلطعوا بالساعات برة مبنى المحكمة لانهم من القلة المندسدة ....و محدش منهم بيشوف المتهمين اللى الشرطة ...ها ..واخدين بالكم ... الشرطة اللى االسيد رئيس الوزراء بيطالبها باعادة الامن للشارع ... طبعا هى مش حتعمل كدة لانها مشغولة بحماية القتلة من الغوغاء اهالى الشهداء ...و مشغولة بانها تتواجد داخل وخارج القفص علشان تحمى الشرفاء من القتلة و محدش يشوفهم ....
قبل ما سيادتك تحى ارواح الشهداء ...ياريت تحترموا اهاليم .. وتقدروا حزن ام و اب ...وحزن شعب على ناس ماتت بايدي خونة سفاحين ...قبل ما تحييهم ...بر اهاليهم احسن ...حافظ على دمهم ...هما ماتوا علشان يتعاملوا بادمية و كرامة وانسانية ... والنتيجة ..انهم اتدفنوا بلا تكريم ....و منهم اللى اتدفن مجهول الهوية فى مقابر صدقة ..بعد شهور من الرمي فى الثلاجات ... شهادات الطب الشرعى اللى بتوضح سبب الوفاه ملعوب فيه ...حقهم بيضيع ..واهاليهم لا بيتعاملوا بكرامة ولا انسانية ....
.القصاص القصاص..دول ضربونا بالرصاص ...
دا هتاف اهالى الشهداء لو سيادتك ما سمعتوش قبل كدة ...القصاص ..مش الفلوس ولا الصندوق ولا التعويضات ...القصاص ...
و ياترى بقى ...
ايه هى الظروف الطبيعية يا سيادة رئيس الوزراء ؟؟؟ ياريت توضح لنا ...لاننا كشعب غير جاهز للديمقراطية ... ومن جيل الكيراءة للجميع ... فهمنا محدود شوية ....
* هو ليه دايما متصورين ان مشكلة اهالى الشهداء فى الفلوس ؟؟ما هى المشكلة لو فلوس كانوا اخدوا الدية .. و اتنازلوا ..زى ما بعض التجار اللى مسمين نفسهم شيوخ بيفتوا بجواز قبول الدية ؟؟؟ او ياخدوا الفلوس المعروضة عليهم من الظباط نظير التنازل وخلاص ..واهى فى كل الاحوال حتبقى اكتر من اللى الحكومة بتقدمه ؟؟؟
الناس فى السويس شايلين اكفانهم على اكتافهم ... ومش راجعين غير بحق الشهداء ...
و الجمعة دى هى جمعة الاكفان فى السويس ......
المشكلة مش فلوس ...
هى اشياء لا تشترى ....
بس مين يفهم ...
* و فين بقى المصابين ؟؟ ولا المفقودين ؟؟؟ ولا دول تبع جنوب السودان ؟؟؟
اصلا مش فاهمة ازاى مفقودين ؟؟ يعنى ايه ....يا اما انهم مساجين او تم قتلهم ...او بقى امن الدولة فى ثوبة الوطنى الجديد و دى حاجة اكيدة بنسبة مليون % مش عايز يقول لنا الناس دى فين ...
يا ناس ..اللى كانوا مراقبين الشعب فرد فرد و مسجلين لهم شرائط فيديو ..مش عارفين المفقودين فين ؟؟؟
حسبى الله و نعم الوكيل ...حسبى الله ونعم الوكيل ...
يعنى حضرتك بدل ما تتولى بنفسك ..صندوق الشهداء ..كنت تولى البحث عن المفقودين ...و قولنا .. الغوله ودتهم فين ...
ما انت فى الاخر حتكتشف انهم تبع صندوق الشهداء يا ريس !!
لان طبعا السيد وزير الداخلية حيقول ما عنديش مفقودين ولا هما سجناء ...وطبقا للقانون مش مسئوليتى ادور عليهم ...
ولا المصابين ... يعنى المصابين بيتعالجوا على نفقة اهل الخير ...او على نفقتهم ... و اللى قتلهم و سرقهم بتتدفع له تكاليف العلاج 17 نجمة ؟؟وقارفينا كل شوية باخبارة الحامضة ؟؟
تزوير فى تقارير الطب الشرعى باعتراف الاطباء ...ووزير الداخلية بيقول ما عندناش قناصة ولا بنادق ليزر ...امال الفيديوهات دى ايه ؟؟ شهادات سائقي الاسعاف اللى اعترفوا انهم كانوا بينقلوا القناصة و السلاح فى عربيات الاسعاف دول ايه ؟؟؟
الناس بتموت لان مافيش اتصالات ولا اسعاف ...والاسعاف بتنقل القناصة و السلاح علشان يقتلوهم ....
وتقول للناس اهدوا على المحاكمات ؟؟ يعنى واحد فقد عينة ولا فى غيبوبة ولا شلل ولا اصيب بعاهه مستديمة اكبر من كدة ...بيتعالج على نفقة اهل الخير و الجمعيات الاهلية .. وبتاخد منه علشان تعالج الملعون ؟؟ فى اى شرع وباى منطق دة ؟؟؟
احب ابلغك بان الشهيد اللى توفى مؤخرا بعد 5 شهور فى غيبوبة ... اللى تكفل بمصروفاته و متابعة حالته و نقلة بين المستشفيات بالاضافة الى تكاليف الجنازة ..هما اهل الخير .. مش حكومة حضرتك ولا الصندوق اللى سيادتك حتشرف علية ...
* اعطاء الفرصة كاملة للحكومة للعمل ؟؟؟؟
العمل على ايه بالظبط ؟؟؟... والعمل بنفس اسلوب الزبانية و السفاحين و اللى الشعب عمل ثورة علشان نغيرة ؟؟؟
الحكومة حتعمل ايه يعنى ما اتعملش فى خلال 5 شهور ؟؟؟ تعبنا كلام عن قرارات ثورية ...تم تقديم اقتراحات عايزالها مجلس ثورى لوحدة علشان بس تتنفذ ولا حد سائل ...وبعدين ..النتيجة .نفس القرارات من نفس الديناصورات البائدة ..دا غير التخبط ...قرارات و عكسها ...قرار ثم الغائه لانهم اكتشفوا انه غلط ....نفس اسلوب العمل ...نفس النظام !!!
ياحكومة ... رصيدك نفذ ... والاشتراك اتلغى ....
عزيزى السيد رئيس وزراء الحكومة ....لف وارجع تانى ...
يا اما ترجع للميدان ...يا اما ترجع عن السكة اللى انت واخدها دى ....
انت كنت فى الميدان ....
اتقى شر الحليم اذا غضب .....
ليست هناك تعليقات:
إرسال تعليق