الامس السبت الموافق 9-7-2011 فى نفس التوقيت تقريبا ....كان السيد رئيس الوزراء يقوم بقراءة بيان مخلوع مباركى الاصل و الطابع عبارة عن مجموعة نقاط مبهمة غير مفهومة مرفوضة شكلا و موضوعا...
و بيقولنا حضرنه انه اصدر تعليماته و اوامرة المشددة ...و فى نفس الوقت كان وزيرالداخلية على قناة الحياة اليوم بيقول غير قانونى !!!
و النهاردة طالع بكل صراحة يقول لرئيس الوزراء : ما تقدرش .. و مالكش فيه !!
«عيسوي: ليس من اختصاص «شرف» إنهاء خدمة الضباط المتهمين.. ولن أنفذ القرار
المفروض انا كمواطنه افهم ايه ؟؟؟ ولا هما فاكرين انى ما بافهمشى ولا اييييييه ؟؟؟؟؟؟؟؟؟؟؟
اقولكم انا :
- رحلت العائلة المسمومة و لكن بقى البيت مسموما و لم يتم تطهيرة ...وكل من دخلة اتعدى بالسم ...
- رئاسة الوزراء مخوخة و فيها خلافات و منازعات و كل واحد بيزعق للتانى من جزيرتة الخاصة ....لان لو بينهم اى نوع من الاتصال ما كانش المشهد الملخبط المكركب دا ظهر لنا ...
و دا دليل على ان السيد رئيس الوزراء مش عارف لا ياخد ولا يدى...ومش عارف يعمل اى حاجة ...وهو فعلا اما مضغوط علية او بقى مسموم ...و التصرف دا من وزير داخلية خاصة معناه ان رئيس الوزراء بلا صلاحيات ...وعموما هو تصرف غير لائق لانه بيورى المواطن ايه نوع الحكومة اللى بتقولة من اجلك انت !!!!
- السيد وزير الداخلية اثبت بالدليل انه مش لازم تكون من شلة العائلة المسمومة لتكون من الفلول ....واضح انه استعداد فطرى جينى ...و الدم فعلا بيحن ..
- الباشا وزير الداخلية مستعد يستقيل ...مرة واحدة كدة يستقيل و يحرمنا من تواجدة القوى المؤثر على الساحة لو اى حد تدخل فى شغلة ...ياسلااااااااااام ... و مش مستعد يستقيل لان الداخلية زى ماهى وكر لكل فاسد و فاسق ...لان الداخلية سمعتها بطاااااااله ... و موصومة بكل اشكال وانواع العار ....
مستعد يستقيل لو حد تدخل فى عملة بس مش مستعد يستقيل لما الشرطة تضرب المواطنين و تهينهم ...لما الامن يرقص بكل وضاعة و يتلفظ بشتائم جارجة للمتظاهرين و يسبهم بالام و الاب ...
ولا ام شهيد يتم ضربها و اهانتها ...
وسيادتة متمسك بتطبيق القانون ...ياسلام ...اى قانون بقى ؟؟ قانون بمبا ؟؟...بيطبق القانون اللى الحرامية و المرضى نفسيا حطوة لانفسهم علشان يقدروا يعملوا اى حاجة و كل حاجة ومحدش يقدر يحاسبهم ؟؟؟ محدش وصل لجنابة و هو خارج البلاد السنين دى كلها ..ان القانون الحالى تفصيل ؟؟ و ان الشلة كان مهمتهم تفصيل القوانين و تظبيطها ؟؟؟ محدش بلغة ان القانون كان بيتم اضافة و حذف و تعديل سطورة بشكل يطابق تعديل مناهج المقرر الدراسى ؟؟
اى قانون دة اللى هو متمسك بمحاسبة الظباط من خلاله ؟؟...ان الظابط يروح الصبح على المحكمة و يدخل القفص و بعدين يرجع مكتبة ... ومش حيحاول يعمل اى حاجة وحشة ....ليه الظباط من الملائكة المجنحين ؟؟؟
حضرته مش فاهم ان اى واحد منهم ممكن يبوظ الدلائل و يأثر على الشهود و يضيع حق انسان ؟؟ هل حضرته حقق فى وقائع تهديد ظباط لاهالى شهداء لاجبارهم على التنازل عن القضايا ؟؟
هل حضرته شاف باى حق واى قانون الظباط دول عارضين مبالغ كبيييرة على الاهالى دول ؟؟ من اين لهم هذا ؟؟
ليه كل الدفاع عنهم ده ؟؟ الدم فعلا بيحن ...
ايها الحاكم :
لا تعبث مع الشعب
فهو المنبع وهو المصب
و بينهما جبل و نهر ودرب
اما ان تدخل التاريخ بحروف من نور
واما ان تدخلة مخلوعا او سابقا
مصحوبا باللعنات و السب
ايها الحاكم : لا تعبث مع الشعب
