النهاردة يوم سعيد ...فكروا شوية ...
طبقا لتصريحات المحامى الفريد من نوعة و الديب فى حقيقته اكيد كلنا عارفين ان المخلوع هو اول واحد و قف جنب الثورة و اكيد اكييييييد وصى العادلى انه يدلع الشعب و يستقبلة بالاحضان و الورد ...
وان الرجل الغامض عمر سليمان ( مش عارفة لية بيفكرنى بثعبان الاناكوندا ...مش اصلة لا.. اناكوندا بالذات !! ) لم يكن من المتوقع على الاطلاق بتاتا البتة انه يقول اى حاجة خالص مثلا يعنى ..
و معروف قطعا و مسبقا و تاكيدا ان المشير مش حيشهد على المخلوع ...و لا حيقول مين اللى اطلق الرصاص على التحرير ..
بس السعادة و الجمال جايين من انه راح المحكمة فعلا وحضر بشخصة امام هيئة المحكمة .. بعد ما تم تاجيل حضورة قال ايه لاسباب الامن ..و بعدين المجلس الاعلى كان طالب الاسئلة مكتوبة ليتم الرد عليها مكتوبة ..بس هيئة المحكمة صممت على حضورة و حضر ..هو دة الانتصار الحقيقى ..اعلى راس فى البلد بتمتثل للقضاء ..مفيش خطوط حمراء و لا بنفسجى خلاص ..البالته كلها اتغيرت وبقت لون واحد ..
لون شعبى زاهى لامع بلون الشمس ..
فكروا شوية ...احباط ليه ؟؟؟
محاكمات مسرحية ؟؟ ادلة اتلعب بيها الدورى ؟؟؟
سي ديهات المراقبة من المتحف ضربت ملك السيديهات مرتضى منصور و طلعت انضف من الصينى بعد غسيلة فى الدش وووووششششرررر ؟؟؟
وزير داخلية ومساعدية حيطلعوا بيشتغلوا فى داخلية بلد تانية مش احنا خالص ؟؟
محدش ضرب المتظاهرين ولا فى قناصة و كل دة كان الكاميرا الخفية ...
صوابع زينب و الاجندات و التمويلات الخارجية و الفلول و البلطجية ...
بتقابلنا شوية مشكلات و خوناقات كدة فى وسط الطريق ...
و مالة ...
عااااااادى جدا ... و لا اى مشكلة على الاطلاق ...
بس ..
جه اليوم اللى شفنا فية المخلوع و عيالة فى القفص وهما بيداروة من الكاميرات ..كان ناقص له ملايه هو كمان !!!
...صحيح بيتفسح بالهليكوبتر رايح جاى و بيدلع فى المركز العالمى ...بس يالا .. احنا برضة قلبنا قلب خساية كابوتشى ...
و نفس القفص شفنا فية السفاح و مساعدينة جنبه ....اللى محدش منهم شاف ولا سمع ولا يعرف ..بس اهو القفص يحب الونس !!
صراصير القصر اللى كلهم بيجروا فى القفص ...
و دلوقتى اعلى سلطة فى البلد امام المحكمة بناء على استدعاء رسمى للشهادة ...
دا معناه ان الشهداء و المصابين و المفقودين ماكانوش فى خناقة ..ولا فى حادثة ولا احداث ...
كانوا فى ثورة ماشية فى سكتها زى المظاهرات ( الله اكبر عليها ..قل اعوذ برب الفلق من عينين الحاسدين ...) ... بس مطلوب شوية صبر وهى حتوصل المحطة قريب ان شاء الله ...
اعزائى حزب الكنبة ..تنبيييييه هااااام ...
الريموت اللى فى ايديكم محتاج بطاريات جديدة !!!
ليست هناك تعليقات:
إرسال تعليق