الله يرحم كل شهدائنا ...اللى دفعوا حياتهم ودمهم ثمن علشان احنا نوصل لليوم دة ...
ربنا يشفى ويعافى كل المصابين اللى بلا تردد ولا خوف واجهوا الموت علشان يجيبوا الحرية ...
وربنا يثبت اقدام ابطال التحرير فى كل ميادين مصر ...اللى لسة معتصمين الى الان ...ولا تراجع ولا استسلام ...
النهاردة اول يوم فى العملية الانتخابية لاختيار ممثلى مجلس الشعب ... الاسكندرية فى المرحلة الاولى ....
سبحان من له الدوام ....
انا فاكرة اخر انتخابات فى 2010 ...كان يوم احد و الساعة 7 مساءا .. اللجنة الانتخابية هى مدرسة امام بيتى مباشرة ...
الشارع كان خالى تماما من اى ناس و اللجنة محدش واقف على بابها ...الناس ماشية فى الشوارع عادى جدا ومحدش بيجيب سيرة اى انتخابات ولا اى ناخبين ...لان الموضوع اساسا يخص كوكب تانى مش احنا ...ولا فى اى ظواهر فى الشارع تشير الى انه فى اى اهتمام من اى نوع باللى بيحصل ....
النهاردة ...
نفس اجواء الاستفتاء و احلى .....
تواجد كثييييييف من الناس من الساعة 30 : 7 صباحا امام اللجنة اللى هى مدرسة امام بيتى مباشرة ....طوابير طويييييلة ...وناس بتنظم عملية الوقوف , الناس متعاونة جدا وواقفين بصبر و فرحة ...
انا وقفت حوالى ساعتين ...تحت المطر الثقيل ...فى طابور طويييييييل ...ومع ذلك الابتسامات و السعادة كانت هى سيدة الموقف ...
خلال ساعتين من المناقشات وملاحظة الناس و موقفهم وتعليقاتهم النتيجة اللى ظهرت بشكل واضح وضوح الشمس ....
مصر مش بس بتتغير ...دى بتعمل اكستريم ميك اوفر !!!!
بعد احداث الاسبوع الدامى من اول السبت 19-11-2011 قررت انى مش حانتخب اى لاعب سيرك بيضحى بالدم علشان الكرسى ....
انتخب مين وعلشان ايه ؟؟؟ الناس كانت بتموت و تتسحل و جثث الشهداء بتترمى على كوم فى منظر يدمى القلب و كل القوى السياية محدش منهم ظهر غير بعد يوم ولا اثنين لما رتبوا امورهم واجتمعوا علشان يرتبوا مع بعض ومع العسكر الخريطة السيايسة ...
وانا بقى اكافئهم وانتخبهم ؟؟؟ كنت رافضة المبدا ومصممة ...وخلال الاسبوع كنت باتناقش مع الناس فى الوقفات و المظاهرات و الناس معظمهم كان عنده نفس الراى ...خاصة بعد تصريح الاخوان بانهم مش نازلين مليونية الثلاثاء لانهم خايفين انها تاثر على الانتخابات !!! دا غير انهم فى يوم الجمعة 25-11-2011 اعلنوا انهم مش حينضموا لمليونية الميدان وراحوا عملوا تظاهرة لنصرة الاقصى !!!!
المهم انه بعد نقاشات واستماع لاراء ناس من الثقة ...كتاب سياسيين وغيرهم لقيت ان وجهة نظرى ممكن تتغير وانى انتخب واشارك لان الجميع حذر من ان المقاطعة هى اتاحة الفرصة للناس اللى بنقاطعهم علشان ياخدو اغلبية ...و نزلت فعلا ....
ولقيت اراء كل اللى حواليا الحقيقة مفرحة للغاية ...الناس بتشارك لانهم شايفين ان دى اقل حاجة نعملها بعد ما فى ناس ضحت بارواحهم و الدم بقى سيول ....
ليست هناك تعليقات:
إرسال تعليق