كمواطنة مصرية بسيطة و طبعا اكيد متواضعة , مخى اضرب عن العمل و الكهربا عندى قاطعة .. نتيجة لارتفاع فولت الاخبار اللى باشوفها و اقراها و اسمعها فى بلاد وندر لاند اللى انا منها و باحدثكم من موقعى هذا فيها ...
شاغل بالى مجموعة اسئلة و محيرانى شوية افكار شقية عماله تلعب فى دماغى ...و الحيط اللى قدامى مش عايز يسمع لى و اشتكى من كتر ما دماغى بتتحاور معاه " بالعقل " !! .. طب اعمل ايه ؟؟... قلت مافيش غير انى اشرككم معايا و اللى يعرف اجابة لاى سؤال من دول ينوبة ثواب و يقولى ...بس انا باحذر من دلوقتى ... ان الكلام كتيييييير اصلى حالتى متأخرة ...كاتمة فى قلبى لحد ما نفسيتى طلعت مظاهرة اعطنى حريتى اطلق يدياااااااا ....وادينى طلقتها و سيبت لها العيال ...
شوف ياسيدى ....
* ظهور وزير البترول اكثر من 3 مرات فى نفس الاسبوع ليؤكد ان ازمة البوتجاز و السولار ناتجة عن سؤ التوزيع فقط و ان مصر تنتج 75% من احتياجها ,وانه جارى بحث مشكلة التوزيع العادل فى المحافظات , وبالرغم من كدة الشعب المشاغب لسة بيضرب بعضة و بيموت فى بعض المندسين منه عليه و طوابير السيارات شلت حركة المدن دا غير بقى المزارعين اللى مش عارفين يجنوا القمح قال ايه لان مفيش سولار و التصدير اللى حيقف لان الموانى ما عندهاش سولار للاوناش و خلافة دا غير سيارات النقل الكبيرة اللى بتنقل البضائع من و الى ... و غيرة و غيرة ...... و بعدين ياولاد ... فى اول الاسبوع التالى يطالعنا خبر من وزارة المالية انه سيتم تخصيص مليار دولار لاستيراد البوتجاز و السولار !!!
انا مش حاقول ايه السؤال لانه جاى فى امتحان ثانوية عامة !
* هو مش احنا خلاص بنفلس و مفيش فى الخزنة يكفى مصروف البيت و داخلين على قعدة عاطفية ساعة مغربية تحت الكوبرى للممارسة اعمال الشحاته الرسمية ؟؟ ايه بقى الميزانية اللى رقمها ما وردش فى تاريخ مصر قبل كدة اللى اتعملت دى ؟؟ و الدنيا البمبى والاصفر الكنارى اللى مستنيانا فى الميزانية الجديدة بتاعة العيد دى؟؟ .....هو مش المجلس العسكرى عمل اوجتماع و على حسب ما قال عمرو اديب على لسان احد القادة المتحدثين فى هذا الاوجتماع المصيرى اننا اذا ...اذا يعنى ابتدينا شغل من بكرة على طول امامنا عام من الكساد لتعويض عجلة الاقتصاد اللى نامت على الجنط ؟؟ دا غير ارقام مولوتوفيه عن اجمالى الدين الداخلى و الخارجى للدولة و البطالة و غيرها من الانباء المشعللة ؟؟
هو ليه مفيش حد يطلع يكلمنا كدة ببساطة و يقولنا يا اولاد .. اللى عندنا قد كدة و اللى عايزينة قد كدة ... واحنا محتاجين قد كدة و اللى محتاجينة دا حنجيبة كدة... سهلة خالص ...بدل ما احنا جالنا اظطرابات نفسية من الاخبار اللى عكس بعضها كل شوية ... حنفلس ومش حنلاقى ناكل ..ميزانية فلة ...شحاتة على الابواب ...احنا البنية عندنا كويسة بس محتاجة توصيل الكهربا .. احنا رايحين فى حتة ضلمة ...ما تقلقوش خالص كلة تمام .. تصريح وزير المالية ان اللى ايدة فى المية مش زى اللى ايدة فى النار على اعتبار اننا من سكان مملكة سيام واننا بنطالب الماليه بالنظر فى الجمارك المجحفة و الظالمة على سيارات الفيرارى و البورش ...حرام عليكم امال الشعب يركب ايه ؟؟ فين ادمية المواطنين ؟؟
ابتسم انت مش فاهم حاجة !!
و على فكرة للى مش من البلد دى .. الشعب بتاعنا دا شعب استاذ دكتور فى علوم الحساب و الرياضيات الاشد تقدما ....واى رب اسرة واى ست بيت من الشعب العبقرى دة قادر يعمل ميزانية للبيت محدش فى تاريخ العالم من اى مسئول ولا وزير مالية ولا عالم عبقرى جهبز فى اى حتة يقدر يفك لوغاريتماتها ... دا شعب من كل 100 اسرة على الاقل فوق ال 50 اسرة منهم الدخل لا يكفى المصروفات على الاطلاق ومع ذلك عندهم ميزانية...و لو مش مصدق .. اسال اى حد من معارفك .. بس اوعى تغشش الاجابة !! يبقى مش حيعرفوا يمشوا نفسهم بميزانية على 3 عجلات لغاية ما نغير الرابعة ؟؟
انا اصلى مش فاهمة لانى كنت ادبى !!!
*
المظاهرات اللى الناس اعوذ بالله بتتكلم عليها و بتقول انها فئوية .... حقهم طبعا و بالثلث و النسخ و الرقعة و الكوفى كمان ...... هى الناس اللى بتتظاهر علشان رفع الاجور ... طبعا دول افاضل ومعاهم 85 مليون حق وانا اولهم على فكرة مش مندسة خالص على الاطلاق ... بس اللى مش واصلى ابدا ... الناس دى من وجهة نظرهم لما المرتبات تزيد فى الوقت المتاخر دة .. حتبقى كام يعنى ؟؟ يعنى الزيادة حتبقى كام 100 جم مثلا ؟؟؟
الزيادة الهاربة دى ان ما جتش دلوقتى يبقى مش حنشتغل .... تقوم الحكومة تجيبها ... اصلها حنينة و ما بتستحملش الشعب يبقى نفسة فى حاجة ولا محروم ... و يزيد المرتب الكام مية اللى مش حيكفوا نظرا لان الاقتصاد العيان و عنده زبحة و فى الانعاش ما سابش مصروف فى البيت....ولان الاسعار دى من الفلول فهى كل شوية تطلع لفوق السطوح تطير فى الفراخ ..... يقوم يرجع المرتب المطاط ينكمش وبرضة ما يبقاش مكفى ...هى البيضة الاول ولا الفرخة ؟؟ دا سؤال بيؤرقنى ....
و السؤال الثانى : هو لية الناس دى ما عملتش قائمة بمطالبها مثلا و مشاكلها و كل اللى نفسها فيه ... جواب تحكى فيه كل مشاعرها ,, و تختار ابن حلال اللى يكون فيه القبول و تبعتة يكلم الكبير فى البلد دى و يقولة يا عمى دى ظروفى .. ودى طلباتى ...اسمحلى اطلب رايك و برنامج زمنى ....و اللى خلانا هزمنا اينشتاين و فيثاغورث لمدة 30 سنة ... يصبرنا كام شهر .... بس علشان بعدهم تبقى الزيادة حقيقة مش زيادة 0900 !!
و الليله تخلص و الدنيا ماشية و لا عطلة و مشاكل ولا لمة جيران وفرجة ....و فى كل الاحوال : العروسة للعريس ...و الدعوة حتبقى عامة
* دول عربية تعلن استعدادها لدفع فاتورة علاج المخلوع :
على اساس ان الشعب طلع قليل الاصل و مش ولا بد و ليه ماضى و اخد الراجل ملو بدلته و رماه فى شارم الشيخ ؟؟ قلبة فى الارض و السيغة ورماه مش لاقى ثمن العلاج ؟؟ ولا دى حملة مضادة لحملة فلول الشعب " فين فلوسى ياض " ؟؟
وبعدين الدول ام قلب زى البرقوقة دى ما عرضتش الحنية دى على اهالى المصابين و الشهداء ليه ؟؟ سمعتهم وحشة مثلا ؟؟؟ مشيهم مش ولا بد ؟؟ و عربية ازاى مش فاهمة ؟؟ اى عربية دى ... زيستافا ولا كستور ؟؟
اه ... لالالا ا ستنوا .. دى غلطة مطبعية ... الصحافة بنت الايه ... ميت مرة اقول لها اتعلمى من نحو الامية بقى مفيش فايدة ... اخرة اللعب ...هما قصدهم دول عبرية ...اه كدة الرؤية بقت فل ...ولا ايه ؟؟؟
* ماهو موقف المصريين فى الخارج من التصويت فى الانتخابات ؟؟ ايه اخر كلام ؟؟ حيصوتوا ولا العزا كوتيمى ؟؟
و بعدين مش شايفة المعضلة الحقيقة .. جايز لانى نظرى ضعيف مش شايفة فين الصعوبة ؟؟ وقعت و مش لاقياها ... ممكن تدوروا معايا ؟؟
ياناس دى دول مش على الخريطة اصلا بتعملها كل سنة ...زى طلعة العيد عندنا ... واعلانات فى جرايدنا ... لو سمحتم يا شعبنا الحبوب روحوا حطوا صوتكم فى الصندوق علشان عمال يغنى " انا ليا مين غيرك ... وحاعيش لمين غيرك "" .... و احنا صندوقنا باصص لبرة و بيقول " اصالحك لا ... اسيبك اه ؟؟؟"
دا كلام برضة ؟؟ ما حد يفهمنا ؟؟ ايه العوبارة دى ؟؟
* ادارة الكسب غير المشروع استدعت الاستاذ / هيكل لسؤاله عن ما كتبة بخصوص ثروة المسوس المخلوع.. ومالة حقها برضة تعرف الكلام اصلة ايه ... حقها ولا مش حقها ؟؟
ام هيكل بيه قالها انه اخد الارقام دى من تقارير صدرت فى صحف و بينات خارجية وانهم هما اللى بيقولوا ... مالوش حق ... هو احنا فاضيين لقلنا وقالوا و شغل اللى مش عارف ايه ده ؟؟
اخص ... اخص... اخص....ها ...
و بعدين ...قوم الادارة تسكت على اللعب دة ؟؟ طبعا لأ .. راحت مطلعة بيان ان الاعلام عندما لا يدقق فى الارقام و الاخبار يتعامل الناس مع الاوهام على انها حقائق ....و كل واحد بقى يحاسب على كلامة ... و مفيش كريدت كارد ...
يااااحلاوة ....ايه الحلاوة دى ؟؟؟ ايييييييه الحلاوة دى ؟؟؟؟
اقولك انا ايه الحلاوة دى ...دا يا سيدى اللى كان بيقصدة الشاعر : اللى ضيع فى الاوهام عمرة ... و بصريح العوبارة كدة قصدة ان اللى خرج لا ممكن ابدا يعد ... لييييه بقى ؟؟ لان " البضاعة " اللى خرجت ... اتلفها الهوى ..
الادارة بقى تسكت على التخاريف دى ؟؟ طبعا لا ... حقها ولا مش حقها ؟؟؟ راحت اشتكت لاونكل النائب العام ...ماهو مش ممكن تسيب الواد شعب دة يتكلم و يقول ايتوها كلام كدة ....قوم ايه يا اولاد ... اونكل النائب العام دا حمش و ما يعجبوش الحال المايل اااابدا ..... لازم حيوقف الواد دة عند حدة ...مش معقول يجيب سيرة العائلة الطاهرة دى ولا سيرة حسابتهم الخضرا الشريفة ...عيب ..كله الا كدة ...
اصدر قرارا بحبس الشعب فى ميدان التحرير على ذمة الاتهامات الباطلة لضرسة المخلوع و عائلته ...الزيارة كل يوم جمعة ..... ومحدش فى الزيارة يجيب له عيش وحلاوة ....اصل الشعب بياكل من الاونطة !!
* تم اصدار قرار ينتمى لفئة قرارات اى كلام فاضى مش معقول ...الا وهو ... الغاء حظر البيع على السيارات المقسطة ...يعنى لما سيادتكم يبقى معاكم عدد مناسب من الفرافير ... تروحوا بيها البنك علشان تاخدوا عربية ... و يتبقى عليكم فرافير لازم تسلموها كل اول شهر ... طبعا البنك بيحفظ حقة و بيحط العربية فى المصيدة و ما حدش يقدر يسربها لغاية ما ياخد تقلها فرافير ... الراجل عداه العيب ...
و بعدين نظرا لظغوط مهولة من الفلول ....لان دا معناه ان حالها يقف .... ثم الغاء الكلام الفاضى دة ...اول سؤال عندى : اذكر اسم اذكى اخواتة اللى اصدر القرار دة ...
ثانى سؤال : هو ليه القرارات دايما بتطلع فجأتن ؟؟ محدش قالهم قبل كدة ذاكر تنجح ؟؟
سؤال غلس : ولما واحد يفتى فى الفته و يطلع بحتة زى القرار دة ؟؟ محدش بيعاقبه ؟؟ على اعتبار ان الحتت يعنى ليها اصول ...ولا ايه ؟؟
* حل ازمة كلية الاعلام خلال اقل من 48 ساعة وبعد شهرين تقريبا من الخلافات و الوقفات و الخناقات و الافلام و المسلسلات و كل المزعج و المزهق من الحاجات ....طب ليه ماكان من الاول... هو لازم نعمل فرح و نلم الجيران ؟؟ قال ايه رئيس الوزراء كلف رجل المستحيل بحل الاشكال و اتفض المولد فى اقل من يومين ....
طب ياعنى مش كان حد يقول ان رجل المستحيل جدولة مزدحم ؟؟ الراجل يقطع نفسة يعنى ولا ايه ؟؟
* تم اعادة المحاكمات اللى تمت قبل كدة للشبان المقبوض عليهم فى التظاهرات و اللى صدرت عليهم احكام عسكرية ... واتخفضت العقوبات و صدرت مع ايقاف التنفيذ ...يعنى اللى كان واخد مثلا مثلا نقول ثلاث سنوات يبقوا سنة مع ايقاف التنفيذ ...
هل بقى الشبيبة دول كدة مذنبين ولا لأ ؟؟ واذا هما مذنبين ازاى بتخفض عقوباتهم ؟؟ واذا هما مش مذنبين ... ليه مش واخدين براءه ؟؟؟ يعنى هما كدة مش ممسوكين بلطجة و ترويع مثلا ؟؟؟ واذا كان كدة ليه بقى ما اتحولوش على القضاء العادى ؟؟
هو مين مع مين ولا ايه فين ؟؟
* هى العباسيه ممكن تقبلنى وانا الاربع تربع عندى لاسعين كدة ؟؟؟ حدش عندة كوسة هنا ؟؟
انا ومن موقعى هذا بأوطالب ...ايون أوطالب ان العباسية تكون حق لكل مواطن ببوطاقة الركم الكومى ....امال انا و اللى زيي نروح فين ؟؟ بورتو طرة نعمل تان ؟؟ فين حقوق الانسان ؟؟ ولا بقى نخلى الدول العربية تدفع لنا النفقة و العلاج ؟؟؟ ماهو خلاص بقى ...
ليست هناك تعليقات:
إرسال تعليق