الثورة مازالت مستمرة

الاثنين 27-6-2011

تشييع جنازة الشهيد ( محمود خالد محمود قطب ) ...23 سنة ...دهستة سيارة دبلوماسية يوم 28-1-2011 ..
كل الوقت دة كان فى غيبوبة ...بالاضافة للاصابات اللى اصيب بيها نتيجة دهسة بالسيارة واللى من اهما نزيف بالمخ و كسر بالجمجمة ..كان عنده اصابات تانية من الرصاص ...

http://www.almasryalyoum.com/node/472114

الشهيد دة مات دلوقتى فى التاريخ دة ..علشان يفكرنا ان الثورة مازالت مستمرة ... بعد 5 شهور من الثورة  لسة بيموت شهداء .. واللى قبلة اصلا لسة حقهم ماجاش .اللى قتلهم لسة بيضحك علينا و بيقول علينا غوغاء ... ومن مكانه بيتفرج علينا واحنا بنعافر و بيقول ابقوا قابلونى يا رعاع لو اخدتم حاجة غير الحسرة و الندم على ايامى ...مش عايزين تبقوا بنى ادمين و ليكم حرية ... اشربوا بقى يا غوغاء ...
بعد 5 شهور ..لسة المصابين متبهدلين ... والجمعيات لسة بتعمل قاعدة بيانات و لسة الحكومة بتكون لجنة و بتدور عليهم !!

بعد 5 شهور محدش يعرف حاجة عن القناصة ....اللى ليهم فيديوهات مفصلة وواضح فيها الوجه و عملية الاطلاق المتعمد للرصاص ....و معروف انهم بيتحركوا باوامر شخصية من العادلى ..لان البهوات تابعين ليه و  بس ....

دا لينك ليهم على سطوح الداخلية ...
http://www.youtube.com/watch?v=aHFE7BmpL-A&skipcontrinter=1

عربيات الاسعاف الى استخدمت لنقلهم و نقل الامن المركزى ....محدش سمع حاجة عن سيارات الامن المركزى او السيارات الدبلوماسية اللى دهست المتظاهرية  و كأنهم علب كرتون ...

محدش لسة جاوبنا عن السؤال : مين اللى فتح السجون ؟؟؟ اكتر من 23 الف سجين هربوا من سجون مصر ...رجال فقط ... الستات محدش سمع انهم هربوا ...ماهم دول مش حيعملوا رعب ولا اعمال اجرامية ... خليهم زى ما هما ....


http://www.youtube.com/watch?v=piwwOeE8T0w 

http://www.youtube.com/watch?v=gi3PrYwNXU8&feature=related



فى فيديوهات للهاربين من السجون خلال عملية خروجهم و رجال الشرطة واقفين بيتفرجوا ....مين اللى مسئول ؟؟ فى حد سئل ولا دورعلى الناس دى ؟؟؟
مين المسئول عن هروب المحتجزين بالاقسام و تسليمهم الاسلحة ؟؟؟
محدش يقولى هما اللى هربوا ولا الناس هى اللى خرجتهم ....فى فيديوهات على اليوتيوب و فيها بلطجية و مساجين بيعترفوا ان رجال الشرطة هما اللى فتحوا الابواب ليهم و قالولهم اتفضلوا ... البلد بتاعتكم ...و على فرض انه مش صحيح فى اى حد تابع الفيديو دة و حقق فيه ؟؟؟
و دا اللينك ....
http://www.youtube.com/watch?v=wS0aKhaaE9Q

عندنا فى الاسكندرية ..كان فى محاكمة لاربعة من الظباط المتهمين بقتل المتظاهرين ...منطقة المنشية تحولت الى ثكنة عسكرية و اتقفلت بالدبابات و الشرطة ...الشرطة اللى بتظهر فى الافراح بس .. وباقى الايام بنشوفها فى التليفزيون ....وتم تعطيل العمل بكل محاكم الاسكندرية لافساح المجال امام المحاكمة دى ...و البلد وقفت ... و النتيجة ...
الافراج عنهم بضمان وظيفتهم لحين استكمال القضية بعد كام شهر ...ولا عزاء لاى مصرى فقد شخص او ليه مصاب بعاهة ولا ليه مفقود حتى ...البهوات خارجين بشوات و راجعين مكاتبهم تانى ... عادى جدا ... و الوزير يقولك انا ما اقدرش اوقفه عن العمل ....
المتهم برىء حتى تثبت ادانتة ... ولانه برىء تقوم ترجعه علشان يرتب كل حاجة و على بال ما وقت القضية ييجى تكون كل الادلة تحولت الى سراب ... ظابط قاتل وعلى مكتبة ..حيستنى ايه ؟؟

مقدرش اوصف شعورى وقتها ولا شعور الناس .. دى حاجة تتحس بس ...
القهر و الظلم ... بعد 5 شهورالحق لسة مجاش ,  العدالة لسة ما رجعتش وجارى البحث عنها ...الشهيد دا بيفكرنا بالمهم ...اننا ما نتفرقش وننسى .. وننشغل بامور تافهة وهايفة ...و نرجع نتجمع تانى ونقول ...يا شهيد نام وارتاح  مش حنسيب السفاح ...
وبيفكر كل واحد فينا ..ان فى واحد مات وضحى بحياته علشان انا اكمل وابقى احسن و اخليها زى ما هو اتمناها ...هو ماماتش وواجه الموت علشان ارجع زى ما كنت ...هو مات علشان انا اقدر اتنفس حرية  واصرخ واقول انا مصرية ..اقدر ارفع علمى عالى و ابقى احسن ..

يا ترى الشهيد دة لو ماكانش فى غيبوبة ..كان حيبقى ايه رايه فى اللى بيحصل ؟؟؟
لو سمع و شاف وقرا عن المحاكمات و العادلى  ايه حيكون شعورة ؟؟
انا عارفة انه كان حيقوم ويرجع تانى يقاوم ...مكانش ابدا حيقول مافيش فايدة ..كان حيقوم .. ويرجع تانى يجرى ورا الموت و يقتل الكلاب السفلة ...

الناس دى ماتت مرتين ..مرة برصاص العادلى و قناصتة وكلابة .. ومرة باهمالنا و عدم تحملنا المسئولية ...

مرة يموتوا وهما مجهولين ..و بدل ما يتكرموا ندفنهم فى مقابر صدقة ...و بعد 5 شهور مفيش لا نصب تذكارى ولا اى حاجة ...كانهم ماتوا فى خناقة وخلصت الليلة وخلاص ..ومرة العدالة هربانه ومحدش عارف لها طريق ..ومرة مشغولين بحاجات هبلة و ناسيين الاهم ...اننا لو فى يوم نسينا ولا اهملنا الامانة ...حننتهى ...

الثورة مازالت مستمرة ....الثورة لن تنتهى ....




مقال بديع للرائع د. علاء الاسوانى :
من مواطنة مصرية إلى المشير طنطاوى
http://www.almasryalyoum.com/node/472200

غوغائيه و افتخر

السبت 25/6/2011
فى حلقة برنامج  "  فى الميدان "" مع ا / محمود سعد ...

كشف عن خطاب مرسل من الاخوين ابليس وشيطون ...مرسل الى مستشار السلطان قابوس وهو رجل اعمال كبير كمان ...
باعتين يقولولة ان التلاعب فى العملية القضائيه هدفها ارضاء الغوغاء ...اللى هما احنا يعنى ....وان الاخوان ... تانى البوبع بيطلع لهم ...و الصورة غامقة و مش حلوة خالص ....

باعتين بيعيطوا و يقولوا الحقنا الحقنا يا عمو حسام ...

دا معناه ايه ؟؟؟ المفروض نفهم ايه ؟؟؟ هو مش دا برضة استفزاز ؟؟

.. انا لو مكان ام شهيد والله العظيم اروح اولع فى السجن ...دى اسمها قلة ادب .. والمفروض بقى ان تقوم مظاهرة مليونية ترفض تصرف زى دة ...هو مش دا يعتبر سب علنى للشعب ولا ايه ؟؟؟

 مش دا الحيلة الننوس اللى فتح لنا السجون علشان البارتى يكمل ؟؟؟ هو مش دا حيلتها اللى تاجر بديون مصر و سرقنا و كان بيلعب بينا بنك الحظ ؟؟؟ مش دا اللى الله يجحمه العادلى كان فاتح ليه امن الدولة و الشرطة علشان يغرقنا حنية ؟؟؟
يعنى ابوة طلع يقولنا ما عنديش وحارفع عليكم قواضى ... و الحيلة بيقول غوغاء .. ناقص الست بقى .... ياترى حتطلعنا ايه ؟؟؟

طالع يشتمنا و يقول غوغاء ؟؟ انا غوغائية وافتخر  ... طالما المحترمين محدش بيجيب ليهم حق...و سكة العدل مش جايبة نتيجة ...
خلاص نمشى فى سكة الغوغاء .. وخليها حريقة بقى ....نولع فى السجن ... ونروح على شرم ونقول ان حسنى اسلم و حابسينه هناك ...وانا عايز اخويا حوسنى ... اديها ولعة ...خلى شرم تلالى بيه ....


وبعدين هو ليه محدش طلع من اى حته يعلق ولا يقول اى حاجة ؟؟؟ هما اللى ماتوا دول ايه ؟؟ متطوعين مثلا ؟؟؟
ليه محدش طلع من القضاء يقول ولو بالكذب ان مفيش تلاعب ؟؟؟ ولا هما متعودين بقى ولا ايه ؟؟
هو الغوغاء بيجبروا القضاء على تسجيل الجلسات ؟؟ بيجبروهم تحت تهديد السلاح على نقل القضايا اللى العين عليها الى دوائر تانية ؟؟ بيجبروا القضاه على احكام معينة بالرغم من ان القضاة عارفين الفيلم ايه ؟؟..دا ايه الغوغاء المستوردين دول ...على كدة بقى القذافى ممكن يبعت يستلف مننا شوي غوغاء يخلص بيهم الليلة ...

هما برضة الغوغاء اللى مصممين ان المستشار عادل عبد السلام جمعه ... اللى اتقال فية ما فى الخمر شهور وشهور ..انه يفضل ماسك قضية الملعون الظالم بالرغم من كل اللى اتقال ؟؟؟ يعنى محدش فكر ينحية مثلا او انه يرد كل الاتهامات دى ؟؟ ولا مش مهم خليهم يقولوا ؟؟ هما برضة الغوغاء اللى رتبوا لمحاكمات تفضل شغالة شهر ونص و بعدين فجأة كدة ..سبحان الله يكتشفوا ان فيه قرابة بين القاضى وحد تانى فتتغير الهيئة القضائية اللى ماسكة الفيلم ....واضح ان كان عندهم مشكلة فى الشجرة ...

مش كفاية الكمد و الحسرة كل يوم وكل ساعة و احنا بنشوف افلام حمضانه ...قال ايه محاكمات على توافه .. وكلام هايف ... والمفروض اننا نصدق انها عادلة ... وهى العدل منها براء ...ايه شعور اهل شهيد لما ابنهم يروح فى سبيل الكرامة وهما كرامتهم كل يوم بيتداس عليها ؟؟ ولا وهما مرميين بالساعات فى الشمس ممنوعين من دخول محاكمات القتلة ... اللى بيروحوا الصبح يتدلعوا فى المحكمة و بعدين يطلعوا على المكاتب يكملوا شغل ...العادلى محدش شاف طرفة الطاهر ليه ؟؟؟ولا كبيرهم الذى علمهم السحر ... ايه الافلام المقرفة دى ؟؟؟ واخرها فيلم الموسم ... السرطان ...
  فى الف واحد اتكلم فى المسألة دى ..ولا حد بيسمع ولا يشوف ...نفس القصة .. طبقة حاكمة عايشة فى بلد تانية ...
والاخر ال..................... دول طالعين يقولوا غوغاء ؟؟؟

و الناس اللى فقدت عيون و فقدت البصر ؟؟ فقدوهم ليه ؟؟ في سبيل ايه ؟؟.. تغيير ... زهق ...الناس اللى اصيبت بعاهات ولسة مش لاقيين علاج ولا عارفين لهم عدد ... الناس دى غوغاء اشقياء يستاهلوا التعوير ؟؟

انا فعلا دمى محروق جدا ...حزينة جدا جدا ...على ايام سوداء كتير .... حرام والله العظيم حرام ...
 وحاسة ان الناس اللى ماتت دى ماتت بلاش ....كانوا عايشين مالهمش ثمن فى سوق الكبار .. ولما ماتو بشرف ..ماتوا من غير ثمن برضة ...و اللى قتلهم ...بيرفع لنا كاسة و بيشرب فى صحته ...انتصارا على الغوغاء الرعاع ...

ودلوقتى بس ابتديت افهم اللى بيحصل ...
شوية غوغاء كدة مالهمش اى تلاتين لازمة وماتوا ... ايه يعنى .. وبدل ما الباقى يقرفونا بقى اديهم مسكن ..ماهم ما بيفهموش واى حاجة حيبلعوها ...

حسبى الله ونعم الوكيل ... حسبى الله ونعم الوكيل ....

دا لينك الجزء اللى قرا فية ا- محمود اجزاء من الجواب ...
http://www.youtube.com/watch?v=VVaIepiIt2M&feature=related

ودا لينك خطاب بعته الدكتور - خالد ابو بكر ..بعته الى ا - حسن نافعة فى جريدة المصرى اليوم ...
عن مهازل عدالة القضاء ...اللى بتحاكم قتلة الشهداء ...بعنوان  "كلاكيت تانى مرة: مهزلة محاكمة قتلة أبنائنا  "

 http://www.almasryalyoum.com/node/471876



الصندوق الاسود ....

انا كتبت قبل كدة عن موضوع حسين سالم و نشرة الانتربول ...وقلت انه لازم يغير اللون الاحمر دة .....

و الحقيقة ...لما ظهر خبر  القبض على حسين سالم فى اسبانيا ....ما فرحتش خالص ....ممكن اكون تشائمية نكدية مندسة ...
كل شىء ممكن ....بس كمان لانى مش فاهمة ازاى مستر سالم استخبى عن عينين الانتربول اربع شهور ؟؟؟ دى لازم يدرسوها فى علوم المخابرات ...
دا على راى اللى وصفة ...دولة متحركة ....و بعدين باقى الخبر اللى بياكد على انها تمثيلية ...اتقبض علية فى فيلته فى منتجع مايوركا  باسبانيا ....يعنى موجود داخل دولة مش برة الكرة الارضية ...ايه بقى المفرح فى خبر زى دة ؟؟؟
مش فاهمة الصراحة خالص ...فهمى ساعات كدة بيقف ....واضح ان الانتربول دة مش شريف ابدا ...استغفر الله العظيم ....

و ابتدت بقى باقى حلقات التمثيلية البوليسية لرجل المستحيل تهل علينا ....

اصلا اصلا اللى لفت النظر ليه ...و كشف وجودة فى اسبانيا ...هى التحويلات المالية الضخمة جدا بملايين اليوروهات بينة و بين شريكة اللى اعتقد انه تركى ....التحويلات المالية مش نشرة الانتربول الحمراء الفاقع لونها .....الفلوس  هى اللى خلت الحكومة تقبض عليه لانه اخل بقوانينها ....
طيب ....هو ازاى بقى دخل البلد و المفروض ان الانتربول موزعين نشرة باسمة على كل الدول ؟؟؟ يعنى لو ماكانش التحويل اتعمل كان حيفضل للابد مفقود ؟؟؟...اسبانيا ما تعرفش انه على اراضيها ؟؟ طيارته الخاصة محدش شافها و هى داخلة الاجواء الاسبانية ؟؟؟ يمكن لانها خاصة وصغننه اتعاملت معاملة الناموس ؟؟؟ غير مرئى على الرادار  ...
هى المخابرات الاسبانية اتجوزت و قعدت فى البيت ؟؟؟ ما سمعناش على الفرح يعنى ...
يمكن لان اسمة بالاسبانى مختلف عن اسمه بالعربى مثلا ؟؟ فالاسم "  حسين " فى جواز السفر الاسبانى مكتوب بالاسبانية و شكله  غير " حسين"  بالعربى ؟؟
يمكن دخلها وهو متخفى  باسم السينيور حسين  و بالتالى محدش عرفة ؟؟؟ او ممكن كهربة المطار و الجوازات كانت قاطعة فى اليوم اللى دخل فيه اسبانيا ؟؟؟...ماهو رجل المستحيل بقى ...

اسبانيا بتحاكمة بتهمة غسيل الاموال و فرضت علية ثانى اكبر كفالة فى تاريخها ...حاجة و تلاتين مليون يورو فى قضيتين دفع منهم فى القضية الاولى 27 مليون يورو ....و لسة الثانية ....دفع ... يعنى معاه غير اللى اتمسك عنده فى البيت 32 مليون يورو ...و اللى اتجمد فى البنوك الاسبانية حوالى 14 مليون يورو ...دفع 27 كفالة ...
و بعدين باعتبار انه مواطن يحمل الجنسية الاسبانية ...مش المفروض ان يكون معاه جنسية اخرى لان القوانين الاسبانية تحظر ازدواج الجنسية ....و دى ممكن تبقى القضية الثالثة لان السلطات هنا اثبتت بالدليل انه من عام 2005 وهو داخل و خارج بالجواز المصرى ...يعنى كذب على السلطات الاسبانية ...قضية جديدة ...

ولسة بقى ...حييجى ..لا مش حييجى ...حييجى ...لا مش حييجى ...

اناعايزة اسال ...واذا جه ؟؟ ايه اللى حيحصل ؟؟ متخيلين ان واحد زى دة حنعرف ناخد منه اى حق ولا باطل ؟؟
دا ننوس عين اسرائيل و دى حاجة معروفة يعنى ...و بعدين لية مع كل مسئول كبير ثقيل الوزن كرامة ...يبقى متوقعين ايه ؟؟
اذا كان المخلوع كبير الحرامية ... قاعد ملك زمانه 24 قيراط .... باين هو اللى خلع الشعب ورماه  فى الشارع ....ولا حناخد منه لا حق شهيد ولا حقنا ...
طلع علينا يعرفنا اننا شعب قليل الادب .. بنفترى عليه وهو مش حيسيبنا و حيرفع علينا قضايا لاننا بنشنع علية و بنجيب سيرتة العطرة ...و المحامى الديب اللى حسبى الله ونعم الوكيل فيه ...طالع يقول ان موكلة شريف العتبة ما حيلتوش و كل اللى اتقال كدب ... والنبى كدب ...
و العادلى اللى حسبى الله ونعم الوكيل فيه ...منه لله ...شوف محاكمتة الماسخة و اقرا عن المهازل اللى حاصلة ... البيه بيدلع اخر حاجة .. واهالى الشهداء ممنوعين من حضور الجلسات و بيقفوا برة بالساعات ...و ربنا بيرحمهم من رؤية سحنته الكريمة ( ودا لانها خلقة ربنا فهى كريمة مش لانها سحنته  ) ...بالرغم من انه حقهم ...و كتاب الله حقهم ...

طبعا .. اكيد اى فلوس حسين دة  بيصرفها عنده قدها تلال و جبال ...من دمنا ...و الاكيد ان القبض علية مترتب له .. ومعمول حساب كل حاجة ....لانها سياسة و مصالح دول ... وناس كبيرة لازم تدارى على شمعتها ...و شخصيات من وارء الكاميرا بتحافظ على خط سير الفيلم ...
ماهو زى حسين سالم دة رشيد محمد رشيد ..اللى فى اخبار انه بيشتغل مستشار فى قطر !!!! او مثلا يوسف اللى مش غالى ( لولا ان الصفة ستنعكس على الاسم يوسف كنت قلت حاجة تانية بس احترام للاسم ) اللى هايص فى لبنان و مش هامة اى حاجة و سلملى على النشرة الحمرا ...هما دول كمان حيتقبض عليهم فجأة ..  بس لما ييجى وقت الحبكة الدرامية .. وتتصاعد الاحداث ...و المفروض ساعتها كمتفرجين اننا نندهش و نتفاجىء ... هما لقوهم فين ؟؟؟ يا سبحان الله ...
اما بقى الشعب الغلبان اللى اتسرق قوتة و اتحرم و عاش عيشة الميتين بيدعوا له بالخلاص منها ....مش مهم .. ارسم اى حوار .. و الممثلين ببلاش ...

بيقولوا ان حسين سالم هو الصندوق الاسود اللى كل الاسرار فيه ....

بس انا شايفة ان الصندوق الاسود مش حسين سالم ...مصر هى اللى تحولت الى صندوق ملىء بالاسرار و الاعاجيب ...
ملىء بالقصص و حكايات الدراما و الكوميديا السوداء ...و اسود ..لاان مع كل اللى بيطلع و يكتشف .. بيضيع حقنا اكتر و اكتر ...و بنتظلم كمان وكمان ...
قد ايه احساس الظلم دا احساس اسود ...ازاى ما تقدرش تاخد حقك من اللى سرقك وظلمك ...ازاى احنا مش مهم نموت ونترمى بدون حتى ما ندفن ..علشان ناس تانية مصلحتها حكمت بكدة  ...ازاى ناس سرقتنا طول سنين طويلة وقتلتنا الاف المرات ...ودلوقتى بيكملوا علينا و بيطلعوا لنا لسانهم و بيقولوا لنا ولا حتقدروا تعملوا حاجة  ...

دعوه المظلوم مفيش بينها و بين الله حجاب ....و مسيرة فى يوم اسود غطيس على كل ظالم ...تترد لنا  المظالم ....

علمنى شكرا

احيانا ..و بالرغم من كل السلبيات اللى حواليا ...بلاقى ساعات كدة اشارات بتقول ان لسة فى امل ....
بس فى ساعات اكتر الاشارات دى بتقطع نور !!!!


امام مكتبة الاسكندرية .... كان فى "  u-turne "  عبقرى كالعادة ....و اللى رسمه و نفذة لازم يدخل موسوعة جينيز " فرع من فروع جينس ريكوردز بس للى .... !!!!! " و الحقيقة اللى كمان لازم يدخلها المهندس العبقرى الفريد من نوعة اللى عمل ارتفاع الارصفة 50 سم بغض النظر عن مكانها ...
يعنى مثلا افهم ان الرصيف لازم يكون عالى على البحر مثلا ...علشان السيارات ما تطلعش فوق الرصيف و هو امر طبيعى ووارد ...
لكن ان ارتفاع الرصيف يكون كدة فى شارع ضيق فيجعلة اكثر ضيقا ..؟!! و لانه شارع ضيق بيكون الرصيف اصلا مش موجود يعنى عرض الرصيف المزعوم انه رصيف بيكون نصف بلاطة مثلا من البلاط المربع بتاع الرصفان القديم ... مش السيراميك العجيب المتركب دلوقتى .....الحقيقة دا اللى مش مفهوم ابدا ...خاصة بقى و انت داخل و خارج من الشوارع دى ...لان مدخل الشارع ضاق ولازم تتفادى الرصيف العالى اللى طبعا اكيد و قطعا حيسيب اثر عميق فى عتبات سيارتك بالاضافة الى ان الشارع ....ودا اكيد بنسبة 90%  ...حيكون فية سيارات راكنة من اولة لاخرة ...و بالتالى الاثار على سيارتك حتكون محتاجة مجلس الاثار لترميمها !!!


كمان كان فى الــ " u-turne " الاعجب و الاغرب اللى قدام معرض كوتة و المسرح ...
 للى مش من اسكندرية ...و انت متجهة الى وسط البلد  " اتجاة محطة الرمل من على البحر " .. و عايز تدخل شارع سوتر او شارع بورسعيد حتاخد " u-turne " شمال ... وتقطع الطريق على اللى جاى طوالى من الاتجاة الاخر لانك لازم تاخد يمين لدخول الشارع ...يعنى يمين زاوية حادة ...


المهم انه و لله الحمد فى احد الايام المباركة ...تم تعديل الجزيرة الاولى اللى قدام المكتبة ...طبعا دا شىء عظيم اشكر علية العبقرى الحقيقى اللى انتبه و عدلها ...
و تم تركيب اشارة مرور جديدة على اول شارع سوتر من ناحية البحر  ...فيها عداد تنازلى كبيييير ....الوانه زاهية جدا ...
و لما العداد بيوصل للصفر بيغير الاشارة ...
و تم تركيب اشارة زيها فى سان ستيفانوا امام المول ...و  الحمد لله ...انه انعم علينا بحد بيدرك خطورة المنطقة دى و يرحم الناس من الموت كل يوم دهسا على الاسفلت .. نظرا لان منطقة مول  سان ستيفانو مزدحمة دايما ...


اللى مش فاهماة بقى ....ان فى الاشارتين دول فى لجنة مرور تحتهم !!!!
ليه ؟؟ مش عارفة ...ولان الموضوع ده مضايقنى جدا ...قررت فى يوم انى اجرب بنفسى ....ههههههههههههه
اه والله ....اجرب اشارة المرور !!!! مش مصر بتتغير ؟؟؟ .. وانا كمان !!!!...عادى يعنى الواحد ممكن يجرب يعدى فى اشارة مرور...و يا تعدى  يا اما تـداس .....


جربت الاشارة اللى فى سان ستيفانوا ...عساكر مرور على الناحيتين ........... قوم ايه اللى حصل يا اولاد ؟؟؟
لقيت ان الناس اللى على الرصيف مستنيين الاشارة لما تغير ...ولما غيرت ...السيارات اللى جاية ما وقفتش الا لما عساكر المرور من الناحيتين و قفوهم و عدينا !!!!!!!!!!!!! ( نفس السلوك فى اشارة سوتر ) ...
مش عارفة هى اشارة المرور اتغيرت مع مصر اللى بتتغير ولا ايه ؟؟؟هه ؟؟ محدش قالنا يعنى ....
انا اصلى تعليم قديم.... اعرف ان الاشارة الحمرا يعنى " قف "   و الصفراء  " استعد "    و الخضراء  " انطلق " ....
ليه بقى لازم العسكرى يقف فى نصف الشارع علشان السيارات اللى جاية تقف ؟؟؟كل الاشارة الكبيرة دى مش شايفينها ؟؟؟
مش عاجبهم الالوان مثلا ؟؟؟...
وبعدين اللى لاحظته ( فى اشارة سان ستيفانو )  ان السيارات جاية بسرعتها و هدت فجأة علشان تقف علشان حضراتنا نعدى ....
وفى عربيات فعلا ما لحقتش تقف وكملت ....ما اقدرش الومهم ....
ليه ؟؟ لانك كسائق مفيش اى يافطة من على بعد تحذرك ان على بعد كذا متر فى عبور مشاة او  هدى السرعة لان فى عبور مشاة ..مثلا يعنى ....
افرض واحد ما لحقش يهدى قبل خطوط المشاة ؟؟؟ ايه اللى ممكن يحصل ؟؟


وبعدين هو ليه الناس لما بتسافر برة بتلتزم بكل الاشارات و الالوان و كل التعليمات ؟؟؟ وهى هى نفس الناس هنا لازم يكون فى شرطى المرور علشان يحترم الاشارة اللى الوانها باينة من الطيارة  ويقف لما تقلب احمر ؟؟؟؟


دا معناه اننا مش جهلة ولا متخلفين ...لا احنا عندنا الوعى اللازم بالالتزام  .. بس هنا ... فى الوطن دة ... مش عارفين نستعملة ازاى ....و بالتالى ....
محتاجين تشغيل خدمة علمنى شكرا ...لتعليم المواطن كيفية تشغيل خدمة الالتزام و تطبيق القواعد ...وشكرا !!!

القتل الرحيم

من اول ما بدأ مسلسل الارتجاف الاذينى لدى لمخلوع  واحنا بنشهد سلسة من التطورات الدرامية اللى لازم تاخد جايزة البوليتزر فى الادب ....
فى الاول طلع مصدر طبى بيؤكد ان المخلوع مش مريض بالسرطان و سرطان القولون تحديدا  ....طبعا محدش عارف مين المصدر دة ... مع انه غالبا حيكون ابو لفافة ...

مع ان كل المصريين عارفين انه مريض بالسرطان و انه راح المانيا يتعالج من السرطان و انها مش استئصال للمرارة ...هما باينهم ناسيين ان من كتر ما الامراض هرت المصريين وان مفيش مرض معروف ولا مش معروف غير لما عدى عليهم و رمى اجدع سلامات .... و من كتر ما العلاج بقى زى الاكل و الشرب و ساعات بيقضوها بدون علاج خالص ... ماهى الامراض بقت امراض صديقة .... حتى الامراض حنت علينا  ....و الشعب بقى كله دكاترة من كتر ما بيروحوا لاطباء و بيقعدوا مع بعض برة اكتر ما بيقعدوا مع الدكتور ... المهم ...
هماعارفين تماما الفرق بين استصال المرارة و السرطان ....هو فى حد بيستأصل مرارة يروح المانيا   و بعدين يقعد شهر ولا اتنين ؟؟؟ ليه ؟؟ مرارة جملى ؟؟  و بعدين اللى بيعمل المرارة اسبوع واحد و بيمشى زى ال...... مش بيقعد نقاهة اسابيع ...وبعدها بيبقى انسان طبيعى جدا ... مش خاسس النص ووشة مفيش  وعينية مفتوحة بالعافية  ...شكلة بينطق  باقسى اشكال الاجهاد اللى معروف كويس جدا من ايه و بالتحديد .......
و بعدييين ...
 دخلنا بقى فى موال القلب ليه احكام ....مرة ارتجاف و مرة مش عارف ايه ...و الحالة النفسية اللى بسوستة طالعة نازلة ....
انا قلت قبل كدة ...و حافضل اقول ....دا فيلم ماسخ قديم ... هو مش حيتنقل الى السجن ... ولا اعتقد ان فى 3-8 حتحصل محاكمة عادلة خالص ...ولا هو حيسيب شرم ابدا ابدا .....ممكن تتعمل مسرحية ...او محاكمة بالفيديو كونفرانس مثلا ... ماهى ثورة تكنولوجية بقى  !!!!
مش حيتعتع من شارم لان الداخلية مش عارف تأمن ...ومش ممكن تأمن ....انما اللى حيجننى و سبحان الله ...بتأمن محاكمات الظلمة كويس جدا و المنطقة بتتقفل و القاعة و كل الناس بتتمنع من الدخول ...سبحان الله ...يمكن دى اقدام ؟؟؟
قدم بتتأمن كدة ربانى و قدم شمال معاكسة ؟؟ ممكن ...و لة فى خلقة شئون ....
ولا مستشفى طرة اللى سايقة العوج و مش عايز تجهز ....مش عارفة امال لو بيجهزوا  له اوضة فى برج دبى كانوا عملوا ايه ؟؟؟
كام واحد ماتوا فى الزنازين لان الزبانية معالجهوش ؟؟؟ كام واحد مات و اندفن فى اى حتة صحرا ولا رموا جثته فى اى حفرة عن طريق امن الدولة ؟؟؟  كام مسجون قعد سنين فى الزنزانه ما خرجش منها ولا شاف شمس ربنا ؟؟؟ كام واحد مات من التعذيب ولا من منع دخول الدواء ليه ؟؟؟ كام سجين سنة كبيرة فوق الستين و السبعين ؟؟؟
و بعدين ايه الحالة الشنيعة قوى اللى مخليا المستشفى مش جاهزة لاستقبال حالته ؟؟؟ ماهو زى القرد  فى القفص ما ماتش يعنى ولا روحة طلعت...  ولا هى الداخلية عارفة تأمن شارم بس   ؟؟؟ مش مهم اشوفة فى السجن على فكرة و مش عايزة اشوف وشة اصلا ...بس بلاش الاعلانات و الافلام اللى مالهاش لازمة دى ...
 ايه يعنى ما حد يفهمنا الاستفزاز دا اخرته ايه ؟؟؟ انا مش عارفة اى ام ولا اب ولا اخ... لشهيد ولا مصاب ولا حد اختفى ولا اتعذب فى قمع الدولة ممكن يكون شعورهم ايه ...الله يكون فى عونهم ...انا شخصيا مش شايفة و لا حاسة ان فى عدل ابدا ...و باقول يارب انت العدل و انت الحكم ...


وبعد الجرعات اليومية المركزة من اخبارة و التركيز على حالتة  ....دخلنا فى موال الست ...و رجع المخلوع خطوة لورا ....
الست عيانة ... الست تعبانه ...ظغطها عالى ..حنعمل قسطرة ... لا مش حنعمل ...و بعدين راح لها الكسب غير المشروع طلعت بريئة ومحدش سمع حاجة عنها تانى ابدا .......
 ومن ساعتها ولا حس ولا خبر لاعنها و لا عن المخلوع ....


فجأتن ...كدة من غير احم ....


من يومين كدة طلع علينا المحامى " الفريد " من نوعة " الديب " فى سلوكة .....اسم على مسمى ...
 يقولنا ان المخلوع عنده سرطان المعدة و بينتشر ..و اخبار تانية عن انهم عايزين يجيبوله الدكتور الالمانى اللى عمل له العملية قبل كدة علشان يتابع حالتة .....الحقيقة ما فهمتش المطلوب ايه يعنى ....عنده سرطان ....ثم ؟؟؟
يكنش الارتجاف قلب بسرطان ؟؟ هم فجأتن ..  فجأتن كدة طلع لهم السرطان من ورا الباب ؟؟
يعنى  هم على مدار اربع شهور محدش عمل له تحاليل ؟؟ محدش فلاه من جميع النواحى ؟؟؟  يعنى الدكاترة اللى قاعدين جنبه مراقبين النفس ... و كل شوية يقاطعوا التحقيقات علشان المسكين يرتاح شوية من التعذيب .....السرطان دا ظهر لهم  بالصدفة ؟؟؟ طلع له كالوا لقوة سرطان مثلا ؟؟ ولا هو كان مخبى عليهم الحقيقة المرة ؟؟؟ بيضحى لاخر نفس ....اصيل والله ...
و بعدين حيجيبوا دكتور من بلاد برة ...و هو اللى عالجة قبل كدة ...زى ما بيقولوا يعنى ...على اساس ان محدش مننا كان يعرف قبل كدة الدكتور دة و لا عمر حد شافة ... بس ماشى ...حنصدق ان هو دة ...
طيب ...
هو دا مش اعتراف واضح و صريح و ضمنى منهم انه كان عنده سرطان قبل كدة ؟؟؟وانه كان بيتعالج منه و انه عايز نفس  الدكتور يتابع الحالة و تطوراتها ؟؟؟ فين بقى المصدر الطبى اللى نفى ؟؟؟؟ حيقولوا انه مش فى القولون ؟؟ ماشى بس سرطان ....عنده سرطان يعنى مجاش فجأة ....يعنى عارفين من اربع شهور ان عنده سرطان ...و اكيد بيتعالج منه يعنى مش مهمل العلاج و بيكمل اللى بدأه قبل كدة ....كانوا مخبيين ليه ؟؟ ولا كل خبر بيطلع فى وقته علشان حبكة الفيلم ؟؟؟ لا وايه ...دا سرطان فى المعده و بينتشر ...يعنى محدش يقول بقى انه لا يمنع من الحركة و لا يمنع من المثول امام القضاء ....ساعتها ممكن الشعب المصرى يترفع علية قضية من حقوق الانسان برة و جوة ...ويطلع مفترى و ماعندوش قلب ....شعب عجيب والله ... هو فى كدة ابدا !!!!
يعنى طلعناه حرامى و سارقنا ...و الراجل الاصيل ما رفعش علينا دعاوى قضائية زى ماقال ...وقال خلاص بقى شعب و غلط ... حنعمل ايه ..واحنا مافيش فايدة فينا ...


و باعتبار بقى ان عندنا ثقوب فى الضمير .. وعلى طول مش عاجبنا العجب ...اكيد الدكتور دة طبعاااا حيقول ان صحتة بسلامتة خطييييييييييرة و مشششششششششششش ممممممكن ابدااااااا يتنقل من مكانه .....ولا ممكنننن تعريضة لاى محاكمة من اى نوع .....ساعتها احنا بقى كشعب مزعج المفروض بقى حنقول ايه ؟؟؟ الراجل اجندة المانية مثلا ؟؟؟ فلول مستورد؟؟؟
ولا ملامحة بتقول انه عميل ومندس فى شكل طبيب ؟؟؟ او ممكن يكون صاحب الواد الجاسوس وجاى يطمن عليه مثلا ...كل شىء جايز ...عملاء زى بعض بقى و الدم بيحن ......


ايه يعنى ....سيناريو جديد ؟؟ و طبعا ... اكيد ...و فى كل الاحوال ....مستشفى طرة حجرية و ماتنفعش لاستقبال حالات سرطان المعدة المنتشر لاعضاء اخرى ....و على المتضرر اللجوء الى شرم الشيخ هوسبيتال ....
ماهو بعد ما كل الشعب دور على الارتجاف الاذينى دا يطلع ايه و الدكاترة اللى زى الرز و زى الفل قالوا انه حاجة عادية عند 80% من الشعب اللى فوق الستين و السبعين و ان الحالة دى لا تمنع المريض من ممارسة حياته العادية مع شوية ادوية و خلاص ....كان لازم نجيب سبب قوى ...سبب ما تكونش المستشفى جاهزة له و سبب علشان نجدد بيه نغمة "" الراجل على فراش الموت ... خلاص بقى ...صحتة مش حتستحمل المحاكمة و البهدلة... الحق حالته اتدهورت ....دخل غيبوبة ... """


انا شفت على " CNN "  تقرير عن الموضوع ده و فى النهاية تساؤل عن مدى ملائمة الحالة الصحية للرئيس السابق للمثول امام المحكمة .....
ااااااه ....يعنى هو الحكاية كدة .... الحالة الصحية المتدهورة مش حتخليه قادر يحضر محاكمات ...
ماشى ...احنا بقى نلغى اسم شارم الشيخ دا خالص ... ونخليها بلد المخلوع ...و نمشى الناس اللى فيها ...و نخليها  لة بقى مخصوص ...منتجع يريح اعصابة ...اصل الحالة النفسية للمريض مهمة برضة فى العلاج .....
اما بقى احنا كشعب شرب المر ...و شاف ايام حسبى الله ونعم الوكيل فى اللى اتسبب فيها ...مش مهم ...احنا بس مش فاهمين ...


اذا كان مريض ...ربنا يشفيه ...و مش المقصود ابدا و العياذ بالله الاستهزاء بالمرض او التقليل من شان المريض ...ربنا يشفى كل مريض و يعفى عنه ...
ولا الهدف انه لازم لازم يدخل الزنزانة ... بس هو مسئول مسئوليه اولى ...و ارتكب خيانه عظمى ....ولازم يتحاكم و يتعاقب على الافعال اللى ارتكبها ...مش زعلانه انه لازق فى شرم ...خليه هناك ...انا متأكدة ان تراب القاهرة مش عايزة ولا عايز يشيله  تانى ....

بس احساسى بانه يتم  التقليل من قيمتى كانسانة ممكن اكون بافكر ساعات كدة يعنى ...واستهبالى و معاملتى على انى مختلة عقليا ..لان حتى المعاقين ذهنيا بيفهموا و بيحسوا ...لكن المختل عقليا كل موازينة  بتلعب على محاور... زى حالنا دلوقتى ....لو طلع حد و قال ببساطة كدة انه مش حيتحاكم ... اشرف لى 100 مرة من الاحساس دة ...انه بيتم استغبائى ...ونفس المنطق القديم ...محدش منهم فاهم حاجة ...هما عارفين حاجة ...حط لهم اى فيلم يتلهوا فيه وخلاص و يحلوا عنا ....
النغمة اللى بيلعبوا عليها طول الوقت ...العواطف ...النغمة اللى دايما بتفكرنا بسنة ...و المرض اللى كل يوم يزيد ...و الحالة الصحية ... المفروض يعنى يصعب علينا ونقول خلاص ولا ايه ؟؟ واحنا ما صعباش عليه ؟؟؟ الناس اللى غرقت فى العبارة و اترمت بقاياها فى حتة ارض  وخلاص ... ما صعبوش عليه ؟؟راح لفريق الكورة يطمن على التدريبات و ما راحش يشوف الكارثة دى ؟؟؟ عمل ايه لما ممدوح سالم ساب مصر بالرغم من قرار منع سفرة ؟؟؟ عمل ايه لما عرف انه عايش مبسوط 100 قراط فى لندن ؟؟؟ الطيارة الرئاسية تروح و تيجى كانها تاكسي تجيب و تودى شخص واحد ولا حتى فاضية ...و ما فكرش  يطلع بيها مرة واحدة يشوف اهالى لـ1400 واحد بيغرقوا ؟؟؟ ما فكرش ياخدها و يروح يشوف موضوع طيارة شرم الشيخ اللى وقعت جنبة و الناس اللى ماتت ؟؟ هما مش مصريين و من اولادة ؟؟ ماشافش الدول التانية عملت ايه لمواطنيها اللى راحوا ضحايا ؟؟
حد فكر ان اللى بيحصل دا ممكن يكون بيموت ناس؟؟ اى ام ولا اب لشهيد اكيد الاخبار دى موت بطىء ليهم ...اى واحد دخل امن الدولة و اتعامل هناك زى ما كان بيوعدنا فى كل خطاب ..." امن المواطن و كرامته "" ...اكيد لما بيشوف المحاكمات الغريبة دى بيموت موت بطىء ...

ماهو العادلى بيتحاكم محاكمات هزلية على قضايا هزلية ... ومحدش شاف طرف البدلة الزرقا ولا ظهر فى اى حتة مع انه سبحان الله بيروح و بييجى من المحاكم ... حاسة ان كل اللى بيحصل جزء من تمثيلية هما متفقين عليها ... حتدخل السجن شوية لغاية ما الامور تهدا وخلاص بعد كدة ... حنشوف صرفة ...وماشى اهو بيتحاكم قدام الناس علشان يهدوا وخلاص ...
ماننساش فى اول ما اتسجن ..طلع علينا محاميه و محامى احمد عز بيحذروا من ان موكليهم ممكن يتم قتلهم داخل السجن و تصويرها على انها خناقة ولا انتحار ...يعنى ايه ؟؟؟ واضح جدا ....
اولا مبرر للاجراءات الامنية الغير مسبوقة و عدم ظهور الاتنين بعد اول صور ليهم بالبدل البيضاء ...و بعد كدة محدش شافهم خالص ليه ما اعرفش ...
ثانيا ممكن تكون رساله لباقى الشلة و للكبار اللى برة انهم مش حيبقوا كبش فدا و بالتالى كل واحد يلم الدور و يلعب عدل ... بدل ما  الملايات اللى بيدارو بيها الوزراء اللى رايحين الكسب غير المشروع  تتفرش لهم ....

وسؤال بقى كدة بمناسبة القضايا و المحاكم ...هو ليه القضاة اللى ثبت انهم جزء اصيل من النظام وكانوا بيحكموا طبقا لقوانين النظام ... و القضايا اللى بيحددها النظام ...
وما اعترضوش على تصنت النظام على جلساتهم ... و .... و.... و....
هو ليه الناس دى محدش سمع عنهم اى حاجة ؟؟ مع ان فى تحقيقات اتنشرت فى المواضيع دى ؟؟؟يعنى مثلا لو مش صحيحة اتصور ان اى قاضى منهم مش حيسكت و الدنيا حتقوم علشان هيبة القضاه .....سؤال برىء !!!

بقالهم 30 سنة بيقتلونا بوحشية ....و بعد الثورة اتغيروا مع مصر  اللى بتتغير ....ودلوقتى بيقتلونا قتل رحيم ....


 اللهم اجعل ثارنا على من ظلمنا ....

مطلوب متطوعين

انوشكا كارولين ... اللى بقالنا شهور بنسمع عنها .. الزوجة الالمانية للى مش عادلى .. انا شخصيا قريت بعنيا دول انها كانت مدربة فى نفس النادى اللى منه لله كان بيروحة و انهم متزوجين بس مش موثقين العقد فى السفارة  او حاجة زى كدة ....وان دا لانه مخبى فلوس باسمها و بالتالى ممكن يقول مش بتاعتى ...

و الست تم استدعائها امام الكسب غير المشروع .. اللى مشكورا وضح لنا انها مش مراته و لا تعرف عنه حاجة  وان اسمها ما طلعش اونشكا خااالص !!!!!! و سلملى على تحقيقات النيابة !!

طبعا دا بيفكرنا  بايييه يا اولاد ؟؟؟

قصة الحلوة سوزى و سونة خولى الجنينة  .....  لما قعدنا نسمع حكايات الف ليلة و ليلة عن الفلوس الاكوام اكوام و حساب مكتبة الاسكندرية و الحسابات التانية اللى زى الانهار و الحسابات ذات الاصفار اللى مالهاش عدد ..... ولا القصر اللى شارياه و المقتنيات و التحف ...وبعدين سوزى تروح  الكسب غير المشروع علشان يطلع كل ده فى الهوا ...القصر مش بتاعها  و طلع بتاع جهة سيادية ( اللى هى المخابرات يعنى بس لانه سر و احنا مش عارفين بيقولوا عليها جهة سيادية ....عقبال ما يغيروا المطار السرى كمان !!!!! ) و الحسابات عددها  قليل مش كتير ولا حاجة  و بعدين قالت انهم باسم ( حرم رئيس الجمهورية ) يعنى صفتها الاعتبارية و ليست الشخصية ...حساب مكتبة الاسكندرية طلع يا حبة عينى حساب مهمل  اتسحب منة مرة واحدة و بعد كدة تاه فى زحمة المولد  ومحدش افتكرة  و مالهاش تعامل علية ولا حاجة .... و بالتالى معنديش وما اعرفش ....و بما انهم مش بتوعى خدهم ... و اتنازلت عن 24 مليون جنية كانوا فى الحسابات  و خرجت بالسلامة ... واحنا اخدنا صابونة لوكس !!

اما بقى سونة ...فدا كانت ارقامة فلورسنت ...70 مليار .. واحيانا مليارات بس من غير رقم محدد ....وناس فى دول اجنبية تقول ان عندها ليه حسابات بمئات الملايين و دول تانية تقول مليارات ... ودى دول اروبية ماعندهاش هزار فى الاخبار ...مش زى عندنا الكلام مجانا و بدون مصروفات ولا جمارك .... وبعدين لقيناه  بيطلع لنا لسانه و بيقول لنا ما عنديش و محيلتيش وايتوها منفسن  بيجيب سيرتى حارفع علية قضية !!!!!!!

وطلع بقى كلام كتيييييييييييييييييييييييييير عن مرتبة كرئيس جمهورية و مستحقاته عن النياشين و خلافة ....      

ومن اللى اتقال عن دخلة الشهرى .....انا بتسائل ...هو كان بيكمل الشهر جمعيات ولا سلف ؟؟؟

ثم طلع علينا محامي سونة الشيطانى  علشان يقولنا ان كل الكلام دة من  فشر الحاقدين و ان الشريف ابو عتبة خضراء ما حيلتوش غير ملاليم ...او ملايين ماهم الاتنين فى الحالة دى متساويين بقى !!!!

ولا فتحى سرور اللى نص الحاجات اللى اتكتبت عن ممتلكاته طلعت فشار و بدون ملح كمان ....

اما بقى مفيد شهاب فهو طلع شيخ طاهر بس كان مدكن ...راح الكسب غير المشروع طلع منه زى البفته البيضة ....ماهو الطاهر كان عايش على مرتبة و تحويشة العمر من بلاد الغربة ....منهم لله بقى المنفسنين !!!

و فاروق حسنى … الراجل طلع عايش من عرق جبينة و علشان كدة ما تجوزش لحد دلوقتى … ماكانش عارف يكون نفسة يا عينى ….

و القائمة مازالت مستمرة .....

المتطوعين بقى اللى مطلوبين مطلوبين ليه ؟؟؟

   المتطوعين مهمتهم البحث عن النيابة اللى بتعمل التحريات اللى من هذا النوع لانها مطلوبة للعدالة ....ودا لاننا ما سمعناش عن ان اى حد اتعاقب على التحريات المغلوطة دى و اللى كل يوم بتجيب لنا مفاجأه مسيلة للدموع .... وتدى للحرامية سبحة وهما خارجين من عندها ...و ممكن بعد كدة تطالب الشعب ان يعملهم مقام !!!

اذا كانت التحريات مظبوطة من الاول و الخطا خطا اعلامى لان النشر كان لاخبار غير صحيحة او غير دقيقة ...يبقى ليه محدش اتعاقب من الصحف ولا الاعلام ؟؟؟؟ ليه ما سمعناش عن ان اللى كتب عن انوشكا كارولين دى ولا قصور سوزى  تم طلبه فى النيابة العسكرية مثلا ؟؟؟ ماهو دلوقتى اى حد بيجيب سيرتهم بيروح زياره ترفيهية عندهم و ياخد قهوة مجانية ....

 زى مثلا هيكل باشا ... اللى راح الكسب غير المشروع علشان يقولهم انا ماليش دعوى سمعتهم برة بيقولوا ... روحوا اسالوهم ...

وبعدين كان فى قوائم طلعت من حسابات الصحف عن الهدايا الى تم تقديمها لشيخ المنصر و افراد العصابة …. و القوائم دى طلعت فى التلفزيون مش صحف بس …وعلى راس القائمة هدايا للبيه بــــ2.5   مليون و هدايا للست زيهم قلم و ساعة و باين شنطة ….وواحد من الوزارء باين علية مكروة واخد ساعة بحوالى 160 الف او اكتر …..هو ليه محدش شاف ولا سمع عن تحقيقات فى الاتجاه دة ؟؟

بمناسبة ايه صحيفة قومية تدى كل الهدايا دى ؟؟؟ 

بلاش …

هما مش كانوا لقوا عند الفقى فى بيته شنطة فيها 2000 جنية دهب و قال انهم للست علشان توزعهم فى مهرجان ولا حفلة و هو نسي يوصلهم لها  ؟؟؟ هل حد سال الست ؟؟؟ مين اللى يتحاسب عن نهر الفلوس دة ؟؟

او مثلا القصور الرئاسية ….اللى هى المفروض ملك للحكومة يعنى ….على قد فهمى ….

هو ليه محدش عمل جرد ولا تحفظ على القصور دى بعد الخلع ؟؟؟ لية استنينا لحد ما طلعت اخبار عن ان القصور "" اتنفضت "" و بعدين تصريحات تانية عن انها فلة شمعة منورة ؟؟؟ لا وايه بقى …عزمى كان قاعد شهرين بيمشى الشغل عادى جدا ….و طلع فى مداخلة تليفونية فى قناه فضائية يقول ان دا تكليف ّ!!!

انا قريت فى الجرنان ان القصور كانت بتتنفض من زمان … وان الصور الاصلية  بتستبدل باخرى مقلدة …و الاصلية بتسافر لصاحب نصيبها برة …وان كان فى اوض نوم باماكن سرية بتيجى و يتخبى فيها التحف و الحاجات و بعدين تسافر

الكلام دة مش عارفة لية فكرنى بلوحة زهرة الخشخاش …دار حواليها كلام كتيييير جدا وواحد مسئول اتسجن من وزارة الثقافة بسببها …و كلام كتير حوالين ان فاروق حسنى هربها للست …. ولا احد يعرف الحقيقة ….

الصورة فين …كل اللى بيتقال ده ايه …محدش عارف ..

المتطوعين عليهم كمان انهم يفهمونا …نظرا لاننا من ذوى التعليم المجانى ….

اه نسيت … فى مهمة تانية قومية للمتطوعين ….

البحث عن الاثار …اثارنا اللى احنا مش عارفين لها تاريخ

مرة زاهى بيه يقول انها اتسرقت و مرة يقولك رجعت و بخير …ومرة نقرأ  ان لسة مفيش حصر دقيق لها و مرة …لالالا فى حصر وكل حاجة و الجهود شغالة توماتيكى ….

و بعدين نلاقية سايب كل الهيصة دى و بيدور على اثارنا اللى برة …ههههههههههههه

من انتم ؟؟

الخميس 9/6 /2011

تشييع جثامين 19 شهيد و الصلاه عليهم فى مسجد السيدة نفيسة ....

الخبر دا ظهر فجأة على تويتر ... و بعدين على مواقع الاخبار ...
المنظر العام كان بيوحى لى بالفركشة التامة ....هرج و مرج لغاية ما التوابيت دخلت المسجد و الناس برة مش منتظمين ... كان واضح جدا ان مفيش حد مرتب لاى حاجة ..كالعادة ...
ودا كان طبيعى لان اللى كان بيحصل هو مسرحية كوميديا سوداء متفحمة ....ودا عادى جدا لاننا اكيد اكيد فى مصر ...



الفصل الاول :

فى برنامج بلدنا بالمصرى الاستاذة ريم ماجد كلمت واحد من ائتلاف شباب الثورة ...و كانت تساؤلاتها واضحة ...ازاى محدش رتب للحدث دة علشان يتم بشكل يليق بهيبة  الشهداء ؟؟؟
ازاى القرار دة اتاخد اصلا ؟؟؟ و ليه السرعة دى فى الدفن لية ماتمش الانتظار لليوم التالى وهو الجمعة علشان يكون عدد المصلين علهم اكبر و يكون فى وقت لتجميع عدد لائق من الناس و ترتيب الحدث ؟؟


 شاب الثورة رد عليها ان دة قرار اخذة مجلس الوزراء  يوم الاربعاء لان الجثث دى عدى عليها 4 شهور فى المشرحة و اسباب وحاجات تانية ...و انهم كانوا 24 جثة بس فى 5 جثث منهم اهاليهم اتعرفوا عليهم و اخدوهم ..... وبعدين قال انه مستغرب لان وزير الصحة كان موجود فى الاجتماع دة و مع كدة الناس لما راحت المشرحة ماكانش فى سيارات اسعاف لنقل الجثث و ان الناس هى اللى اتصرفت !!!!


الفصل الثانى :

برنامج اخر كلام للرائع يسرى فودة .... نفس الحدث المهم و اتصال بالاستاذة نائبة رئيس مصلحة الطب الشرعى ...
اللى رمت واحدة مولوتوف ملهلبة ...17 من اصل 19 مساجين و غالبا من سجن الفيوم !!!!
يعنى 17 من المجهولين دخلوا المشرحة بلبس السجن ....
 كان السؤال اللى ما يخطرش على بال حد .... سال الاستاذ يسرى سؤال المليون ...طالما مساجين ... يبقى اى مسجون ليه سجل طول بعرض ... ازاى يبقى مجهول الهوية ؟؟؟
هى طبعا بما انها مسئولة فى الدولة  ...و زى اى مسئول طبيعى فى الدولة المصرية ..... طول المكالمة كانت مصممة على اقوالها .. انهم اخذوا عينات من الجثث وتم اعادة تشريحها مرة تانية ( كتر خيرهم بصراحة كان ليه بس التعب دة )  و اخذ عينات منها وتم عمل شريحة معدنية بالبيانات لكل جثة و ضعت معاها و هما عندهم البيانات الكاملة لاى حد يتعرف عليهم بعد كدة ...

وبعدين اتصال من السيد مسئول ملف الشهداء فى رئاسة الوزراء و اللى كانت اجاباته من نوع انا مش عارفنى ....اول حاجة بدا الرد بشكل مالوش علاقة باى حاجة ..  "" يعنى نحرقهم و لا نرميهم فى النيل علشان هما مساجين "" ...بالرغم من السؤال  الموجه له مش هما ليه شهداء ,  السؤال هو ليه  هما مجهولين ...
و قال للاستاذ يسرى محدش بلغنى ليه و السيدة نائبة رئيس مصلحة الطب الشرعة مقالتليش ليه ...
ما اعرفش .... اصل اللجنة متكونة من 5 ايام بس !!!

النهاية : 

* انا مش فاهمة خالص على الاطلاق موضوع شباب الثورة دة ...
لما المجلس العسكرى حب يتحاور معاهم راح له حوالى 135 ائتلاف ...دا غير 35 تقريبا او اكتر كمان قاطعوا الحوار ...و اللى فى الحوار ...بقوا حوار ...خناق و زعيق مع بعض وعدم احترام و منظر مخزى و مشين تماما .....
و بعدين مين الناس دى ؟؟ كل الشباب اللى فى مصر ممثلين فى الائتلافات دى ؟؟ طبعا و مليون لا ...  الثورة بقت ائتلافات ...ماسورة ائتلافات و انفجرت ....

* ازاى بقى فى اى حوار ولا اى مشكلة الاقى اسمين تلاته هما اللى بيترددوا كل شوية ... فلان و فلان من ائتلاف شباب الثورة ...كل شباب مصر بقوا اسمين او تلاته ؟؟؟ الائتلافات دى ايه نظام تاسيسها ؟؟ ولا ايه اهدافها و لا بتعمل ايه اصلا ؟؟؟ غير الخناق مع الائتلافات التانية ؟؟
محدش عارف ...الناس بتاعة الائتلافات دى محترفين ظهور اعلامى ... وحضور رئاسة الوزراء ...نفس الاسامى ...عددهم على الاصابع و المفروض انهم بيمثلوا الثوار الشباب ...ممكن برضة ...يكون فهمى واقف فى اول الكوبرى !!

* شباب الثورة  اللى بينظموا المليونيات ....اللى بيشرفوا على مداخل التحرير و تامينها ايام الجمع  المرعبة زى مثلا جمعة 27/5 ....اللى نظموا اللجان الشعبية ؟؟؟ اللى نظموا المرور ....
ليه بقى محدش بيستعين بالناس دى ؟؟؟ اللى بينظم حدث زى دة و يتحمل مسئولية زى دى مش حيعرف ينظم جنازة تليق  بشهداء ؟؟؟ فى اى حد فكر يتابع شغلهم و ترتيباتهم و كيفية تنظيمهم للامور ؟؟
ليه محدش فكر من اول يوم انه يسلم ملف الشهداء و المصابين للجنة من الشباب ؟؟ اى شباب ... هات اى شباب و قولهم دى مسئوليتكم ... و كنت شوف بقى الانجاز و الدقة ...احنا دلوقتى بعد اربع شهور ...اربع شهور من الثورة و لسة عندنا توهان بالنسبة للمصابين اللى محدش سائل فيهم ...و فى 100 جمعية خيرية و اهل خير بيساعدوا فى العلاج و لسة مافيش ارقام و قاعدة بيانات ليهم ...و الدولة كتر خيرها طلعت 3 للعلاج على نفقة الدولة .... 3  !!!!!!! من اصل كام مصاب ؟؟؟  بلاش اقول الرقم ....
و المفقودين و الماسى  المبكيات....
مش عارفة مفقودين فين بس ....الداخلية دى تبعنا ولا تبع دولة الملايو ؟؟؟ محدش فكر يعمل لهم قاعدة بيانات و يدور ورا الموضوع ؟؟ محدش فكر انه يكون فى فريق عمل شبابى متخصص مالوش شغلة غير البحث وراء الاختفاء ؟؟؟
 ولا الشهداء .....دول شهداء ياعالم ...شهدااااء ... ماتوا على ترابها ....وهما بيدافعوا عن الكرامة و الادمية ...

* و المتوفيين دول ...محدش من اربع شهور فكر يسالهم من انتم ؟؟؟ محدش فكر يصورهم صور تكون واضحة علشان التعرف عليهم ؟؟ بدل ما الناس بتقول ان الجثث مزرقة و الملامح بقت صعب خالص نتيجة للتحلل  و بعدين اثار التشريح اللى باينة عليهم ....
ليه ما اتعملش ليهم ملف كامل بالصور بدل ما كل شوية افتحوا الثلاجة و الناس تبص عليهم ...لا مش هو ... خلاص اقفل الثلاجة ؟؟؟
مفيش اى احترام لاى متوفى خالص ؟؟ ايه المعاملة اللا انسانية دى ؟؟ بيتكلموا عنهم كانهم صناديق معلبات ولا كراتين فاكهة ...
محدش فكر يصورهم من اربع شهور ولو صورة بالموبيل ؟؟؟ محدش فكر يستعين بالشباب  للبحث عن هؤلاء الناس من هم و مين اهلهم ؟؟
احنا فى مجتمع القاعدة العريضة فيه شباب ...يعنى لو جبت 100 مثلا بس ...100 واحد ... حيعملوا اللى ما حدش عرف يعملة فى اربع شهور...كانوا حيغربلوا مصر بيت بيت لحد ما يلاقوا اهالى المتوفيين دول ....كان حيبقى عندنا قاعدة بيانان محترمة و تليق ....باعداد الشهداء و المصابين و المفقودين ...

* حدث زى دة ...رئاسة الوزراء قررت ضرورة سرعة دفنهم  بعد ما اكتشفوا اذ فجأتن كدة ان بقالهم اربع شهور وخلاص وصلوا لمرحلة سيئة ...لو استعانت الرئاسة بالشباب الحقيقى فى التنظيم كان الوضع حيبقى حاجة تانية خالص ...
الحقيقة الوضع كل يوم بيفكرنى اكثر و اكثر بارخبيل الحكومة ... يعنى مجموعة جزر منفصلة ...محدش منهم عارف الجزيرة التانية بتعمل ايه ...مفيش تنسيق بين اى حد و اى حد تانى ...خالص ...لا الداخلية قالت حاجة لحد ... ولا الطب الشرعى بلغ حد ...ولا السيد مسئول ملف الشهداء يعرف حاجة ...دا غير ان اللجنة اتكونت بعد 4 شهور ...و الله كتير علينا دة ...ليه بس لجنة تنبثق من اللجنة ؟؟؟ ليه التعب اصلا ؟؟ فراغ مثلا ؟؟؟
عدد اللجان قل فقرروا يرجعوة تانى للعدد المطلوب ؟؟

* الحدث دا ليس الاول من نوعه ... فى ناس تانية تم دفنهم مجهولين و منهم الشهيد المبتسم ...وقبلة و بعدة ناس كتير تقدم اهل الخير لدفنهم ....
يعنى الكومنولث عاملين لموتاهم نصب تذكارى و بييجوا كل سنة يزوروة .. ومن المزارات السياحية فى العلمين ...و دول لا ماتوا بيدافعوا عن اراضيهم ولا حقوقهم ...
و احنا شهداء ثورة عظيمة .... انحنى لها التاريخ ...بيتم دفنهم فى مقابر الصدقات ...مجهولين ...بعد ما اتسابوا شهور طويلة فى الثلاجات و المشارح ... واهاليهم ما يعرفوش هما فين ...لامتى الاهانات دى ؟؟؟ يعنى الملعون موتهم بالحيا و احنا بنموتهم الف مرة و هما اموات ...وهما ماتوا اصلا علشان احنا ناخد بحقهم ...اللى حيفضل دين فى رقبه كل واحد و حيتسال عليه بعد كدة .....

* الناس دى ماتت و اختفت و اتصابت لانهم قرروا يعيشوا بكرامة و يموتوا بكرامة ...بانسانية ... نيجى احنا بمنتهى البساطة نحرمهم من الحق دة .. وهما اموات او مصابين ... برضة المعاملة لا انسانية ولا ادمية ...المفروض ايه اللى يتعمل اكثر من كدة ؟؟؟
ثورة ....خلع نظام فاسد ....بداية جديدة تماما ...شهداء و مصابين ضحوا بكل حاجة علشان شعور طبيعى بالانسانية و الكرامة ...امتى الامور حتتغير ؟؟ امتى المعاملة دى حتختفى و نبقى زى البنى ادمين لينا قيمة و اهمية ؟؟؟ امتى بقى حيبطلوا يتعاملوا مع الامور بعدم اهتمام و غيبوبة كدة ؟؟ النظام اللى فات لما العبارة غرقت ..لم بواقى الجثث و دفنهم كلهم فى حتة ارض وخلاص ... واللى ليه حد يبقى يروح هناك وبلاش دوشة ....
واحنا دلوقتى بنعمل نفس الحاجة ...بنفس الاسلوب و الطريقة .... النظام مشى من المكان بس لسة معشش جوانا ...احنا جزء من النظام ولازم نتغير ...
امتى الانسان حتكون ليه الاهمية الاولى ...مش للبورصة ولا البنوك .. الانسان برة هو الاساس وهو كل حاجة ...لو شخص اختفى تلاقى المجتمع كلة مالوش سيرة غير اختفاؤة لحد ما يظهر له اى اثر ...واحنا شهداء ومصابين و مفقودين  ومحدش سامع حاجة ...واللى بيتسمع يكسف ....
هما الناس المسئولين دول ولا واحد فيهم ...واحد بس ...فكر يتصرف بشكل مختلف عن النظام السابق ؟؟ مش واصلهم ان فى تغيير بيحاول يحصل ؟؟ مش من هنا ولا ايه ؟؟
ايها المسئولين ...من انتم ؟؟؟ من انتم ؟؟




أعظم الثوار هو الشهيد الذى لم نتعرف عليه .. أقيموا قبر «الثائر المجهول» بجوار «الجندى المجهول» وليس فى مقابر الصدقة
جلال عامر

اليــــابـــان

طبعا لا احد  ينسى الزلزال  المدمر اللى حصل فى اليابان فى اوائل شهر مارس الماضى ...و ما تبعة من موجات تسونامى مروعة  اغرقت و كسحت اجزاء كاملة من البلاد....ثم تلاها الكارثة النووية لمفاعلات فوكوشيما ....
صور الدمار الشامل و الهائل اللى تناقلتها كل القنوات العالمية ...صور لا يمكن وصفها لمن لم يرى ....
اى مكان يصاب بكل هذة الكوارث متتالية ..لايمكن تخيل  كيف يمكن ان يستكمل مسيرتة فى اى اتجاه ...

 من الاشياء اللى لفتت نظرى جدا جدا خلال متابعتى للاحداث المأساوية دى ....
( من خلال متابعة CNN  والتى قدمت تغطية رائعة على مدار اليوم و الى اليوم متابعة كيفية سير الحياة  )
هو الهدوء العجيب اللى كان موجود لدى اليابانيين ...
كان فى لقطات من داخل المكاتب فى اثناء حدوث الزلزال ... و المبنى كله بيتراقص ... الحاجات داخل المكتب بتطير ...و الموظفين اما على مكاتبهم بيحاولوا يثبتوا الاشياء عليها او التقاط اللى بيقع او نازلين تحتها فى منتهى الهدوء....حتى الناس فى الشوارع ...قعدوا على الارض فى هدوء ...
فى كل التقارير ما شفتش حد بيجرى و لا بيصرخ ولا اى هرج ومرج ولا اى تدافع و لا تزاحم فى اى حتة ولا اى مكان ولا على اى حاجة .....
وحتى وهما بيبكوا و مذهولين من اللى حصل تلاقيهم هاديين ...
الناس فى اماكن الايواء كانوا هاديين بالرغم من الحزن .... وكان في فى كل مكان لوحات ازدحمت باعلانات للاشخاص المفقودين ....
اهاليهم بتسال عنهم و كل يوم بيلفوا على كل اماكن الايواء يمكن يلاقوا الرد ...
اماكن الايواء نفسها ...مزدحمة بس منظمة و مرتبة و  نظيييييفة جدا ....
منظمين جدا ...الطوابير كانت بالكيلومترات على اماكن توزيع الغذاء و الماء ...بس بهدوء وصبر ....و حتى اللى بيشتكى منهم بيتكلم بهدوء .. محدش خطف الميكروفون مثلا وهاتك يا شتيمة ولا صويت ....
بيانات الرئيس و رئيس الوزراء المستمرة لايضاح الوضع و التطورات ....و التصريحات الخاصة باعداد المفقودين و المتابعة الجبارة و الرائعة على مدار الساعة لاعداد المفقودين و الضحايا و كمان بيانات بالخسائر الاقتصادية الفعلية و المحتملة
خاصة فى صناعة السيارات اللى بتعتبر من اهم اعمدة الاقتصاد اليابانى ...و ارقام و احصائيات فورية عن احتياطيات دول العالم من قطع الغيار و السيارات اليابانية  و المدة اللى بتغطيها الاحتياطيات دى ... عندهم ارقام و بياتنات و احصائيات لكل حاجة ... وكله فورى ...
ولا بقى المتابعة لتطورات التسرب الاشعاعى من فوكوشيما ....و فرض طوق امنى و اجلاء للسكان و منع عودتهم للاماكن السكنية  المحيطة  فى نطاق مسافات معينة حول المفاعلات ...
ومتابعة الاغذية و المحاصيل ....فى وسط كل اللى هما فى دة ... فى متابعة و تحليل دائم للاغذية و المحاصيل و التربة و قياس لنسبة الاشعاعات ....فى كل حاجة ....
 تم الاشتباه ...الاشــتبـــاه فى احد انواع اغذية الاطفال ...وفورا تم البدأ فى التحقيق و بيانات كل شوية عن تطورالموضوع و البحث عن كيف وصل الاشعاع الى هذا النوع و جاى منين و مين و....و.....و.... !!!!!!!!!!!

طبعا دا فكرنى الى حد كبير جدا باللى بيحصل عندنا !

فاكرين لما فى مكان ما على ارض المحروسة ولسبب غير معلوم للجميع ... اختلطت مياه المجارى بمياه الشرب و اصيب حوالى 400 او 500 واحد بالتيفود ؟؟  و اتحول الموضوع للقضاء ....المحافظة اتهمت المقاول اللى قال ماليش دعوى مش انا ...و القضاء العادل بتاعنا لانه عادلى  طلع كل الناس براءة !!!!!!!
بالنسبة للناس اللى اتصابت و ماكانتش لاقية تتعالج ....خليهم يغيروا جو !
و لا مثلا فضيحة المزروعات اللى تم ريها بمياه المجارى ....
دى طلعت زراعة اورجانيك بس احنا اللى مش عارفين ...اصل العلم نور ...واحنا جيل الكراءة للجميع !!!

وماذا بعد الكارثة ؟؟؟؟؟

بعد انحسار الماء فى بعض المناطق بدأت فرق الانقاذ اليابانية مع فرق من جميع انحاء العالم البحث عن احياء بين الركام و البقايا ....
مش حتكلم عن المعدات طبعا ....ولا عن السرعة فى العمل ....ولا عن التنظيم ....حتكلم عن العمل ....

و غنى عن التعريف طبعا .. اكييييد .... ان المشاهد دى فكرتنى بمشاهد المطافى بتاعتنا و هى بتحاول تنقذ الناس اللى وقعت عليهم الصخرة فى الدويقة ...!!! اشقيا اليابيانين دول ... بيقلدونا طبعا !!!

الناس دى عملت ايه بعد الكارثة ؟؟؟    اشتغلت ...
.
بعد كام اسبوع ... اليابان عملت المهرجان السنوى للزهور فى ميعادة المقرر !! اه والله ... مهرجان للورد ...
باعتبارها من اكبر الدول المصدرة للزهور بعد بلجيكا ...ما وقفوش المهرجان تضامنا مع الضحايا و لا الكارثة مثلا ...دول تضامنوا مع الضحايا بالشكل العملى اللى حينفع الجميع فى المركب ... انها تفضل ماشية ...
مش لان اليابان تقع على خط النار و حزام الزلازل ....لا ... دا لانهم عندهم جينات وراثية لادمان العمل ... و العمل ... ثم العمل ....

بعد شهر من الكارثة ...

مصانع السيارات اللى ما اصابهاش الضرر بشكل يعطل الانتاج فيها ...
 عملت ايييييييه ؟؟؟
العمال راحوا اقاموا فى المصانع ... و الادارة وفرت ليهم البطاطين  و الوجبات علشان ينتجوا و يضاعفوا الانتاج و يعوضوا اللى فات !!!! لا واييييه ... مضاعفة ساعات العمل بدووووووون مقابل .... يعنى الناس اتبرعت بساعات عمل اضافية لبناء بلدهم  و تعويض اللى فاتهم ....
الاستادات الرياضية  و الاماكن الفسيحة كلها من حدائق مثلا تم تحويلها الى مدارس لتعويض الدارسة ....
الناس اللى شغالين فى شركة الكهرباء المسئولة عن توصيل الطاقة للمفاعلات ...اشتغلوا ... ودخلوا المفاعلات و هى درجة خطورتها عالية جدا فوق حد الامان بمراحل كبيرة .. ومع ذلك دخلوا و اشتغلوا و حاربوا الوقت و الخطر علشان يوصلوالكهرباء لمراوح التبريد ....و منهم على ما اذكر 2 اصيبوا بحروق اشعاعية و حروق ....
توفير الطاقة ....كل الشركات و الجهات الحكومية و الاهلية تم تخفيض استهلاك الطاقة فيها الى الثلث ...كل اليابان .. كلها خفضت من استهلاكها للطاقة ....ازاى ؟؟؟
 تم تخفيض الاضاءة داخل المكاتب الى الثلث ...يعنى لو اللمبات اللى فى السقف عددهم ثلاثة نيون مثلا يقللوهم ....اى جهاز مش محتاجينة يتم اغلاقة ....
تم تخفيض استهلاك اجهزة التكيفات داخل الاماكن المغلقة ....اما باغلاقها و الاستعاضة عنها بالمراوح و الشبابيك او بتخفيض ساعات عملها ....
و فى المقابل ... اصحاب الشركات سمحوا للموظفين بالحضور بدون الملابس الرسمية ...بدون البدل و الكرافتات ...اى قميص او تى شيرت و بنطلون   وخلاص ...
عملوا ايه الموظفين ؟؟؟ راحوا اشتروا هدوم جديدة مفرحة و مبهجة لتشجيع اصحاب المحلات و تشجيع الصناعة وكمان علشان يكون عندهم طاقة ايجابية للعمل ساعات اطول !!!!
هدف كل الناس فى كل الاماكن و على كل المستويات هو العمل و تعويض اللى خسرناه بسبب الكارثة ....
الكلام اللى بيتقال كلام مختصر مفيد لاخذ خطوة للامام .....كلا واضح محدد ....يتضمن خطوات التنفيذ للى جاى ...التساؤلات طبعا كانت موجودة بس مش بالشكل اللى يخلى الناس تلعب عروستى ....او مثلا تبحث عن قارئة الفنجان الشهيرة و تسالها " عجلة الاقتصاد "   بتاعتها  شكلها ايه .. مثلا يعنى !!!

برضو دا بيفكرنى بحالتنا دلوقتى .....حالة من الكفتة المتبله....كل الاصناف من كل الاتجاهات متداخلة بشكل عجيب غريب فريد ...
بيانات و تصريحات مالهاش اول من اخر و كلها عكس بعض ....محدش عارف حاجة  ومحدش عارف احنا رايحين فين ولا منين ...

احنا عندنا ثورة ....بس ... ثورة ...مش كارثة بالحجم المهول دة ....و الثورة دى اتعملت علشان احنا رفضنا الوضع الماضى من فساد و انحلال ...وعملنا ثورة علشان نرجع بلدنا لينا ...و رجعناها ...ايه بقى اللى احنا فيه ده ؟؟؟ نفس الحال ...نفس اللخبطة ....نفس كل حاجة ....
ليه ؟؟؟ لان اللى بيدير دلوقتى بيدير بنفس طريقة زمان ... مفيش عندهم ثورة ...مفيش حد طلع و قال احنا كمان لازم نتغير زى ما مصر بتتغير ....نفس الاسلوب بتاع التفكير ادى الى نفس اسلوب الاداء ...مفيش استغلال لاى طاقة من اى نوع ...و بالتالى لا يوجد عمل ....لا يوجد انتاج ...لا يوجد تعويض للمفقود ...الشىء الوحيد الموجود هو الندب الدائم المستمر ...على الاقتصاد اللى اصيب بهبوط حاد و الانتاج اللى مات ...الشرطة اللى الشعب مطلقها و مش عايزة ترجع له ...
الناس طول الوقت فى التليفزيون بيزعقوا و يتخانقوا ...مليون راى و مليون اختلاف ومفيش خطة ...مفيش  تخطيط ...ولا حزم ولا حسم فى اى حاجة ...مفيش حد لا شايف حاجة و لا سامع اى حد تانى ....

طب ايه العمل ؟؟؟

قريت خبر بيقول ان الشرطة الايطاليه حتبعت لنا من عندهم كوادر تساعدنا فى داخليتنا التعبانة ...بالرغم من اننا بعد توقيع اتفاق المصالحة بين فتح وحماس بعتنا للفلسطينين من عندنا كوادر لمساعدة جهاز شرطتهم !؟؟
طبعا بما ان ضميرى ما اتغيرش مع مصر اللى بتتغير ... ولانه عايز ظبط زوايا واتزان ... اول حاجة جت فى دماغى ان اللى جايين لنا هما من  "" كبار العائلات الايطاليه "" ..مافيا يعنى ...علشان يساعدو الامن الوطنى و الشرطة كمان على خدمة الشعب و  علشان يفسحووووة  !!!!

الحل اننا نطلب من اخوانا اليابانيين .. ومافيهاش حاجة يعنى .. الجيران لبعضيها فى الزنقات اللى زى دى ...نطلب منهم يبعتوا لنا 10 انفار من نواحيهم ... فى كل مجال عندنا و فى كل وزارة ... انتداب لمدة شهرين مثلا او ثلاثة ...ياااللا ... اهم حيتفسحوا و يشوفوا الجمل و الهرم .. وطبعا التحرير ...
انا باتكلم بجد و الله ...العشرة دول حيعلمونا ازاى  نرسم الخط ...و ازاى نمشى علية ... امتى نطبطب و امتى لازم ندى  باللــ....
علشان نقدر نعمل عشر اللى هما عملوة و بيعملوه ...العشر بس حيخلينا فلة شمعة منورة ...و ممكن نعمل لهم ميدان عندنا ...و يبقى خط ميكروباص جديد ...
اليابان و اللى نازل ...
اشمعنى الشيخ زايد يعنى ؟؟؟

ذكريات حية

   النهاردة  5 يونيو .. ذكرى النكبة ...
 وطبعا اسرائيل احتفلت بيه كالعادة بمزيد ومزيد من ارواح الفلسطينين ..
و كثير من البجاحة و الكبر ...طول ما الورم الخبيث دة موجود ..طول ما النكبة مستمرة ..
و الاهم  من النكبة  هم شهداء النكبة ...
الله يرحمهم اجمعين ....

                                                 **********

ذكرى النكبة فكرتنى بتقرير جولدستون الشهير ...
انا كنت فاكرة ان جولدستون دا  بما انه قاضى ... كان منتحل صفة بنى ادم ...
ما هو اكيد محدش فى"  داخليته " حيشكك فى القضاء العادل و النزييييه ..
  بس لما قريت التقرير الخاص بالعدوان على غزة
و اللى هو تراجع عنه وقال "" ماكنتش  فاكرة بجد "" ..
تاكد لى بما لا يدع مجلا للشك انه لما عمل كدة كان على علاقة بالسباعى !!

                                                                 *********


 بكرة 6 يونيو 2011 ..اول  ذكرى  لوفاه خالد سعيد ...
الرمز اللى دخل التاريخ ... قبل ما بو عزيزى يدخله ...
المفتاح اللى فتح باب الحرية ...
خالد سعيد مش فرد .. بو عزيزى مش فرد
خالد سعيد  و بو عزيزى   ناس كتير قوى قبلهم  و بعدهم  ...
ناس معروفين و ناس محدش سمع عنهم ...بس كلهم كلهم ماتوا ظلم ....
هل يا ترى السفاح و المخلوع حاسين باللى عملوة ..حاسين قد ايه هما صغيرين و عدم ؟؟
كل الجبروت و الظلم و الغرور دا هزمة شعاع نور ..

هل اى حد عذب او شارك فى تعذيب وقتل او امتهان لكرامة الانسان
هل حاسس باى  شىء فى يوم زى دة ؟؟  بيحس باية لما بيشوف صورة شهيد ؟؟
يا ترى شعورهم ايه و النور اللى طالع من قبر كل مظلوم  بيحرقهم ؟؟ 

يمهل ولا يهمل ...سبحانة هو العدل و هو الحكم ...

                                                              ///
وقال الخال ...

اقتلنى .. قتلى ما حيعيد دولتك تانى ...
باكتب بدمى حياة  تانية لاوطانى ...
دمى دا ولا الربيع ؟؟ الاتنين بلون  اخضر ...
و بابتسم من سعادتى ولا احزانى

صباح حقيقي ... ودرس جديد قوى فى الرفض
اتارى للشمس صوت واتارى للارض نبض ....

                                                        **************


ياترى لما نعمل اول ذكرى ل 25 يناير حنعملها ازاى ؟؟
حنكون عملنا اللى الشهداء ماتوا علشانه ؟؟ و اللى المصابين اصيبوا بعاهات من اجلة ؟؟
حنقدر نوفى دين الشهداء و نقول دمكم ما رواش ارض بور ؟؟

هل يا ترى سنابل القمح حتطرح ؟؟

كل الناس اللى بيحاول يقفوا فى الصورة بالعافية ... واللى لسة بيجروا ورا الكرسى

و اللى طول الوقت خناق و تشكيك ... واتهامات للى رايح و اللى جاى ...

كل الناس اللى فى الهيصة دى ...فى اى حد منهم عارف ان فى واحد مات

علشان هما يقدروا بعملوا كدة ؟؟ هل اى حد فكر منهم قبل اى تصرف ...

اذا كان اللى بيعملة دا مناسب لدم شهيد مات علشان هو يبقى حر ؟؟

هو دا اسلوب حملة للامانة و ادائة للواجب اللى عليه ؟؟

لو كل واحد قبل ما يتصرف بص على صورة اى شهيد

وبص لعينيه .. اكيد مصر حتتغير بجد ...

حد فاهم حاجة ( 2)

* هو ليه اى حاجة بتحصل فى مصر ... اول حاجة باعرفها من تويتر ...لو مش قدام التليفزيون باتابعها على تويتر لحظيا و بالصور كمان .... وبعدين على طول افتح الجزيرة مباشر  اللى بتكون فى موقع الحدث ...منتشرة فى كل مكان ..اى حاجة تحصل تلاقى مندوبهم هناك  ( ابتديت اشك انهم فولورز )!!... وبعدين اللهم اجعلة خيرالقنوات المصرية بتصحى من النوم و تلاقيها بتتكلم عن الموضوع ... حد يبلغهم ان مصر اتغيرت و هما كمان لازم يتغيروا ...لان الموجة اللى شغالين عليها ...تخص الناس اللى هناك و محدش من هنا بيسمعها  !!!

 

* صدر قرار  بمحاكمة  المخلوع وولدية علوة و جيمبو فى 3 اغسطس  ... مش عارفة ليه حاسة انى فى انتظار مسرحية اللية الكبيرة بمعاجة درامية فاكسة ...

و الدليل على كدة التاريخ ...ايون التاريخ ....يعنى مثلا خد عندك .....

قتل المتظاهرين ... محدش شاف حد ولا فى حد عارف حد ...عارف ليه ...لان الاولاد المشاغبين كانوا بيلعبوا بالبمب !!...لجنة تقصى الحقائق اللى تابعة لوزارة العدل قالت ان هناك صعوبة فى التفريق بين حالات الدفاع عن النفس و حالات  القتل العمد  المتهم فيها ظباط الشرطة  و مدراء الامن بالنسبة  لواقعة قتل المتظاهرين امام اقسام الشرطة ...بالنسبة للقناصة .. غالبا دول من سلاحف النينجا اللى شغالين بالبطاريات لان محدش جاب سيرتهم و لا حد حاول يدور عليهم بالرغم من ان فيه شهادات من سائقين سيارات الاسعاف اللى كانت بتستعمل لنقل القناصة و الاسلحة ....دا غير فيديوهات اليوتيوب اللى مصورة  القناصة دول وهما بيلعبوا صلح مع المتظاهرين .....ووزارة الداخلية قالت على لسان الوزير ان البنادق الحديثة الليزر دى مش تبعهم !!  اكييد دا لوط من الصين متهرب قبل العيد ..اما بقى سيارات الامن المركزى اللى كانت بتدوس المتظاهرين و تضربهم بالذخيرة الحية و كلة على اليوتيوب ...دول باينهم اضغاث احلام ....و العربيات دى اتفكت و اتسربت خردة ...

و من التحقيقات اللى اتنشرت مع لواءات و مدراء امن ...معرفش ومش شغلى و ماعنديش علم ...وقواتى ماكانتش مسلحة ... اطلاقا مطلقا ... وكان شغال ساعى ياخد تقارير و يدى تقارير و هما اللى قالوا ...ومالة برضة ...امال الناس اللى ماتت بالرصاص دى و اللى اتصابت ..الرصاص جالها منين ؟؟؟ و سونة يقول انا ماليش دعوة هما اللى قالولى .. جالولك ايه ؟؟ قالولى ان القتلى شرطة و بلطجية  ....ماعرفش حاجة يابيه ... اسالوا العادلى هو اللى خدعنى ...  طبعا على اساس انهم بلغوة انها كبسة مخدرات كان البلطجية بيحاولو يهربوها من الميدان الى اراضى جامعة الدول او ميدان لبنان الشقيق ...وبعدين اذ فجأتن كدة ...بسم الله الرحمن الرحيم ... صدر حكم غيابى على امين شرطة هار ب بالاعدام لقتله المتظاهرين امام القسم اللى كان شغال فيه !!!!!!!

 يعنى العادلى اللى هو كبير زبانية جهنم اللى ربنا يجعلها مثواة امين يارب... بيتحاكم فى مسرحية ماسخة على ارض ثمنها 4.5 ملون جم يعنى شوية ملاليم و ياخد 12 سنة و غرامة هبلة و لسة بيتحقق معاه فى قتل المتظاهرين ... ولواءات  و ناس معروفين بالاسم و ظباط لسة فى اماكن عملهم عادى جدا و فى منهم اللى اترقى كمان ... شوف الحلاوة بقى ... اترقى ...و لما الناس ريقهم نشف من الاعتراض و الزعيق فى كل البرامج طول اليوم ...و الكلام بالدليل و الاسم و المنصب اللى كان و المنصب الجديد يعنى مش نفسنة و لا حقد مثلا ....  قام وزير الداخلية مشكورا بنقلهم .. واخد بالك معايا ... نقلهم الى مناصب بعيدة عن التعامل مع المواطنين ...قال ايه ... اصل انا ما اقدرش افصلهم !؟؟    "..................." و كمان  " ................." !!! ..هو محدش قاله ان فى وقف عن العمل مثلا لحين ثبوت البراءة ؟؟ محدش اقترح مثلا ان يكون فى  شخص ما بيفهم وان احتمال يكون بيفكر و مش حيقبل السفه دة ؟؟ خاصة لما يكون النقل الى درجة مساعد وزير داخلية ..... مثلا !!!

هو مش فى ناس طلعت من المصابين و اهالى الشهداء وقالوا للشعب المصرى كله و فى كل البرامج ان الظباط بيمارسوا ضغوط رهيبة عليهم الى حد البلطجة و التهديد  علشان يتنازلوا عن المحاضر و القضايا ضدهم ؟؟ وفى منهم اللى وافق و اتنازل ؟؟ فى اى حد مسئول حقق فى الكلام دة ؟؟ فى اى حد فكر انه يتابع الموضوع ده ؟؟ هى الناس دى مش برضة اللى بيتحاكم علشانهم كبير الحرامية و السفاح ؟؟ ولا المحاكمة دى علشان ايه ولا مين ؟؟

كبير الحرامية بقالهم شهرين بيدلعوه و يهشتكوة ... نفسيتة بتعمل صن تان ... قلبة بيتعلم باليه ... واحنا بيتوزع علينا عمم و سلاطين ... وبعدين يطلع علينا بكل بجاحة يقول ما عنديش و حاشتكيكم ؟؟ ولا المحامى بتاعة اللى على اربع محاور وشغال زى النار فى القش ... قال ايه الموكل الغلبان ما عندوش غير مليون جنيه ؟؟؟

و لا الست خضرا  اللى اول ما ابتدى التحقيق معاها اشتركت فى خدمة "  قلبى و افراحة  " و ابتدينا مشوار القسطرة – الظغط ... وبعدين اتنازلت عن الفلوس اللى هى بتاعتنا ... وبعد ما هى كمان طلع ماعندهاش و مفيش و ما تعرفش عنه حاجة  ... خرجت و بقت ميت فل و عشرة ومحدش سمع حاجة خالص  من ساعتها لاعن القسطرة و لا الظغط ولا النفسية ...

و بعد كل دة ... كل اللى لا يسدكة عقل دة ... جايبين امين شرطة ... امــين شــرطة و هـــــارب ... عرض التوفير و التميز .... 2×1 ....  و بيحكموا علية بالاعدام !!!! ايه الفتاكة دى ؟؟؟  وزراة الداخلية كلها كلها بكل الناس اللى فيها .. دا الوحيد اللى لية ادانة ؟؟ دا الوحيد اللى ليه سي دى ؟؟؟

اه ...لالالالا ... نسيت اقولكم ان كان فى سي دى تانى متسجل علية مكالمات بين العادلى و لواءات  او مساعدين له مش فاكرة  .... و المحكمة قال ايه ... بعتت جابت واحد من الداخليه ...واخد بالك معايا الداخلية ذات الثوب الاخضر و العتبة الشريفة ...علشان يفك العمل اللى على السى دى ...قوم ايه ...مسحة !!! سامحونى ماكانش قصدى ... LLL .... هو طبعا اتحاكم و اخد له سنة ولا اتنين ....بس ليه المحكمة عملت كدة ؟؟ ها   ليه ؟؟ هو القطاع القضائى ماعندوش حد ولا ادارة مثلا للتعامل مع التكنولوجيا المتقدمة ؟؟  ولا يكونش القضاء بيتعاون مع القسم الاليكترونى فى وزارة الداخلية  لاحقاق العدل على اساس انها فى خدمة الشعب ؟؟

 ليه و مرتضى منصور فين ؟؟؟ محدش استعان بيه ليه ؟؟؟ دا خبرة يعنى عالمية  و تخصص لا يستهان بيه فى مجال السيديهات.....

قولى انت بقى ...المتكلم مجنون و المستمع عاقل ...

دا معناه ايه غير استهبال مركز ؟؟؟  او لفافة طولها 30 سنه من  المر شربنا بعضها ولسة الباقى ...؟؟ دا معناه ايه غير اعلان رسمى على اربع صفحات نعى للعدل و الحكم بالعدل ؟؟؟  ايه معنى الفيلم الهابط هبوط حاد فى الدورة الدموية دة ؟؟ هو السباعى بعد الشرعى راح العدل ولا ايه ؟؟؟

و المفروض انى اصدق بقى ان فى 3/8 حيكون فى محاكمة من اى نوع  عادل  ولو حتى صينى ؟؟؟ على اساس انى  متخلفة عقليا و لا علشان انا  من دولة بتاجونيا ؟؟ و باتابع الاخبار دى فى الجرايد  وانا ما باعرفش اقرا باللغة البتاجونى و باتفرج على الصور بس ؟؟...

هو مش العادلى اخد حكم ب 12 سنة ؟؟ فى ايتها حد شافة من ساعتها بالبدلة الزرقا ولا فى اى لون ؟؟ طبعا محدش ..ليه ؟؟ لانه قاعد فى مملكته و احنا اللى محبوسين برة ...احنا اللى مضحوك علينا و فاكرين اننا حاكمناه !!! احنا اللى البلطجية و الحرامية هايصين معانا و الشرطة  بنشوفها فى التلفزيون بس ... لكن فى محاكماته تلاقيها زى الرز ....يكونوش دول فلول متنكرين مثلا ؟؟

المفروض انى اصدق اسطوانة عدالة القضاء ونزاهة التحقيقات ؟؟ انى اقتنع ان الشرطة اتغيرت مع مصر اللى بتتغير ومشغلة سي دى " ادينى فرصى تانية " ؟؟

على فكرة واضح انهم مش عارفين ان  مصر بتتغير فعلا .... وان فى ناس ماتت وناس اتصابت ... ودا حصل فى ثورة مش فى فرح ولا خناقة ....و حسبى الله ونعم الوكيل ...

* اصدار حكم على بطرس غالى بالحبس المشدد 30 سنة .... وحياة قلبى و افراحة ؟؟؟

هو ليه محدش قبض على بطرس غالى لحد دلوقتى ؟؟؟ راح فين ؟؟ واصلا ازاى خرج من هنا ؟؟؟

و بيقولوا انه على القوائم الحمراء للانتربول .... عظيم عظيم ....يعنى بالبلدى بالسلامة يا شربات و متشوفوش وحش ...واحد زى دة فلوسة اصلا ماكانتش هنا علشان ييجى النائب العام دلوقتى يتحفظ عليها ولا يمنعه من التصرف فيها ... دا مرتب كل حاجة من زمان و كل الغلة محطوطة فى امان بعيدا عن الكرار ... وكان بيلعب على كبير مع الناس اللى برة ...

* منع رشيد محمد رشيد من التصرف هو و بناته و زوجته فى اموالهم و التحفظ عليها ... حمدا لله على السلامة ... 

ماهو برضة شرحة ... جاى دلوقتى بعد ما بقاله شهور برة البلد تصدر قرار زى دة ؟؟؟ على اساس انه مؤدب و مش حيتصرف فى الفلوس ومتسني لما قرار زى دة يصدر ضدة ؟؟  وايه حكاية انه فى قطر بيشتغل هناك دى ؟؟ ليه محدش طلع يقول اى حاجة فى اى حتة ؟؟ هو ليه محدش سائل فينا ؟؟

* حسين سالم على قوائم الانتربول الحمراء ...اخر مرة سمعت فيها جملة القوائم الحمرا دى لما نصاب مدينة نصر من كام سنة هرب  ب 500 مليون ... النصاب دة كان شغال من كام سنة فى  توظيف اموال و عمل زباين كبار قوى و تقال جدا و من مناصب ملغومة غير الناس العادية ... وبعدين لم الغلة و هرب ... الناس المهمة دى محدش منهم قدر يبلغ علشان طبعا المبالغ الكبيرة جدا اللى ادوها للراجل دة ( وهو على فكرة شاب ثلاثينى !) .. ولما ناس زى دول يتنصب عليهم و مايقدروش يبلغوا  ودا كان فى زمن الفتة و الكوسة .... والبرنس و الباشا و البيه ....و الراجل دا يتحط على قوائم الانتربول الحمراء  ولحد دلوقتى ولا حس ولا خبر ....يبقى المفروض انى اتوقع ان حسين سالم حيتقبض عليه ؟؟؟ ولا اى فلوس حتظهر ؟؟  

اناشد الانتربول تغيير القوائم الحمراء لان اللون الاحمر  دا بقت سمعته وحشة جدا ... و كل الناس عرفت انه اخضر بس متنكر !! على فكرة ممكن يطلع نادى لكباااار رجال الاعمال واحنا علشان مش متعلمين ما نعرفش !!! عادى جدا ...

* انا خايفة من اليوم اللى حتعلن فية اللجنة المكلفة  بمتابعة ملف الفلوس اللى برة ...ان الفلوس خلاص وصلت مصر و دخلت بنك الحظ !!!

*  موضوع امن الدولة دا عامل لى لفافة فى نافوخى ...اشد من لفافة السباعى ...يعنى جهاز القمع اللى كان بيحتوى على زبانية غلبوا زبانية جهنم فى الشغل ... فجاة كدة تاب الى الله و قعد فى البيت ؟؟ وبقى اسمة الامن الوطنى ؟؟؟ لا يا شيخ ...و حيعمل كوشوك ويبيع بونبونى و فونضام ؟؟ سبحان الله .. يهدى من يشاء ...

 الاول حاكموا حاجة وخمسين ظابط من ضباط امن الدولة ...الو حشين ...و بعد كدة الوزير طالع يقول ان مافيش ولا ظابط من الفلول خلاص بقى موجود و انهم كلهم و عددهم حوالى الالف اتفركشوا .. وان جهاز الامن الوطنى شريف... شريييف ... و عتبتة طاهرة ... 

الف واحد بس ؟؟ اللى كانوا مراقبين مصر و بيسجلولها فى كل ركن و شبر من اولها لاخرها  الف بس ؟؟ اللى كانوا بيعذبوا و يقتلوا و كمان يدفنوا فى مقابر جماعية الف بس ؟؟؟؟ محدش فكر يسال الزبانية  اللى كانوا شغالين فى مقرات امن الدولة اللى الناس لقت فيها  غرف التعذيب  وصورتها ؟؟  و الناس اللى كانت فى يوم من الايام داخل الغرف دى محبوسة  حافرة اساميها على خشب الباب فى منظر من افلام العصور الوسطى ..... ولا المكتب اللى رفعوا السجادة اللى على ارضة لقوا تحتها غرفه تحت الارض ....فين صاحب المكتب دة ؟؟؟ فى حد سال  ولا فكر يسال ؟؟  فين امناء الشرطة اللى كانوا بيكهربوا الناس ؟؟ و يعذبوهم   ؟؟  و يسحبوهم لفوق السطوح علشان " حفلات " السمر ؟؟ ما هو البهوات كانوا بيتدخلوا فى اوقات المرح بس و  اللى كان   بيجهز لسهرات الانس دى هما الامناء ...فين ظباط الشرطة اللى كانوا بيفرشوا الطريق لزبانية امن الدولة ؟؟  فين متخصصى ضرب المحاضر ؟؟ فين ... و فين .. و فين ؟؟

فى حد فكر يسال ادوات التعذيب جت ازاى ؟؟  و اجهزة  التصنت على الناس و الكاميرات وخلافة من اجهزة قمع الدولة  , منين و مين اللى جابها ؟؟ ومنين فلوسها ؟؟ ومين اللى كان مشرف على موضوع دخولها البلد و تحت اى بند ولا اى مسمى ؟؟ فى حد فتح تحقيق عن المقبرة الجماعية اللى لاقوها فى امن الدولة فى اكتوبر ؟؟؟

 الورق اللى لاقوة الناس فى مقرات امن الدولة .. مصيرة ايه ؟؟؟ حد عرف اى حاجة عنه ؟؟

بلاش ....

فى اى حد قال اى تعليق ولا ايتها جملة من ايوها نوع عن المكاتب الخاصة بأمن الدولة اللى الناس دخلتها و صورتها وهى فيها بدل رقص ؟؟ ولا مكتب المسئول  اللى فيه مينى بار و جاكوزى ؟؟؟ ولا مكتب كبيرهم ...الذى علمهم  القتل ...اللى فيه ولامؤاخذة برنص بمبى ؟؟

 هو ليه محدش سمع ان فى تنسيق بين وزارة الداخليه بثوبها الجديد ( اذا ماكانش ايجار ولا سالفاه !)  و بين جمعيات حقوق الانسان اللى مش ملاحقة على بلاغات التعذيب ؟؟ زى كدة ما اتعملت لجنة داخل الاقسام  لتدليع المواطن و سؤالة عن مشاعرة تجاه ايتوها حاجة فى القسم ؟؟ الناس اللى اتعذبت موجودين وعارفين الظباط بالاسامى و الامناء و الاماكن و كل المعلومات ... و طالعين  فى كل وقت على الجزيرة مباشر ؟؟ .ليه ما سمعتش مثلا ان فى تحقيقات اتفتحت ؟؟ على اساس  " بلاش نتكلم فى الماضى  " ؟؟ ولا  " يهمك فى ايه  " ؟؟

محدش منهم  قرا كتاب " عاصمة جهنم " لمحمد الدرينى ؟؟ دا واحد بيحكى قصة تعذيبة فى امن الدولة ... ومن دا كتب كتير جدا ... و الكتاب دة اتناقش و اتعمل له تقديم فى صحف قومية يعنى مش هجس ولا اى كلام ... فى حد فكر يكلم الناس دى من الداخلية الجديدة ؟؟  

فاكرين الصحفى رضا هلال اللى اختفى من كام سنة ؟؟ و اهلة احتاروا  ومصر كلها قعدت اسابيع بتبحث عن رضا هلال ...اللى اختفى اختفاء خلى الجان  سمعتهم بقت بعافية ... فاكرينه ؟؟ اتضح ان امن الدولة خطفوة و عذبوة لغاية ما فقد النطق و بعتوه الى مستشفى العباسية  ببيانات مختلفة يعنى وتحت حراسة مشددة ... والباقى طبعا مش محتاج شرح ... الله يرحمة ...

اخوة حكى كل الحكاية ومعاه اوراق و اثباتات ورافعين قضية و.. و... ليه محدش من الامن الوطنى ولا الداخلية طلع يقول اى حرف ؟؟ هل مثلا لان امن الدولة اتفورت وخلاص عفى الله عما سلف ؟؟...
محدش من اى جهة قرأ مثلا عن التجربة الالمانية ؟؟ الالمان كان عندهم امن دولة زينا ... بنفس الدرجة من القذارة .... وعدد السكان كان 80 مليون ...ولما قامت الثورة فصلوا 3 مليون  شخص كانوا شغالين زى عندنا كدة ...فى الحزب الفاسد و ذيول النظام ... 3 مليون شخص علشان يطهروا بجد ... ما بين اشخاص اخدوا اعدام واللى اخد سجن و اللى اتمنع من ممارسة السياسة  ... تنفيض شامل و يبتدوا على نظافة ...و ملفات امن الدولة تم تجميعها  فى ارشيف و بقى من حق اى مواطن انه يقدم  طلب و يطلع على الملف الخاص بيه ....كل حاجة بقت ملك للشعب حتى ملفات مراقبته و التصنت علية ... 
 مش الف واحد  يتفوروا و محاكمة حاجة و خمسين  !!! وملفات امن الدولة تتقطع و تتحرق ولا حد سأل و لا حد حاسب حد ولا حد قال اى كلام ...كأن الملفات دى تخص ناس تانية فى بلد تانية ...

فى حد طلع علينا ذات صباح و قرر انه يقول لنا ايه حكاية كنيسة القديسين بالاسكندرية ؟؟  هل فى حد فتح التحقيق ؟؟ الصورة اللى طلعوا علينا بيها و قال ايه ان وش الانتحارى اللى نفذ العملية و جارى البحث عن كينونته ...الصورة دى ايه ظروفها ومين اللى فبركها ..لانى اول مرة اعرف ان انتحارى بينتحر  ويعمل كل الهيصة دى و يسيب وشة مش متعور !! ولا الوش كان منفجر وهما لزقوة مثلا ؟؟ طب ايه هو نوع الغراء المستخدم ...هل هو نفس النوع اللى المخلوع كان بيستعمله ؟؟

دا بن لادن ...اللى هو بن لادن ...قتلوة برصاصة فى الراس و محدش اتكشف على صورة ولما الظغط زاد على الحليوة الاسمر عمل ليكاء مع شوية  " ممثلين " من الكونجرس ... وبعدين واحد طلع يقول ...علشان انا امريكانى حاقول على الصور ياك ...و ان الصور رهيييييييبة  وان جزء من المخ ظاهر.. يااااااااى ...

قوم احنا بقى بفتاكتنا المعهودة... نغلب الامريكان بتوع افلام الالش ... والواد الانتحارى المجهول بتاعنا يتفوق على الواد المجهول اللى قتل بن لادن و يموت ووشة ممكن يتلزق...  وباصص للكاميرا ...وايه بقى... ليه تصويرة كمان ...

هل  الحادث دة فعلا بتدبير من  امن الدولة ..هل فى تطور لاى حاجة ؟؟  اعتقد انهم فى الداخلية و الامن الوتنى كانوا مشغولين باعلانات الشعب و الشرطة ايد واحدة ...  و التصوير مع افراد الشعب اللى كانوا مختفيين ورجعوا بعد الغيبة ... هى فعلا ايد واحدة و علشان كدة  لم ولا تصفق  ومحدش عارف بكرة فيه ايه  ....

و علشان كدة و من موقعى هذا باوعلنها صراحة كدة ... امن الدولة لسة موجودة ... ما  ماتتش باللفافة ...ولا اتخنقت بقصاصات الورق المحروقة ...تموت ازاى و هى سيدة المستحيل اللى مدوخة ادهم ؟؟ هى بس تم طلبها لمهمة جاسوسية جديدة للبحث عن فلول الشعب  بعد ما تم فلفلتها ..و صبغت شعرها وعملت ميك اب  و غيرت اسمها للامن الوطنى ... ولما تجمد المية اللى بيحلفوا عليها طول الوقت انها ماتت ... برضة مش حاصدق !!!