افلام الفتنة

اللى بيحصل دا يمثل خطر و تهديد باشعال ازمة دولية خطيرة ... لانه ضربة تهدد عرش صتاعة الافلام الهندية......اما افلام الاكشن فمخرجينها دلوقتى واقفين على عربيات هوت دوج فى نيويورك على النواصى ... بعد ما هوليوود ماتت باسفكسيا الخنقة!!

و بيقولوا عتدنا ان موسم رمضان كل سنة و انتم طيبين اتضرب .. ليه مش فاهمة ... مين بعد الافلام اللى بنشوفها كل يوم لايف ممكن يتابع اى مسلسل عاملينة ممثلين محنطين بسيناريو ملل ؟؟؟... دا احنا فى نعمة والله ....دا احنا عندنا فرصة الدخول للوكيشن بدون رقابة ... و المشاركة فى الفيلم ......و افلام ايه نجاح ساحق.. و الشهرة فورية ..و مش محتاجين بالتالى دور سينما و لا تذاكر ولا  شركات انتاج ولا دوشة من دى تانى ..

ولا الممثلين بقى .. يا عينى على الحلاوة .. وجوة من قلب الاحداث وشوش حقيقية مش وجوة مرسومة ببوية  جير .. تعبيراتها انسانية مش بلاستيك..

المفروض لمدة 10 سنوات  تالية كل رسائل الماجستير و الدكتوراه تناقش الابداع فى كتابة سيناريو و الحوار و التصوير و الاخراج و كل العناصر السينمائية لسلسة افلام  الفتنة اللى حاصله على مدار الايام الماضية .. و ياسلام  على اختيار اماكن التصوير ولا الابطال و خاصة البطولات النسائية  . هو اللى صعبان عليا فعلا المخرج .. يا عينى بيتعب و هو الوحيد اللى بيبقى ورا الكاميرا  ومحدش يعرفة.. ومازال البحث عن المخرج جاريا , بعد كل فيلم يبدا الجميع فى التساؤل : ياترى مين العبقرى اللى عمل الفيلم  الكبير دة و اللى كلنا دخلناه و كنا فيه  ابطال وكومبارس ؟؟ دا اكيد ساحر او مخاوى !