الجمعة 27 مايو 2011

         اللهم انك ان تنصرنا فلا غالب لنا

" الدعاء دة  كان اول جملة اكتبها على الفيس بوك بعد التنحى بدقيقتين ... " 

 بعد اسبوع حافل بالتعليقات  و التحذيرات و الصداع المزمن ... وكل الناس اللى زهقونا كلام و مناقشات حول الاخطار و التهديدات المحتملة ... واحتمال اشتراك كائنات فضائية مع الفلول  فى تحالف شيطانى لافشال مخطط يوم الجمعة .. مع انها زى كل الجمع اللى قبلها و اللى برضة كانت ليها مطالب....بس فى النهاية..  تختلف الاسماء و تتعدد  الشخصيات ولكنها تتحد فى الجنسية المصرية ..

 ابتدى اليوم بداية رائعة وانتهى نهاية اروع و الحمد لله ...بالرغم من كل الائتلافات و التيارات اللى كانت مختلفة المطالب و الاراء ...الا انه ثبت بالدليل القاطع ان الميدان  للمصريين ..المصريين و بس ...اى حد تانى  يحاول ينط الحبل حيتكسر و اللى بيتكسر فى التحرير ما بيتصلحش تانى ... دا تاريخ شاهد و كاتب ...

خلاص انا عندى فكرة ... نعمل دولة الميدان الشقيقة و نعمل لها تاشيرة دخول و اقامة .. وعلى الراغبين لدخولها اجتياز اختبارات الذكاء المحددة .. اصلها مش ناقصة اغبياء و متخلفين .. ومعاهدة عدم تسليم مجرمين ..لان اى مجرم حيتحط فى وسط الميدان فى قفص كبير ... نسيبة بقى للابتكارات و الدلع  اللى حيشوفة مننا كشعب مصرى ميدانى !!

 ما عندناش بورتو طرة ... ولا مستشفيات فى شارم لذوى القلوب الخاصة .. مفيش غير القفص .. جوه الميدان كل الناس سواسية بجد.. مفيش فى العدل مجاملات  ولا اعتبارات من اى نوع ... و مفيش افلام و لا تمثيليات ولا ممثلين يفقعوا المرارة.....حتقولى  ليه ؟؟

 احنا عندنا كشعب ميدانى ميزة خاصة لكل واحد فينا تميزنا عن اى شخص من برة الميدان ...اننا بلا مرارة .. لانها اتشالت من زمان ..بلا وجع " قلب " ! ارتجاف قناة مرارية ..حنعمل قسطرة .. لا مش حنعمل ... و مياصة حوصلة مرارية ...عصارة مرارية حمضانة و بتتعالج تدريجيا... شلناها علشان احنا ما بنحبش الحال المايل و لا الدلع القدييييم دة ..اصل احنا شعارنا نسر مش كتكوت ..

ما علينا ...

انا مواطنة مصرية عادية جدا لا انتمى لا حزب ولا اى تيار دينى من اى نوع  ..  ودا راى اللى كونته من اللى شفته و سمعته ... اذا كان الراى دا فيه غلط ابقى سعيدة ان اى حد يشاركنى فى مناقشتة  .. بس كمان لو فهمى غلط ,  دا مش لان الموضوع صعب ولا عويص , بس لان  اللى باعت الرسالة اصلا باعتها مغلوطة ...و غالبا حيبقى من جيل مدرستى متطورة !

ممكن فى المرحلة دى تعمل لنفسك كوباية شاى او كابوتشينو لانى ناويه ارغى معاك شوية ...

اللى لفت نظرى فى هذا اليوم العظيم و الى حيضيف صفحة منورة براقة لتاريخنا , 3 حاجات :


1- شباب التحرير :

 

من يوم الخميس ابتدى التحضير و التنسيق  على تويتر .. ابتدت تويتات تحمل ارقام الخدمات الطبية و خدمات الطوارىء , تويتات بتحذر من الشمس و ارتفاع درجة الحرارة و بتطالب الناس بان يكون معاهم عصير و مية و كاب تفاديا للشمس , ارقام  الخدمات و المساعدات القانونية , ارقام للاتصال بها فى حالة الرغبة فى  التطوع و الانضمام للجان فى الميدان ( ودا كان فى القاهرة و الاسكندرية  و السويس  حسب التويتات اللى شوفتها )

من يوم الجمعة صباحا بدات المجموعات المختلفة فى التنسيق مع بعضها على تويتر ...لان مش كلهم صلوا الجمعة فى الميدان( التحرير ومسجد القائد ابراهيم )  , و بعد صلاة الجمعة بدات كل مجموعة فى التحرك من مكانها نحو الميدان بارسال تويتات بمدى اقترابها و حجم عددها حتى وصولهم للميدان  ود خولهم من اماكن مختلفة ( التحرير ) .

بعد كدة كان يوم احتفالى رائع بعودة مصريين الميدان ( كل ميادين مصر )  .. حسيت ان كل واحد بيسلم على التانى و بيقوله : ازيك كنت فين من زمان ..واحشنى ..

هى مش كانت جمعة غضب ثانية   وكل المندسين كانوا عاملينها فيلم رعب دموى ؟؟ بس انا اللى حسيتة و شفته انها كانت جمعة حب وجمعة رجع فيها المصريين تانى لبعض ..  كل الناس كانت بتقول ان روح التحرير كانت موجودة اليوم دة ..طب هى الروح دى ليه بتطفش مننا بعد ما نخرج من الميدان ؟؟ ايه اللى بيزعلها ؟؟  احنا ليه مش قادرين نحتفظ بيها جوانا ؟؟ هو ليه كل الخلافات بتدوب فى الميدان ؟؟ هو ليه كل الاصوات العالية و الخناق بيختفى و بيفضل الفرح و الابتسام و الحب ؟؟

لان الميدان .. اى ميدان هو قلب مصر ودا مكان مقدس و ساحر .. واى مكان مقدس لا يعرف اى مشاعر سلبية و لا سيئة ..لا يعرف سوى سحر المحبة و الخير ..

الشعب دة ... اللى قضى 18 يوم مقدسة .. و يوم الجمعة خرج يقول رايه ...و الخروج دة غربل شوائب كتير قوى كانت حاسبة نفسها علية ... شوية تراب و غبار وقعوا من على قطع الذهب و الالماس ..الشعب دة قرر يروح الميدان يوم الجمعة علشان " ينفض " التراب دة و يخلى كل حاجة ترجع لاصلها و تاخد مكانها ...

  الناس هى اللى نظمت الخروج دة واللى تولت مسئوليه الحماية و التفتيش سواء فى مداخل الميدان , العمارات المطلة على الميدان و اسطحها , تنظيم دوريات على موتوسيكلات تلف ارجاء الميدان من الداخل و من خارج الميدان لمتابعة الحركة فى الشوارع المحيطة , و اللجان اللى كان من مسئوليتها توزيع المية و العصائر على لجان التفتيش و المتابعة ...

 الناس دى و الشعب دة بالروح دى ...مش حيخاف من عجلة الانتاج اللى نامت على الجنط ولا من الاقتصاد اللى اشتغل فى خدمة شحتنى شكرا .... هو ممكن يغير عجلة الاقتصاد كلها بالجنط .. بس هو محتاج يتقعد معاه قعده عرب ... وعلى بياض و على نظافة ... نردم على اللى فات و ياخد حقة بما يرضى الله و يبقى مرضى ..اصلة ما يعرفش غير الطريق الصحراوى و مالوش فى الدائرى ... خليك معاه فى الدغرى و انت توصل سليم .. وبعد  كدة نتفق و نحدد المطلوب وازاى ...وبعدها ...

اتفرج على الفرسة وشوف جمال الخطوة المصرية 

ملامح البدر... و ضحكة غارت منها شمس الصبحية

وقمر... ساب مكانه لجمال احلى صبية

2- الجيش و الشرطة :

المجلس العسكرى قرر ان قوات الجيش مش حتتواجد نهائيا فى الميدان و انها ستقوم بتامين المنشات و المبانى الحيوية ..ماشى .. علشان يقطعوا الطريق على اى سوسة تحاول تنخر فى السكة دى ... مستوعبة الحتة دى ... بس افرض بقى لا قدر الله لا قدر الله اى حاجة حصلت كان حيبقى ايه الموقف ؟؟

من يوم الخميس باليل تلاحظ فى الاسكندرية اختفاء كل افراد المرور من كل الاشارات  دا غير اختفاء افراد الشرطة اللى بيظهروا فى التلفزيون و الاشارات الرئيسية .. دا غير ظهور اشاعة غريبة ان البنوك حتقفل لحد يوم الثلاثاء و الناس ابتدت تسحب فلوس من ماكينات الصرف بشكل مكثف ...و طلع البنك الاهلى يكذب الاشاعة اللى بتقول ان ماكينات الصرف مافيهاش فلوس و اكد مسئول البنك ان كل حاجة طبيعية و مفيش مشكلة .. يمكن هو دة اللى عمل الازمة باعتبار ان عندنا عقدة مكلكعة فى نفسيتنا  و ضميرنا مش سالك من اى تصريح يقول ان مفيش مشكلة و ان دا معناه المباشر ان فيه مصيبة ؟؟ ضميرنا محتاج ظبط زوايا  و اتزان ... كل حاجة نشك فيها كدة ؟؟   ما علينا ...

يوم الجمعة اليوم كان منظم تماما و كان يوم جميل جدا ....

الجمعة مساءا على الساعة 7 .. الشوارع من لوران وحتى رشدى مظلمة و خالية من الناس كانت تقريبا مدينة اشباح .. معظم المحلات مقفولة و اللى مش قافل كان شايل كل البضاعة و المحل فاضى تماما ..دخلت مركز خدمة موبينيل ..كان نفس الوضع .. مفيش اى بضاعة على الرفوف و شايلينها فى المخزن و موظف خدمة العملاء وضح ان الاجراءات دى علشان " ظروف النهاردة " ..

اللى هى ايه بقى " ظروف النهاردة " دى ؟؟؟ ماهو كل جمعة بيبقى فى مظاهرة عادى يعنى ... دى بقت فى التقويم المصرى ...ايه الجديد؟؟ الجديد هى حالة الشحن السلبى و التحذيرات  و البيانات الغامضة  عن الجهات اللى من المحتمل مش عارف ايه ...كل الهالة الغامقة اللى اتعملت  حوالين اليوم دة ..

طب الجيش وكان ليه اسبابه لعدم التواجد .. الشرطة بقى اسبابها ايه ؟؟ هى مش ناوية تمشى عدل ولا عاجبها الحال المايل ؟؟

مش عايزين يتواجدوا هما كمان فى مكان المظاهرة ... بلاش  احسن برضة ..

 بس فى الحقيقة كان المفروض يكونوا موجودين علشان يتعلموا ازاى يكون التنظيم و نوريهم اصول الشغل ..

سؤالى هو : لما هما ماكانوش فى المظاهرات و لا جنبها و لا حواليها .. كانوا فين ؟؟ بيدوروا على الفلول ؟؟

ليه ماكنش التواجد الشرطى مكثف فى الشوارع ؟؟ على اعتبار انهم مش متواجدين فى اى اشارة و لا بيأمنوا اى تجمع بشرى ...لية الحالة اللى انا شفتها دى كانت موجودة ؟؟

يوم الخميس الساعة 1 بعد منتصف الليل مجموعة من المساجين فى قسم المنتزة و لعت فى البطاطين و بمساعدة اهاليهم كان فى ضرب نار و هروب للمساجين من القسم بعد ما ولعا فى البطاطين و نفس القصة القديمة للفيلم الهندى هروب مسجون ...كانوا 76 مسجون هرب منهم 28 و الاهالى ساعدت فى الامساك بالباقى و احباط المحاولة .. الفيديو على اليوتيوب ..
و دى مش اول مرة ... طول الوقت نفس الفيلم و برضة " بمساعدة الاهالى " يتم احباط المحاولة او السيطرة على الموقف...طب انا عندى اقتراح .. بدل ما فلول النظام دى  وذيوله محدش عارف يلمها ..خلاص نسيب عليها فلول عاشور الناجى  وهى تخلص عليها ... على بال ما الدرك يتدارك نفسة ... مش برضة فكرة ؟؟

اولا :  للمرة المليون يكون فى عدد كبير لمساجين او محجوزين على ذمة تحقيقات  فى الاقسام و كل مرة بيحصل نفس الشىء : البطاطين تولع او اى حاجة تانية تولع و ناس من برة تهجم لتهريبهم و يشتغل ضرب النار و  فى كل مرة الاهالى و اللجان الشعبية بيساعدوا و يتصدوا ..هو لية محدش بيفكر فى حل للموضوع ده ؟؟

ثانيا : اذا كانت امكانيات الشرطة لسة ما رجعتش من الاعارة و الشرطة لسة قدامها وقت للتعافى من عملية البتر اللى عملتها .. ليه محدش فكر يستعين باللجان الشعبية ؟؟ يضمها بشكل ما الى اقسام الشرطة بحيث انها  تكون عاملة بالتعاون مع الشرطة ؟؟ مش احسن من  الاعلانات الخنيقة بتاعة الشرطة اللى مش عارفة مين العبقرى اللى افتكسها  وكمان مشاهد الناس اللى فرحانة بالشرطة و بتسلم عليها فى الشوارع و بتاخد افراد الشرطة بالحضن كانهم راجعين من الحجاز ولا  راجعين من هجرة  ...
ولا مشاهد المظاهرات بتاعة " الشعب و الشرطة ايد واحدة " بتحسسني ان الشعب زعل الشرطة اللى سابت له البيت و العيال لانها زهقت من عمايلة و راحت عند ابوها وهو بيغنى لها تحت الشباك ...على اساس انها طول عمرها ماشية دغرى و هو اللى مش مقدر قيمتها  وقيمة عتبتها الخضرا ...

بالمناسبة بقى لازم المبنى المتحنط بتاع ماسبيرو دا يتغسل بالفنيك و ينضف بقى من الصراصير اللى ساكناه .. نفس اسلوب التفكير اللى بيخاطب جمهور مصاب بالجلطة الدماغية ... محدش قالهم هناك ان فى ثورة و ان الناس نفضت  للاشتغالات  ولا ايه ؟؟ لازم يشيلوا القراطيس اللى فوق المبنى و يجيبوا " اى باد "  !!

ما علينا نعود للى قبل الفاصل ....

 يعنى مثلا اذا فى ضرورة لتواجد كل هذا العدد من المساجين فى نفس المكان لية الشرطةلا تستعين باللجان الشعبية للحراسة حوالين القسم او المنطقة مثلا ؟؟ ليه فى المناطق العشوائية الشرطة لا تستعين باللجان الشعبية للتامين و الحماية بدل ما كل شوية معركة او مجزرة تقوم لخلاف هايف بين عائلتين و لا بين اى فردين ؟؟ يعنى الناس اللى حمت البيوت بتنظيم رائع و تنسيق بديع " وانا شاهد عيان على كيفية عمل اللجان دى ليلا و نهارا " , الناس اللى فى كل جمعة بتقوم بالتنسيق لها و للاعداد الكبيرة دى و اليوم بينتهى بفضل الله بشكل كويس و مشرف ....ليه الناس دى و  اللجان دى ما تأمنش المستشفيات اللى كل يوم و التانى البلطجية هاجمين عليها و قاتلين حد  و مهددين المرضى و الاطباء فيها بشكل يفقد افلام الرعب سمعتها ؟؟

من كام يوم كان فى خبر جديد اخر 25 حاجة ...فى مستشفى فى المنيا اتنين متخانقين و قطعوا بعض بالاسلحة و الفيلم المعتاد .. واحد منهم دخل العمليات قام الطرف التانى هجم على غرفة العمليات و فتح بطن المريض اللى على طاولة العمليات و اخد كبدة و امعاءة و خرج بيهم للاحتفال بالانتصار  !! فى تعليق مدير المستشفى قال انه عمرة  ماشاف المنظر دة غير فى فيلم تاريخى ..احنا كل افعالنا بقت الاولى من نوعها فى التاريخ ... تفكير غير مسبوق مصحوب بافعال جامدة  دبابة !!

و الدكاترة اعلنوا اضرابهم عن العمل .. مالهمش حق خالص ...دى الشرطة فى خدمة الشعب ... الحقيقة من كتر خدمته  قررت الاعتزال .. ماهو اصلة ما بيبطلش طلبات طول الوقت ... شعب متعب .. ايه ده هو فى كدة ابدا ؟

على راى الاستاذ جلال عامر " عاد شعار الشرطة فى خدمة الشعب .. وبقى ان تعود الشرطة ! "

بس انا بقى من رايى ... اذا ماكانتش حترجع  وتمشى صحراوى و تبطل مياصة ,  يبقى خليها فى بيت ابوها احسن !

3- موقف الاخوان المسلمين :

موقف الاخوان هو اللى طغى على الساحة و على كل التعليقات , هما ليه مصرين يكونوا جزء من النظام ؟؟ محدش قالهم ان مصر بتتغير وانا كمان؟؟

كل تصرفاتهم واضحة وضوح المظاهرات فى التحرير .. الجرى وراء الكرسى و لاخر نفس ..

البداية ...  تصريحات متضاربة و اراء عكس بعضها و كل ساعة بحال ..مرشح للرئاسة اخوانى يقول انه سيستقيل من مكتب ارشاد الجماعة  اذا ما نوى ان يترشح .. وبعد كدة يعلن انه مش حيستقيل لان الحزب مالوش دعوى بقيادة الجماعة و ان دى حاجة ودى حاجة منفصلة ! واحد طالع بيتكلم بشكل واضح جدا عن الحدود و الدولة الاسلامية و بعدين  لما الناس تنتقد التصريحات دى يقولك اصل دا جزء من الحوار اتاخد خارج السياق العام ...لا وايه احنا لاننا مش من الاخوان فمش فاهمين  اللغة و السياق على اعتبار اننا ما بنفهمش اللغة الاخوانية الاصيلة ولازم لما يتكلموا قدامنا بعد كدة يراعوا الجهل اللغوى بتاعنا .. ومالة .. ما احنا جيل  مدرستى متطورة منتجة !

و الاخ صبحى صالح ربنا يصلح له و لينا الحال ..بعد تصريحات عجيبة انقلابية ثورية عن زواج الاخوانى من الاخوانيات وحاجات تانية كدة طالع يقول انه الكلام جزء من سياق محاضرة و لا مؤتمر مش عارفة و انه واضح جدا انه كان بيهزر !!!!! اختلاف واضح   بين الشباب اللى زى الورد ..الصبح  الجديد ابو مخ منور  وواعى و فاهم و عارف بيكلم مين و ازاى يبتدى الكلام و بين ناس فى البراويز..و بيعدين نلاقى تصريح انه مفيش خلاف و لا حاجة و اللى الجيران سامعينة دا مش خناق دا كان ماتش كورة بس!  جماعة و منظمة ازاى مش عارفة .. مفيش بيان واحد متفقين علية و كل واحد من القيادات براى و كلمة  محدش منهم حاطط فى اعتبارة ان مش كل الناس اللى بتشوفهم و تسمعهم  اغبياء و احتمال يكون فيه قلة مندسة بتفهم و لا اصحاب اجندات بيفكروا و يسالوا اسئلة خبيثة .

و واضح ان الكلام اللى بيطلع  عن سياقة و كل شوية واحد ييجى وياخدة من ايدة ويحطة فى حتة تانية  فى  سياق تانى, مش متربى  وباين عليه ماشى مع الفلول و العياذ بالله !! ولا يكونش ملموم على شلة البنت كنتاكى بتاعة الميدان ؟؟ طبعا ماهى فى الميدان بقى و سكتها دائرى  و كل ما يعدى على سياق يقف عندة شوية .. ماهو كلام عيارة فالت ومحدش عارف يلمة !!..

اعوذ بالله !

وختمت بحكاية جمعة الغضب الثانية .. مش عاجبهم الاسم و مش موافقين عليها بالرغم من اتفاقهم مع مجموعة كبيرة من المطالب .. ماشى حقهم .. بس مش من حقهم ابدا انهم يقولوا كلام كتير قوى من عينة التكفير و العلمانية و منشورات و عربيات بتلف الشوارع بتنادى بعدم النزول ! اول مرة اعرف ان العمل الدعوى يتضمن  وصف المختلفين فى الراى بالملاحدة و الليبراليين و العلمانيين و يتضمن حشد الجهود لمحاربة العدو الميدانى  الغاشم !! و على فكرة الشباب على تويتر كانوا مصورين المنشورات دى و حاطينها .. يعنى مش اوشاعات ولا تويتات منفسنة ..

و كمان كان فية تويتات ترصد  للكفرة و الليبراليين و العلمانيين و الملاحدة وهما بيصلوا الظهر جماعة !!!مش غريبة ان الجناح العسكرى للسلفيين ما ظهرش علشان يقيم الحد على اعداء الدين ؟؟

سيل عرم من التصريحات الرافضة و المنتقدة بشدة و اللى بتحذر من كل حاجة ... كل انواع التحذيرات ...

مش فاهمة هو نزول مظاهرة للمطالبة بالعدل و الحق و المطالبه بفهم اللى بيحصل دا رجز من عمل الشيطان و لا ايه ؟؟..هو احنا كنا حنتظاهر فى ديسكو تك ولا رايحيين نعترض على  ادارة  ملهى ليلى  مثلا ؟؟ ولا مثلا ميدان التحرير ولا القائد ابراهيم دا فى دولة تانية ؟؟ ولا المطالب دى تخص شعب شقيق و احنا سرقناها منهم ؟؟ هما الاخوة برضة مش معانا فى البلد ولا هما من دولة شقيقة و جايين اعارة ؟؟ هو رصاص القناصة  كان بيموت حسب الاتجاة السياسى ولا حسب الانتماء الجماعى ؟؟ مش برضة عندهم شهداء و مصابين و كل اب ولا ام نفسهم فى العدل و انهم يشوفوا قاتل ابنهم فى القفص قدام القضاء ؟؟ ولا دا مطلب يخصنا احنا بس على اعتبار اننا مصريين من دولة  الميدان ؟؟

 فى اييييييه حد يفهمنى فى ايه ...احنا فى مركب واحدة و الله .. مصر متكعبلة و بدل ما نحاول  نقومها و نفكر ازاى نصحح و نعدل نقوم نختلف و نخون الاخر ونتهمة بالكفر و العلمانية !

بس طبعا انا فاهمة ان دا من حسن الرباية و الادب ...لما تلاقى بنت الجيران متكعبلة مش معقول تجرى عليها تساعدها الا الناس يفتكروا ان فى حاجة كدة ولا كدة لا قدر الله !!

هى دى الحرية و الديمقراطية و احترام الاخر ؟  الاخوان اللى هما اول و اكتر ناس اتظلموا و عانوا من استبداد الراى الواحد ؟؟ هو مش برضة كل واحد حر فى رايه و اختيار تصرفاته ولا الشعب المصرى تحول لمحظور بعد الثورة ؟؟ ماهى ثورة بقى و قلب للاوضاع !

وبعدين انا عايزة اعرف باى حق بيتكلموا باسم الشعب المصرى ؟؟ ولا باى حق بيقولوا ان الجماعة معترضة و مش حتنزل يعنى دا فرض راى على افراد الجماعة  ولا ايه ؟؟؟ يعنى لو انا من الاخوان دلوقتى و لقيت الجماعة بتقول ما تنزلوش ما انزلش امتثالا لاوامر الجماعة ؟؟؟ هما فكروا و قرروا ان اليوم مش ولا بد فانا اقول امين ؟؟يعنى ايه هما بيحبوا الحرية  و يدافعوا عنها  طبقا للبيان الصادر  ؟؟ ولا واحد حس ان مصر دى تستحق منه وقفه فى الميدان ؟؟ هو لما الناس ماتت فى الميدان كانت بتموت علشان مصر و الحرية و الكرامة  ولا علشان اسم يوم الغضب كان عاجبهم فقالوا يموتوا بقى فى يوم اسمة روش ؟؟ و الجمعة اللى فاتت كان اسمها غتيت فبلاش ؟؟ يعنى شباب الاخوان اللى نزل دا يعتبر من المارقين و لا الخوارج ؟؟  ومش بعيد ابدا يقام عليهم الحد لانهم من الصابئين !!!

وبعدين مش هى برضة الجماعة  اللى  نظمت  وقفة احتجاجية يوم الثلاثاء 24/5  بطول كورنيش اسكندرية للمطالبة  بعدد من  المطالب اللى كانت فى الميدان ؟؟  ولا الناس اللى كانت واقفة دى فلول ؟؟

من رايى .. لما هما منظمين كدة و عندهم القدرة على حشد الشباب ما الاحسن نحشدهم لغرض مفيد بدل من اللف بالسيارات فى الشوارع لمطالبة الناس بعدم المشاركة او توزيع المنشورات ضد يوم الجمعة ما كنتم  تنظموهم فى لجان شعبية يوم الجمعة بدل المرور و الشرطة اللى اختفت من شوارع الاسكندرية مثلا من يوم الخميس باليل . او مثلا حملات لتنظيف شوراع مصر زى ما كان كل الشباب و الاطفال بيعملوا بعد الثورة مباشرة ...

اى نشاط مفيد .. مش عايزين  يشتركوا فى يوم الجمعة .. و مالة .. بس ساهموا بحاجة مفيدة بدل التصريحات الحامضة على موقعهم  و متابعة اخبار و اعداد  الميدان كانه العدو بتاعهم ..

 دا غير انها وقيعة بين الشعب و الجيش .. وقيعة ايه ؟؟ جابوا الكلام دة منين ؟؟

مين اصلا جاب سيرة الجيش فى الموضوع ؟؟ دى الناس الى فى التلفزيون  تعبوا كلام فى كل وقت و على مدار اليوم يفهموا فينا ان هناك فرق شاسع بين الجيش و بين المجلس العسكرى اللى بيدير شئون البلد ... وهما لسة مش واصلهم النور ,  محدش قال اننا ضد المجلس دة ابدا ولا عمرة حيحصل  بس لينا طلبات و تحفظات على سير العملية .. عايزين نفهم و نعرف .. لا اكثر ولا اقل ..ايه النظام ؟؟ واولنا فين و اخرنا فين ؟؟

لازم يفهموا ان فى فرق كبير جدا بين تعاطف الناس معاهم  لتعرضهم للظلم و القهر و بين ان الناس  ابتدت تقرا و تفهم و تتغير بجد و ما اعتقدش انه حيمر وقت طويل و الناس تقدر تفرق بين اللى بيقدم لها راى و اللى بيستغفلها و يستهين  بعقلها...اكيد الناس مهما كانت بسيطة حتقدر  " تفقس"   اى   "" وطنى ""   فى ثوبة الجديد !!
اصل مصر بتتغير وهما كمان ...

اللى بيمثل يقدر يمثل لبعض الوقت  فقط و مش ممكن حيقدر يمثل كل الوقت ..

 المجنون بتاع زنجة زنجة  كان مأجر شركة بملايين الدولارات علشان تحسن صورته و تعمل له " ايمج "...!!!

خذو الحكمة من افواة المجانين ...