بعد صباح الخير ...
النهاردة على الصبح كدة .. فى حادثة مروعة ...خبطتنى اخبار غامقة زى الليل الغطيس ..
ودى اخرة كل واحد بيقرأ الجرايد على الصبح !! دى عادة سيئة للغاية على فكرة ... هو احنا لية بنقراها الصبح ؟؟ الاجابة : ادمان واى ادمان هو عادة سيئة و غتييييتة ....المفروض نقراها فى وسط النهار عملا بمبدا : اللى يشوف البلاوى اللى مستنياه تهون علية البلاوى اللى قدامة !!
اخبار نكدت عليا و سدت نفسى سد عالى و ما شربتش مج النسكافية الصباحى ...و فكرت جديا بالانتحار فى جردل قهوة سادة ...
قال ايه ....
اللجنة الطبية اللى راحت تكشف على المخلوع قالت ان حالتة لا تسمح بنقلة الى مستشفى سجن طرة ....
و ان حضرته معرض للسكتة القلبية ...لا الف يعد الشر ...يمكن لما نقتل ناس زيادة من الشريرين و نزود كريات الدم السايحة حالتة تتحسن و الهيموجلوبين عنده يرتفع ؟؟
و اللجنة مش بعيد تكون لقت الجواب اللى محضره لنا بمناسبة فقع المرارة ...
ايها الاخوة المواطنون ....
من موقعى هذا ....احب ابلغكم اننى لم اكن انتوى ترك بلدى شرم الشيخ ابدا ....
عيشت و حاموت على ارض الفيللا بتاعتى ...دى ارض طاهرة مبنية على شعاب مرجانية اصيلة ...و الرخام جاى من برة بالغالى ... طاهر طاهر طاهر ...
يا شعبى الحبيب ... على فكرة ...
فى ناس كتير منفسنة منكم وحاولت توقع بينا ...
قالولى ...ما تغير الشعب الغتيت دة بقى ... و تشوف لك شعب جديد حديث ..
شعب فلول اوبشنز .. ممكن يبقى MUTE... او صوته يبقى هامس حسب ما تحب ...
يغنى بكل اللغات ...ممكن برمجتة فى اى وقت وعلى اى حاجة ...
جااهز للديمقراطية ...ABS ... على محاور ...
بدل الشعب العندى دة ابو سكة واحدة ....دوشجى وما بيبطلش طلبات ...
مفيش حاجة عاجباه وكمان باصص لك فى رزقك ...
بس انا طبعا بما انى اصييييل اصيييل ...
ما رضيتش طبعا ..قلت حاسيب الواد جمال ياخد الشعب دة ...
اصلة شاب بقى و عنده خلق عنى ... وحيفهموا بعض على طول ..
اصلى مش عايزة يتعامل مع شعب جديد على طول كدة ....
بعدين يبقى ايدى ناعمة ... انا عايزة
يتعامل مع دا الاول يجرب وياخد خبرة ...
ايها الاخوة و الاخوات .....
انا سيبت لكم ميدان التحرير علشان تلعبوا و تهيصوا براحتكم ...
انا عارف انكم بتحبوا تفرقعوا البمب و تلعبوا بالشماريخ و مسدسات المية و الليزر ...
و باعتبارى اب حنون و ماليش زى ...و ايمانا منى بانى باخدمكم ...
قلت اسيبكم على راحتكم باعتبار ان رغبتكم دى مشروعة ...
بس بعينكم انى اسيب الارض الطاهرة دى ...
مش عايز بقى دوشة و صوت عالى كل شوية ....
عايز ارتاح واعمل صن تان بهدوء علشان التجاعيد ....
هو بصراحة اب حنين اه .. بس ما تنفعش الحنية لما الست ضربات تبقى شغالة على واحدة و نص و مش عارف تنتظم ... الناس تقول ايه بس لما تلاقيها طالعة نازلة كدة بدون مخرج ؟؟؟ محدش مسيطر عليها ؟؟ هى الضربات ليها الا سمعتها ؟؟ غلطتة انه كان مركز مع الولد بس برضة الحنية الزيادة معاها حتجيبله السباعى !! استغفر الله العظيم !
حتسالونى : هوالسيناريو عايز ايه ؟؟ اقولكم انا بقى ...
الاول عدى قد ايه لغاية ما تكرموا و تعطفوا و من الله علينا بحبسة 15 يوم على ذمة التحقيق و بعدين بيتجدد له ( والله كتر خيرهم على التجديد !!) و بعدين فى شرم الشيخ .. ليه مجاش هنا؟؟ هو دا سؤال برضة ...
الداخلية قررت انها مش حتقدر تأمن تواجدة فى القاهرة و ان تواجدة ممكن يؤدى الى انفلات امنى لايمكن السيطرة علية ...
ومالة ... حقها برضة ...ماهى يا حبة عينى غلبانة صاحبة مرض و بتجرى على يتامى !! ناقصة بقى واحد فلتان محدش عارف يلمة ...وولا واحد ضرباته دايرة على حل شعرها ؟؟
ما علينا ...
و بعدين نكتشف ان كبيييير الاطباء بتاعنا اللى كان بيكشف على الضرس المسوس المخلوع ...واللى كل شوية يقول لنا ... ارتجاف اذينى .. مياصة ميترالية ... حالة نفسية ذات سمعه سيئة ...
حضرة الدكتور طلع حلاق صحة ...لا دكتور ولا نيلة ...معاه ماشستير من ايام الهكسوس واخدة تخليص حق من بقال و ما يعرفش ولا شاف و مالوش دعوى وهما اللى قالولى ...دا غير ملفه مع اللفافة .... استغفر الله العظيم !!
و كمالة المسخرة واحد لذوذ حبوب طالع يقول ان مستشفى طرة .... اللى بقالهم شهر بيوضبوا فيها وحطوا فيها اجهزة بارقام ساحبة
و راها اصفارها زى صغار البط ماشية ورا امها.... " مش مستعدة " لاستقبال خولى الجنينة !!ِ
ياعينى ... هى محدش قالها ولا ايه ... مسكينة باين انها اتضحك عليها ...باينه الشعب الشقى ابن الاية ده اللى مش جاهز للديمقراطية من يومه علمها هى كمان ما تبقاش جاهزة !! العيال بتفسد بعضيها ... جيل اخر زمن والله !!
و عملا بمبدأ : يا نعيش عيشة فل يا نموت احنا الكل
الست اصيلة لما حست ان النداهة بتقرب منها هى كمان ...قلبتها دى جى وطلع لنا صوت حكيم باغنيته الشهيييييرة جدا " اه يا قلبى "
و كمان عدوية " حبة فوق و حبة تحت " .... و اخدنا لنا شوية ايام مع اغنية " اييه اييه ايه الحكاية ..اييه اييه ايه الرواية .... فهمنى .. كلمنى ..." مجهود ثقافة هلامى لرفع المستوى السكرى للدرجة الرابعة ... و المهرجان دا كان مصحوب بافلام المسابقة الرسمية ..
القسطرة رايح جاى _ ظغط الدم لا يزال فى العالى _ مذكرات حالة نفسية
وبعد كدة لما دفعت المعلوم اللى هو اصلا مش بتاعها ... كل اليلة دى اختفت فى ظروف غامضة ومحدش سمع عنها حاجة .... ومازال البحث جاريا ....اللى يلاقى ليله القبض على فاطمة يبلغ عنها ...
انا عايزة حد يجاوبنى : ايه الفيلم الرخيص دة ؟؟
الراجل دا صاحب ملحق خاص فى موسوعة جينيز .. دا احنا بسببة دخلنا التاريخ ...و كمان قعدنا الامارات فى البيت .. اللى كل حاجة عندهم اول و اكبر و الوحيدة من نوعها ...
احنا دخلنا التاريخ لاننا بقى عندنا اول مخلوع فى تاريخنا .. جربنا كل حاجة ...شعب نزيه و عينة مليانه ... ما بيخليش فى نفسة حاجة ..وهو كمان دخلنا التاريخ الصراحة ...
الراجل دا صاحب السرقة الحصرية .. سارق شعب بحالة.... سرق اعمار و احلام وادمية ناس ...الراجل دا اللى قلبها اكبر معمل فسيخ
.. واالى كان بيوعدنا و يقول ان امن المواطن و كرامته فوق كل اعتبار وواجب وطنى ..و..و..و..
و بعد كدة تطلع اللجنة اللى المفروض انها جاية على نظافة و اللى كنا فاكرين انها شغالة على مية بيضة تقول الكلام القبيح دة ؟؟
حالة ايييييه اللى لا تسمح ؟؟ ها ؟؟ حاله ايه ؟؟ هما مش واصلهم اننا بنعرف نقرا و نكتب ؟؟؟ ولا دول دكاترة ماركة 0900 ؟؟
مش عارفة لية الخبر دا و التمثيلية كلها مفكرانى جدا جدا بنفس تفاصيل نكتة الجمل ! عباقرة القرن الواحد و العشرين بيواجهوا التويتر والاى فون بالجمال ...نفس كاتب السيناريوا ... قالك وهما ايش فهمهم فى امراض القلب .. ياراجل ارمى اى طوبة و اللمبة فى الكلوب محروق اساسا ...
ما يعرفوش بقى اننا متصاحبين على اونكل جوجل الله يكرمة و " يوسع " علية كمان و كمان .. بصراحة الراجل ما بيبخلش علينا بايتها حاجة ... اطلب انت بس ... اللى المفروض انها لجنة الهنا و السرور واللى معاها " وكل واحد عارف نفسة " يتعلموا من اللى فات واهو مش بعيد دول اربع شهور بس مش اربعين سنة يعنى ...المفروض يعرفوا ان الشعب ابن الايه دة بيفهم شوية و فيه دكاترة قلب .. اه والله هو بس اللى حويط وكان مدكن !! دا غير بقى اللى ما عتبوش علمى من اساسة و بفضل ربنا مخهم نضيييف و بيلمع ومساعدة اونكل جوجل ممكن يفوروا اى " قلب " ويخلوة قالب زبدة ...اطلب بس انت اى معلومة كدة و شوف الناس قد ايه اللى حتقدم على دكتوراه فيها مش مشستير بس ...وايه حاجات لايف .. طبيعى وقتى مش محنط فورمالينى ...
هما فاكرينا ايه بالظبط ؟؟ ايه بقى الفرق بينهم و بين اللى قطعوا الانترنت و اللى عملوا لنا جمال بارتى ؟؟ها ؟؟ حد يقولى ...
بيستغفلونا ولا بيستهبلونا و لا احنا اللى باين علينا كدة ولا ايه ؟؟ عيب قوى .. عيييييب جدا ... دا احنا اللى اخترعنا الافلام العربى ...
دا الناس بتيجى من كل الدنيا علشان التمثيل عندنا ...حد يقولهم ان مبروم على مبروم ما يلفش ...دا غير بقى اذا كنا احنا اللى بارمينه سوا ..ها ...ولا ايه النظام ؟؟
باينة زى الشمس من غير نضارة نظر .. مش عايزين يجيبوة القاهرة و لا طرة و ممكن يتحاكم كدة وكدة ...الله اعلم فى ظغوط ولا زى ما هما بينكروا ... يفضل عيان و تفضل الضربات منحلة طالعة نازلة ...و حالته النفسية اللى هربت مع واحد فاشل .... وقصة جعلونى مجرما بقى ...و الداخليه عندها سكسكة و ما تقدرش تشوفة كدة ....قلبها رهيف ...
حد بقى يطلع يحترم عقل الناس دى وكفاية بقى الاسلوب الفاااشل دة ... كفاية تفكير بنفس العقلية المتحلله دى .... احنا بنفهم ولاننا بنفهم محدش يقدر لا يستغبانا ولا يستعمانا ... احنا عايزين العدل ... بس ... العدل ...
حق الناس اللى ماتت ... حق الناس اللى العربيات داست عليها و هرستها فى الشوارع ... حق الناس اللى اتصابت من قناصة النينجا اللى الناس عارفه هما مين و كانوا بيتنقلوا للميدان بعربيات اسعاف و ناس من الشعب الوحش بتموت فى الشوارع ومفيش اتصالات ولا تليفونات وحتى لو فى الاسعاف كانت بتنقل الاهم منهم ... ولا البنادق الليزر دى تبع مين ولا حد جاب سيرة الموضوع ده اساسا .....حق الناس اللى الرصاص المطاطى ضيع نظرها ... حق كل اللى اتعذبوا فى امن الدولة و اتسجنوا سنيين ظلم ولا ماتوا ظلم ....حق اللى لقوهم فى مقابر جماعية فى امن الدولة فى اكتوبر ...كل ده على اليوتيب ...لايف ... مش تمثيل ..حق كل ام واب ليهم شهيد ولا مصاب ... حق ايام عشناها فى ضرب نار و هجوم مسلح وسجون اتفتحت .....اذا هو ضربات قلبة لعبية ...فيه ناس الرصاص المطاطى لسة بيلعب فى دماغها ... الرصاص دخل و استقر داخل الجمجمة ..ومحدش يعرف يطلعة ...و اللى الرصاص اخترق الدماغ و خرج و الشاب فى غيبوبة ...
جايز بسلامتة حالته النفسية اتاثرت من كدة ؟؟ سونة الحساس ...
مش عايزين تجيبوة هنا ... خلاص خليه متلقح هناك ...ماهو كان فى وشنا 30 سنة ... مش واحشنا طلعته يعنى ... بس احترمونا و احترموا اننا مش اغبياء ولا بنعانى من نقص فى نمو المخ ولا حاجة ...محدش يقولى اصل الشرطة مش حتقدر تسيطر على الموقف ...موقف ايه ؟؟؟ ها ؟؟هى دى خناقة توكتوك ؟؟؟ ولا دور ميكروباص مثلا ؟؟؟ امال بتعرف تسيطر بس على محاكمات العادلى وعز ؟؟؟ افراد الشرطة اللى بيقفلوا منطقة المحكمة دول شغالين معاهم علينا ولا ايه ؟؟ كل وردياتهم بتيجى كدة سبحان الله سبحان الله صدفة صدفة وقت المحاكمات ؟؟؟ ....و بعدين ما الشعب فى شرم الشيخ كان متجمهر بتحضر قدام المحكمة اللى اتحقق فيها مع جمال وعلاء اول مرة ... وكان فى منتهى التعاون مع قوات الشرطة ... برضة كله على اليوتيوب .... الشعب كلة دلوقتى عارف ايه هى امراض القلب .... لان الشعب ابتدى يقرا علشان يعرف ...الناس فى الشارع ... ناس عادية جدا...بيدوروا ورا كل معلومة بتتقال ... لانهم متاكدين انها صينى ... الشعب دا بيطلع كل جمعة ملايين و يرجع و اظن يوم 27/5 مش بعيد ولا ايه ؟؟
قولولنا ايه النظام .. عرفونا ...بلاش تخلوا السوس ينخر ... بلاش تدوا فرصة للى ما يسواش انه يقول ما فى الخمر ...
على فكرة اللى شاغل الناس و مخلى مزرعة فيران هايصة عندهم ... مش انه مش فى السجن ... لا ... انهم حاسين و متاكدين ان دى تمثيلية من بتوع رمضان الجاى !! هو مش حييجى من شارم ... وفيه الف سبب جاهز للاستخدام ...
لما واحد زى زكريا عزمى ... اللى هو زكريا عزمى ... بعد شهرين ...شهرين يا مؤمنين قاعد عادى جدا فى مكتبة بيمارس عملة عادى جدا ...اذ فجاتن يتقبض علية و يتحاكم علشان فيلتين ولا عربيات ؟؟؟ ايه الحموضة دى ؟؟
ولا العادلى ...برينس السجن المصرى ...بيتحاكم علشان ارض ومش عارف هلاوس ايه كدة ....بكرة الوحش يطلع ما بيسددش الفيزا كارد !!!
لا وايه كمان يا اولاد بقى ...دول عربية بتعرض انها تدفع فاتورة علاج الحساس !!!!
"......................................................" دا لانى فى مكان عام مش حاقدر اقول اللى فى نفسى .... الرقابة بقى منها لله ....انا اتاكدت انها فلة من الفلول ...
بالنسبة للمصابين اللى لسة لحد دلوقتى بيتعالجوا على نفقة اهل الخير ؟؟؟و كل شوية ناس تطلع تقول اللى عنده مصاب يكلمنا ... ولا تقارير شهداء التحرير اللى باعتراف اطباء شرفاء .. اتقالهم خفضوا الاعداد شوية ..ولا اتطلب منهم اللعب فى التقارير و اسباب الوفاه ... والى بقى عندهم عاهه مستديمة واللى فقد عملة للابد لوجود عجز دائم ؟؟ دول مش لاجئين من دولة بتاجونيا على فكرة ...دول من دولة ميدان التحرير ....دول نتيجة الامان و كرامة المواطن ....وهو قاعد فى 17 نجمة بيتفلى وقال ايه قلبى بيوجعنى .... ايه يعنى ؟؟؟ مش فاهمة ؟؟؟
و بكل البجاحة و الصفاقة "" مش اسفة خالص على الاطلاق "" طالع يقول انه ماعندوش فلوس و حيقاضى اى حد مش عارف ايه كدة ؟؟
انا عايزة حقى ... انه يتحاكم ... بالعدل ... مش مهم ييجى طرة ..وياريت يبطلوا النغمة المشروخه دى و يبقى الكلام على بياض ... مش حنجيبه للاسباب التالية وخلاص ....بس يتحاكم .. مش تمثيلية ماسخة علشان فيلا و لا عمولة ...لا علشان الدم اللى سال دة مش ببلاش ...دا اغلى منه هو واعمالة السيئة وعائلته المسمومة ....علشان حلمى اللى مات ومستقبلى اللى اتسرق ...علشان كل اللى غرقوا فى العبارة و كل اللى غرقوا فى مراكب الهجرة ...علشان اقدر اصدق ان مصر بتتغير ...
اللهم اجعل ثأرنا على من ظلمنا ..
يارب انت العدل و الحكم ... يارب انت القاهر فوق عبادك ..
اللهم من اعتز بك فلن يذل ومن اهتدى بك فلن يضل ...
